قازاقستان • 07 قىركۇيەك، 2021

نورۆەگيادا قازاق مادەنيەتى كۇنى ءوتتى

39 رەت كورسەتىلدى

وسلوداعى «راۋشانگۇل سارايى» ساحناسىندا قازاق مادەنيەتى كۇنى ءوتتى، دەپ حابارلايدى Egemen.kz.

بۇل تۋرالى قازاقستاننىڭ نورۆەگياداعى ەلشىلىگىنىڭ ءباسپاسوز قىزمەتى مالىمدەدى.

«راۋشانگۇل سارايى» (Roseslottet) ايگىلى سۋرەتشى ۆەبيورن ساند 2020 جىلى اشقان كوركەم جانە وقۋ كەشەنى بولىپ تابىلادى. بۇل جوبا ەكىنشى دۇنيەجۇزىلىك سوعىس كەزىندە نورۆەگيانىڭ جاۋلاپ الىنعانى تۋرالى ەستە ساقتاۋدى نىعايتۋعا جانە دە دەموكراتيا، گۋمانيزم مەن قۇقىقتىق مەملەكەتتىڭ قۇندىلىقتارىن ناسيحاتتاۋعا باعىتتالعان.

جوبا جەتەكشىلەرىنىڭ شاقىرۋىمەن قازاقستان ەلشىلىگى وسلو تۇرعىندارى مەن قوناقتارىنا ارناپ مادەني قويىلىم ۇيىمداستىردى. الماگۇل قالەلوۆا باستاعان نورۆەگ-قازاق مادەني ورتالىعىنىڭ مۇشەلەرى «قوسباسقان» مەن «اققۋىمسىڭ» اتتى قازاق بيلەرىن ۇسىندى. جوعارى سىنىپ وقۋشىسى قۋانىش توكەن «ەگىز-لەبىز» ءانىن ورىندادى. نورۆەگيالىق كورەرمەندەرگە ءان اۆتورلارى - كومپوزيتور جۇماعۇل قىدىراليەۆ پەن اقىن يسرايل ساپاربايدان ارنايى سالەم جەتكىزىلدى. قازاقي ماتەريالدىق ونەردىڭ ۇلگىسى رەتىندە قوناقتاردىڭ نازارى ديپلوماتتاردىڭ جۇبايلارى توقىعان «قۇراق كورپەگە» تارتىلدى.

وسىمەن قاتار، قوناقتاردىڭ الدىندا اباي قۇنانباي ۇلىنىڭ قارا سوزدەرى مەن تاڭدامالى پوەزياسىنىڭ شىعارمالارى نورۆەگ تىلىندەگى اۋدارمالارىنىڭ باسپاگەرى جانە رەداكتورى وسحيلد كۇلوس ءسوز سويلەپ، ۇلى اقىننىڭ بىرقاتار ولەڭدەرىن وقىپ بەردى. ءىس-شارا بارىسىندا ءسوز ايتقان ەلشى ەركىن احينجانوۆ پاندەميانىڭ تەز ارادا اياقتالۋىنا جانە قازاقستاننىڭ تانىمالى ونەر شەبەرلەرىنىڭ نورۆەگيادا، سونداي-اق نورۆەگيالىق ورىنداۋشىلاردىڭ قويىلىمدارىن قازاقستاندا ۇيىمداستىرىلۋىنا ءۇمىت ارتتى.

قازاقستان ەلشىلىگى مەن «راۋشانگۇل سارايى» سوڭعى جىلدا تىعىز ىنتىماقتاستىقتا بولىپ وتىردى. كەشەن قوناقتارىنا ەكىنشى دۇنيەجۇزىلىك سوعىس كەزىندە نورۆەگيانىڭ سولتۇستىگىن ازات ەتۋگە قازاقستاندىق جاۋىنگەرلەردىڭ قاتىسقانى جانە لاگەرلەردە تۇتقىندا بولعانى تۋرالى ايتىلدى. ۆزۆود كومانديرى مۇقاش سافارعاليەۆ، ساربازدار عاني قىشمەتوۆ، تەمىربەك كەڭەباەۆ جانە يمانزادا قاباقوۆ تۋرالى جەكە اڭگىمەلەر قىزىعۋشىلىق تۋدىردى.

«قازاقستان ەلشىلىگىن جانە نورۆەگ-قازاق مادەني ورتالىعىن راۋشانگۇل سارايىندا قارسى الۋ ءبىز ءۇشىن ۇلكەن قۋانىش. ءبىزدىڭ كەشەندە «سوۆەتتىك ورىس مۇناراسى» ينستاللياتسياسى بار. بۇل ءمۇسىن فاشيستىك رەجيم كەزىندە ءومىرىن قيعان جانە نورۆەگيادا ينفراقۇرىلىم سالعان كەڭەس وداعىنىڭ بارلىق تۇتقىندارىنا ارنالعان ەسكەرتكىش. ولار اۆتو-، تەمىرجول جانە باسقا دا قۇرىلىس نىساندارىندا اۋىر جۇمىس ىستەدى. كوپتەگەن ادامدار سول سوعىس جىلدارى قازا تاپتى. ارالارىندا قازاقتار بولعان. ءتىرى قالعاندار دا بولدى، ءتىپتى كەيبىرەۋى نورۆەگيادا قالىپ، وتباسىن قۇردى...

بۇگىن ءبىز قازاقستاننىڭ بىرەگەي مادەنيەتىن اشىپ كورسەتۋگە، ونى ناسيحاتتاۋعا مۇمكىندىك العانىمىزعا وتە قۋانىشتىمىز. راۋشانگۇل سارايىنا قوش كەلدىڭىزدەر!»، دەدى ايگىلى ديريجەر جانە كەشەننىڭ مۋزىكالىق جەتەكشى مارتين رومبەرگ.

 

 

سوڭعى جاڭالىقتار

دوللار ارزاندادى

قارجى • بۇگىن، 16:22

شىمكەنتتە دە LRT سالىنۋى مۇمكىن

ايماقتار • بۇگىن، 12:50

دوللار باعاسى تاعى قىمباتتادى

ەكونوميكا • بۇگىن، 10:32

ۇقساس جاڭالىقتار