استانادا تۇراتىن اعايىنىمىز بالاسىن ۇيلەندىرگەن. وي سالارلىق تويدىڭ ءون بويى ۇلتتىق ناقىشتا وتكەن...
سول ۇيگە تاعى كەلىپ تۇرمىز. اعايىنىمىز نەمەرەلى بولعان. الدىمەن ەسىكتى كەلىن اشتى. ءيىلىپ تۇرىپ سالەم سالدى. «كوپ جاسانى» ايتىپ, كوڭىلىم كوككە جەتىپ قالدى. قاتتى قۋاندىم.
استانادا تۇراتىن اعايىنىمىز بالاسىن ۇيلەندىرگەن. وي سالارلىق تويدىڭ ءون بويى ۇلتتىق ناقىشتا وتكەن...
سول ۇيگە تاعى كەلىپ تۇرمىز. اعايىنىمىز نەمەرەلى بولعان. الدىمەن ەسىكتى كەلىن اشتى. ءيىلىپ تۇرىپ سالەم سالدى. «كوپ جاسانى» ايتىپ, كوڭىلىم كوككە جەتىپ قالدى. قاتتى قۋاندىم.
وسى كەزدە ءبىر شىجىق بولدى. بىزبەن سەرىكتەس بولىپ كەلگەن جانىمداعى جاماعايىن: «وي, قاراعىم, مۇنىڭ نە؟ قوي وندايىڭدى», دەپ بەزەكتەدى دە قالدى. ءتىپتى, جۇگىرىپ بارىپ يىعىنان كوتەرىپ جاتىر. ودان جاستاۋ قوناق قولىن قالتاسىنا سالىپ تۇر. شاماسى, اقشا قىستىرعىسى كەلگەندەي. كىرەبەرىس دالىزدەگى «ىڭعايسىز» كورىنىس كىم-كىمنىڭ دە ماڭدايىنان تەر شىعارعانداي ەدى.
سوندا بۇل نە بولعانى؟ تەرەڭ پالساپاعا بارۋدىڭ كەرەگى جوق. بۇل ءبارىمىزدىڭ كوز الدىمىزداعى, كوپتەن كەلە جاتقان اششى شىندىق. وعان كوندىگىپ, ەتىمىز ۇيرەنىپ كەتكەن. سالەمدى بىلاي قويىپ, كەلىننىڭ قاباعىنا قاراعىشتايتىن داعدى باسىمدىق العانداي ەمەس پە, قازىر؟
سالەم سالۋدى «ەسكىلىكتىڭ سارقىنشاعى» دەگەن سىڭايدا جىلى جاۋىپ قويعانىمىز راس. ولاي بولسا, اجەپتاۋىر قىزمەتتەگى الگى كەلىن نەگە ءيىلىپ ىزەت قىلادى؟ دەمەك, ۋاقىت وزگەرگەنىمەن, ىشكى ادەت-عۇرىپ, ۇلتتىق دۇنيەتانىم ءبارىبىر ۇمىتىلمايدى. ادام بالاسىنىڭ ەڭ باستى قۋانىشى – ۇيلەنۋ تويى بەتاشارسىز ءوتىپ كوردى مە؟ ارينە, وتپەيدى!
ماسەلە بەتاشاردىڭ ءباتۋاسىن باعامداي بىلۋدە, قادىر-قاسيەتىن تۇسىرمەۋدە عوي. ەڭ قىمبات تىلەكتەرىمىز, ۇمىتتەرىمىز وسىندا ايتىلادى. سالەم سالۋ وسى تىلەكتەردى قابىل الدىم, ەل-جۇرتقا كىرىكتىم, اعايىنمەن تاعدىرلاسپىن دەگەندى بىلدىرەرى حاق. ۇلىق ۇعىمنىڭ تۇتقاسى – قايىنجۇرتتى عانا ەمەس, قالىڭ جۇرتتى سىيلاۋدا, ىرگەنى بەكەمدەۋدە. ءدال وسى تۇستا ەڭ باستى تاربيەشىگە اينالۋعا ءتيىستى اسابالار («تامادا» دەگەن كەلىڭكىرەيدى) قولىنداعى قارا دومبىرانىڭ قاسيەتىنەن تومەندەپ جاتاتىنىن, ونى ۋاعىز ءۇنى ەمەس, تابىس كوزىمەن بەزىلدەتەتىنىن بايقامايتىن سياقتى. كوپشىلىكتىڭ اعىل-تەگىل اقىلى دا اسپانعا ۇشىپ جاتادى. ويتكەنى, ول تەرەڭ تۇزدىقتالمايدى. وسىدان كەلىپ ءبىر مەزەتتىك سالەم پايدا بولادى. تويدان كەيىن ۇمىتىلادى.
ءار نارسەنىڭ ءجونى مەن جوسىعى بار دەگەننىڭ وزىندە, قۇت كەلىندەردىڭ سالەم سالعانىنىڭ نەسى ەرسى؟ الاشتىڭ اتا-انالارى, قادىرلى قۇدالار, بارشامىز ويلانىپ كورەيىك.
باقبەرگەن امالبەك,
«ەگەمەن قازاقستان».
اقمولا وبلىسى.
