ۆيتسە-مينيستر الدىمەن ەلدەگى مينەرالدى-شيكىزات بازاسىنىڭ بۇگىنگى جاعدايىمەن تانىستىردى. قازاقستاندا پايدالى قازبالاردىڭ مەملەكەتتىك بالانسىندا جالپى 8 مىڭنان اسا كەن ورىندارى تىركەلگەن, ونىڭ ىشىندە كومىرسۋتەك – 317 (مۇناي, گاز, كوندەنسات), قاتتى پايدالى قازبالار – 910, كەڭ تارالعان پايدالى قازبالار – 3 مىڭنان استام جانە 4 مىڭعا جۋىق جەراستى سۋلارىنىڭ كەن ورىندارى.
مۇنايدىڭ بالانستىق قورلارى (ا+ۆ+س1+س2 كاتەگوريالارى بويىنشا) 4,4 ملرد توننانى, گاز – 3,8 ترلن تەكشە مەتر (ەركىن+ەرىتىلگەن), كوندەنسات – 414 ملن توننانى قۇرايدى. ولاردىڭ باسىم بولىگى اتىراۋ (75%) جانە ماڭعىستاۋ (11%) وبلىستارىندا شوعىرلانعان. بۇل رەتتە, كومىرسۋتەك شيكىزاتىنىڭ 68% قورى 3 ءىرى كەن ورىندارىنىڭ, اتاپ ايتقاندا تەڭىز, قاشاعان جانە قاراشىعاناقتىڭ ۇلەسىنە كەلەدى.
ال قاتتى پايدالى قازبالاردىڭ قورىن ەسەپتەۋ مەتالل پايدالى قازبالاردىڭ 37 ءتۇرى جانە بەيمەتاللدىڭ 65 ءتۇرى بويىنشا جۇرگىزىلەدى. التىن كەن ورىندارىنىڭ نەگىزگى قورلارى شىعىس قازاقستان وبلىسىندا – 36%, اقمولا وبلىسىندا – 21%, قاراعاندى وبلىسىندا 11% شوعىرلانعان. مىستىڭ 82% قورى ەلىمىزدىڭ شىعىس جانە ورتالىق وڭىرلەرىندە شوعىرلانعان. 3 مىڭنان استام قورعاسىن-مىرىش كەن ورىندارى جانە كەناشىلىمدارى, نەگىزىنەن, ورتالىق, شىعىس جانە وڭتۇستىك قازاقستاندا شوعىرلانعان.
گەولوگيا سالاسىندا تاۋەلسىزدىك جىلدارىندا ەلدىڭ مينەرال-
دىق-شيكىزات كەشەنىنىڭ رەسۋرستىق بازاسىن دامىتۋدىڭ 2003-2010 جىلدارعا, 2010-2014 جىلدارعا ارنالعان سالالىق باعدارلامالارى ىسكە اسىرىلدى. 2016 جىلدان باستاپ نىسانالى ينديكاتورلار مينيسترلىكتىڭ ستراتەگيالىق جوسپارىنا ينتەگراتسيالاندى.
ال مينەرالدىق-شيكىزات كەشەنى الەمدىك نارىق تالاپتارىنا تولىق بەيىمدەلدى. مىڭنان استام كەن ورنى پايدالانۋعا بەرىلدى جانە قازىرگى ۋاقىتتا مەملەكەتكە تابىس اكەلىپ, حالىقتى جۇمىسپەن قامتاماسىز ەتىپ وتىر. بۇگىنگى كۇنى 1 630 وبەكتىسى جۇمىس ىستەپ تۇر.
قورشاعان ورتانى لاستايتىن اۆاريالىق مۇناي ۇڭعىمالارىن جويۋ ماقساتىندا 2010-2021 جىلداردا ەل اۋماعىندا زەرتتەۋلەر جۇرگىزىلدى. تەكسەرۋ بارىسىندا 132 اپاتتى مۇناي ۇڭعىماسى انىقتالىپ, ونىڭ 126-سى جويىلدى.
سونداي-اق رەسپۋبليكادا سيرەك كەزدەسەتىن مەتالداردى ءوندىرۋدى جانە وڭدەۋدى دامىتۋ ءۇشىن 2021 جىلى قۇپيالاندىرۋعا جاتاتىن مالىمەتتەردىڭ ۆەدومستۆولىق تىزبەلەرى قايتا بەكىتىلدى. تىزبەدەن ليتي, تسەزي, گاللي, تانتال-ءنيوبيدىڭ بالانستىق قورلارى تۋرالى مالىمەتتەر الىپ تاستالدى. بۇدان بىلاي بۇل اقپارات قۇپيا ەمەس.
«ەگەمەن-اقپارات»
