وسىنىڭ ءوزى بۇگىنگى ۇرپاقتىڭ ساناسىن سەلت ەتكىزىپ, ەلگە, جەرگە دەگەن پاتريوتتىق سەزىمدەرىن وياتار دەگەن ءۇمىتتى دە ۇكىلەپ كەلگەن. العاشقى ساپارىن قىزىلجارداعى «ابىلايدىڭ اق ۇيىنەن» باستاعان بىلتىرعى ساپارلار جايلى قالىڭ كىتاپ تا باسىلىپ شىقتى.
ال بيىلعى ساپار بىلتىرعىدان دا ۇزاق بولىپ ەكى اپتاعا سوزىلعان. وسى ۋاقىتتا ەكسپەديتسيا مۇشەلەرى 7 مىڭ شاقىرىمنان ارتىق جول جۇرگەن. بيىلعى ەكسپەديتسياعا قىزىلجارداعى «ابىلاي حاننىڭ رەزيدەنتسياسى» مۋزەي-كەشەنىنىڭ قىزمەتكەرى الماس ءالىمجانوۆ تا قوسىلىپ, بىرگە ساپارلاپ قايتتى. ەكسپەديتسيا قازاقستان رەسپۋبليكاسى تاۋەلسىزدىگىنىڭ 30 جىلدىق جانە ابىلاي حاننىڭ 310 جىلدىق مەرەيتويلارىنا ارنالعان ەكەن. ساپارلاۋشىلاردىڭ قۇرامىنا ءبىزدىڭ وبلىس قانا ەمەس, نۇر-سۇلتان, كەنتاۋ قالالارىنان دا وكىلدەر ەنگەن. ولاردىڭ اراسىندا تاريحشىلار, جۋرناليستەر, قوعام قايراتكەرلەرى, ولكەتانۋشىلار جانە حان ۇرپاقتارى بولعان.
ساپاردىڭ مارشرۋتى كوكشەتاۋ قالاسىنان شىعىپ, اقمولا, پاۆلودار, شىعىس قازاقستان, الماتى, جامبىل جانە قاراعاندى وبلىستارىنىڭ اۋماقتارىن قامتىپ, قايتادان كوكشەتاۋعا جەتكەن. ەكسپەديتسيا مۇشەلەرى « ۇلى دالانىڭ ۇلى ەسىمدەرى» ۇرانىمەن پاۆلودار وبلىسىندا مۇسا شورمانوۆتىڭ, ءماشھۇر-ءجۇسىپ كوپەەۆتىڭ كەسەنەسىنە سوعىپ, جەرگىلىكتى حالىقتان اتاقتى تۇلعالار تۋرالى جاڭا دەرەكتەر جيناعان. ال شىعىس قازاقستان وبلىسى سەمەي وڭىرىندە ولار ۇلى اباي مەن شاكارىمنىڭ باسىنا زيارات ەتىپ جانە ۇلى جازۋشى مۇحتار اۋەزوۆتىڭ تۋعان جەرىندە, مۋزەيىندە بولعان. الماتى وبلىسىندا التىن-ەمەلدە بولىپ, قازاقتىڭ ۇلى عالىمى, ابىلايدىڭ شوبەرەسى شوقان ءۋاليحانوۆتىڭ زيراتىنا بارىپ, زيارات ەتكەن.
جامبىل وبلىسىنا كەلگەندە قورداي اۋدانىنىڭ قىرعىز ەلىمەن شەكتەسكەن جەرىندەگى كەنەسارى حاننىڭ ەسكەرتكىشىنە گۇل قويىپ, رۋحىنا قۇران باعىشتاپتى. سونىمەن بىرگە حاننىڭ تۋعان جەرى كوكشەتاۋدان الىپ كەلگەن توپىراعىن سەۋىپتى.
وسى جولداردىڭ بارىندە ەكسپەديتسيا مۇشەلەرى جەرگىلىكتى حالىقپەن, ونىڭ ىشىندە اۋزى دۋالى اقساقالدارمەن, عالىمدارمەن, ولكەتانۋشىلارمەن اڭگىمەلەسىپ, ولاردىڭ بىلەتىن دەرەكتەرىن جيناعان, جادىگەرلەر تابۋعا تىرىسقان. جەرگىلىكتى باق وكىلدەرىمەن كەزدەسىپ, وزدەرىنىڭ ماقساتتارى تۋرالى اڭگىمەلەگەن. ارينە, بۇل ەكسپەديتسيا الدارىنا ارحەولوگيالىق نەمەسە تاريحي ماقسات قويعان عىلىمي ەمەس, جوعارىدا ايتقانىمىزداي, حالىق نازارىن ۇلى تۇلعالار مەن تاريحي وقيعالارعا اۋدارۋ. ەكسپەديتسيا ءوزىنىڭ ماقساتىنا تولىق جەتكەندىگى دە كورىنىپ تۇر. ەندى ونىڭ قورىتىندىسى تۋرالى جاڭا جيناق شىعارىلماق.
سولتۇستىك قازاقستان وبلىسى
