كەزدەسۋ قازاقستاننىڭ برازيلياداعى ەلشىسى بولات ءنۇسىپوۆ جانە برازيليانىڭ قازاقستانداعى ەلشىسى رۋبەم انتونيو كوررەا باربوسپەن ونلاين فورماتتا ۇيىمداستىرىلدى.
تاراپتار ءوزارا ىنتىماقتاستىقتىڭ بىرقاتار باعىتىن بەلگىلەدى. ونىڭ ىشىندە ەكى ەل اراسىنداعى ساۋدا مەن ينۆەستيتسيالاردى دامىتۋدىڭ باسىم ماسەلەلەرى مەن پەرسپەكتيۆالارىن ايقىنداۋ ءۇشىن ءار ەلدىڭ جەكە سەكتورىمەن كونسۋلتاتسيالار وتكىزۋ, بيزنەس وكىلدەرىنىڭ بىرلەسكەن كەزدەسۋلەرىن ۇيىمداستىرۋ, كاسىپكەرلىكتىڭ قۇقىقتىق جاعدايى تۋرالى اقپارات الماسۋ جانە ت.ب.
كەزدەسۋ بارىسىندا ب.بەكەنوۆ QazIndustry اق-نىڭ CNI-مەن ىنتىماقتاستىعى ەكى ەل كاسىپكەرلەرى اراسىنداعى تىكەلەي ىسكەرلىك بايلانىستاردى كەڭەيتۋ, بىرلەسكەن كاسىپورىنداردى ۇلعايتۋ, ەلدەر اراسىنداعى تاۋار اينالىمىن ارتتىرۋ تۇرىندە ناقتى ناتيجەلەر بەرىپ, قازاقستان مەن برازيليا اراسىنداعى ەكىجاقتى قاتىناستاردىڭ دامۋىنا سەرپىن بەرەتىنىن اتاپ ءوتتى.
الداعى قاراشا ايىندا قازاقستان مەن برازيليا اراسىنداعى ىسكەرلىك كەڭەستىڭ ءبىرىنشى وتىرىسى وتەدى.
قازاقستان مەن برازيليانىڭ جالپى تاۋار اينالىمى 2021 جىلدىڭ العاشقى 6 ايىندا وتكەن جىلدىڭ سايكەس كەزەڭىمەن سالىستىرعاندا 4 ەسە ءوستى. سونىمەن قاتار سوڭعى 5 جىلدا قازاقستاننىڭ برازيلياعا ەكسپورتى ايتارلىقتاي ارتتى. 2016 جىلدان باستاپ 2020 جىلعا دەيىن 100%-عا دەيىن ۇلعايدى (25 ملن دوللار). برازيليا نارىعىنا كۇكىرت, فەرروقورىتپا, قارا مەتالل بۇيىمدارى ەكسپورتتالدى. برازيليا قازاقستانعا جەرجاڭعاق, تاماق ونىمدەرى, امين قوسىلىستارى, قۇبىرلار, قوزعالتقىشتار جانە ت.ب. تاۋارلارىن اكەلەدى.
ايتا كەتەلىك, برازيليا ۇلتتىق ونەركاسىپ كونفەدەراتسياسى – برازيليا يندۋسترياسىنىڭ وكىلى بولىپ تابىلاتىن رەسمي جانە جوعارى دەڭگەيلى ۇيىم. CNI برازيليانىڭ 27 فەدەرالدى ونەركاسىپ فەدەراتسياسىن جانە 1 245 سالالىق جۇمىس بەرۋشىلەر كاسىپوداعىن ۇسىنادى, وعان 700 مىڭعا جۋىق كومپانيا كىرەدى. قۇرىلعاننان بەرى CNI برازيليا قوعامىندا جەتەكشى ءرول اتقاردى, نەگىزگى ۇلتتىق ماسەلەلەردى, اسىرەسە برازيليا ونەركاسىبى مەن ەكونوميكاسىنىڭ تيىمدىلىگىنە اسەر ەتەتىن ماسەلەلەردى تالقىلاۋعا جانە كونسەنسۋسقا قول جەتكىزۋگە ىقپال ەتتى. سونىمەن قاتار CNI ۇلتتىق ونەركاسىپتى زەرتتەۋدى, يننوۆاتسيانى جانە تەحنولوگيالىق دامۋدى العا تارتادى. سونىمەن قاتار بۇكىل ەل بويىنشا قىزمەتكەرلەردىڭ جاعدايىن, الەۋمەتتىك مارتەبەسىن جانە دايىندىعىن جاقسارتۋعا باعىتتالعان باستامالاردى قولدايدى.
«ەگەمەن-اقپارات»
