ونلاين ءباسپاسوز كونفەرەنتسياسىنا جاستار جانە وتباسى ىستەرى كوميتەتىنىڭ توراعاسى شاحماردان بايمانوۆ, «جاس ۇلان» بىرىڭعاي بالالار مەن جاسوسپىرىمدەر ۇيىمىنىڭ باسشىسى دينارا سادۋاقاسوۆا, وڭىرلىك جاستار ۇيىمدارىنىڭ وكىلدەرى مەن ساراپشىلار قاتىستى.
سپيكەرلەر باق پەن ساراپشىلاردى ينتەرنەت-تاۋەلدىلىكتىڭ جانە جاستار مەن بالالار اراسىنداعى قۇمار ويىنداردىڭ الدىن الۋ سالاسىنداعى حالىقارالىق زاڭنامانى تالداۋ بويىنشا جۇرگىزىلىپ جاتقان جۇمىستار; كيبەربۋللينگتى, ونلاين-تاۋەلدىلىكتى جانە قۇمار ويىندارعا تاۋەلدىلىكتى انىقتاۋ ماقساتىندا فوكۋس-توپتاردىڭ كەزدەسۋلەرى, كيبەربۋللينگ فاكتىلەرىن انىقتاۋ, قۇمار ويىنداردى ناسيحاتتاۋ ءۇشىن ءاربىر ءوڭىر بويىنشا قۇرىلعان Telegram-ارنالاردىڭ جۇمىسى تۋرالى حاباردار ەتتى. جوبانى ىسكە اسىرۋ كەزەڭىندە 17 وڭىردەن 1 مىڭنان استام جاس ينتەرنەت-تاۋەلدىلىكتىڭ, كيبەربۋللينگتىڭ جانە قۇمار ويىندارعا تاۋەلدىلىكتىڭ الدىن الۋ بويىنشا وقۋدان ءوتتى.
جوبا قورىتىندىسى بويىنشا جاستار مەن بالالار اراسىندا ينتەرنەتكە تاۋەلدىلىكتىڭ, قۇمار ويىندار مەن كيبەربۋللينگتىڭ الدىن الۋ بويىنشا, ونىڭ ىشىندە وسى سالاداعى قازاقستاندىق زاڭنامانى جەتىلدىرۋ بويىنشا ناقتى ۇسىنىمدار ازىرلەي وتىرىپ, تالدامالىق بايانداما دايىنداۋ جوسپارلانۋدا. سونىمەن قاتار جوبا جاڭالىقتارىن «جاس ۇلان» ۇيىمىنىڭ Facebook – ReStart جانە Instagram – restart_social الەۋمەتتىك جەلىلەرىندەگى پاراقشالارىنان بىلۋگە بولادى. جوبا جاستاردى قولداۋدىڭ 2021-2025 جىلدارعا ارنالعان كەشەندى جوسپارى اياسىندا «ازاماتتىق باستامالاردى قولداۋ ورتالىعى» كەاق قولداۋىمەن جۇزەگە اسىرىلۋدا.
«ەگەمەن-اقپارات»
