ماڭعىستاۋ وبلىسىنىڭ قوعامدىق كوممۋنيكاتسيا ورتالىعىنىڭ حابارلاۋىنشا, قازىرگى تاڭدا بولىنگەن قاراجاتتىڭ 50%-ى يگەرىلگەن, ياعني 5 275-كە جۋىق جەكە قوسالقى ءۇي شارۋا قوجالىقتارىنا 611,3 ملن تەڭگە جانە 500 شارۋا قوجالىعىنا 277,4 ملن تەڭگە قارجىلاي مەملەكەتتىك قولداۋ كورسەتىلدى. قالعان 1 ملرد تەڭگە قىركۇيەك ايىندا يگەرىلمەك.
بۇدان باسقا ءوڭىر شارۋالارىنا تاعى دا الداعى قازان-قاراشا ايلارىندا جەرگىلىكتى بيۋدجەتتەن 700 ملن تەڭگە ءبولۋ جوسپارلانعان. بۇل قاراجات اۋىل شارۋاشىلىعى ءمينيسترىنىڭ 2019 جىلعى 15 ناۋرىزداعى «اسىل تۇقىمدى مال شارۋاشىلىعىن دامىتۋدى, مال شارۋاشىلىعىنىڭ ونىمدىلىگىن جانە ءونىم ساپاسىن ارتتىرۋدى سۋبسيديالاۋ قاعيدالارىن بەكىتۋ تۋرالى» №108 بۇيرىعىنا سايكەس سۋبسيديا رەتىندە بەرىلمەك.
قۇزىرلى ورىنداردىڭ مالىمەتىنە سۇيەنسەك, قازىرگى ۋاقىتتا شارۋالاردى جەمشوپپەن قامتاماسىز ەتىپ, مال ازىعى تاپشىلىعىن جويۋ ماقساتىندا بىرقاتار جۇمىس جۇرگىزىلۋدە. مىسالى, جەرگىلىكتى بيۋدجەتتەن 150 ملن تەڭگە ءبولىنىپ, «كاسپي» اكك اق ارقىلى اتالعان قايتارىمدى قارجىعا 15 شىلدەدەن بەرى ءار قالا, اۋدانداردان تاعايىندالعان وپەراتورلار قاجەتتىلىككە قاراي ءشوپ تاسىمالداۋدا ەكەن. بۇگىنگە دەيىن 1 مىڭ تونناعا جۋىق ءشوپ ساتىپ الىنعان جانە بۇل جۇمىستار جىل اياعىنا دەيىن جالعاسپاق. سونداي-اق جەرگىلىكتى بيۋدجەتتەن 54 ملن تەڭگە ءبولىنىپ, قايتارىمدى قاراجاتقا اۋدانداردان تاعايىندالعان وپەراتورلار قوستاناي وبلىسىنان 546 توننا ارپا جەتكىزدى. قازىرگى تاڭدا ارپا تۇگەل ساتىلىپ, اينالىمداعى قارجىعا تاعى مال ازىعىن ساتىپ الۋ جۇمىستارى جاسالىپ جاتسا, 107 ملن تەڭگەگە 15 ۆاگون 3-4 سۇرىپتى بيداي (بيداي قالدىعى) ساتىپ الىنعان.
جالپى, جىل باسىنان بەرى وڭىرگە 30 مىڭ تونناسى وزگە ايماقتاردان, 4 مىڭ تونناسى جەرگىلىكتى جەردەن شابىلعان
37 500 توننا ءشوپ تاسىمالدانىپتى. ال 3500 توننا ءشوپ (140 ۆاگون) وزگە وڭىرلەردەن كومەك رەتىندە جەتكىزىلىپ, قۋاڭشىلىقتان زارداپ شەككەن مال يەلەرىنە تەگىن ۇلەستىرىلگەن. وڭىرگە وزگە وبلىستاردان 20 500 توننا جەم تاسىمالدانسا, جەرگىلىكتى جەردەن
1 500 توننا جەم وندىرىلگەن.
قوعامدىق كوممۋنيكاتسيا ورتالىعىندا وتكەن بريفينگتە ماڭعىستاۋ وبلىسى اۋىل شارۋاشىلىعى باسقارماسىنىڭ باسشىسى سەرىك قالدىعۇلدىڭ ايتۋىنشا, بۇگىندە وڭىردەگى شارۋا قوجالىقتارىندا 783 توننا ءشوپ پەن 5 020 توننا جەمنىڭ قورى بار. 2021-2022 جىلدارعا وڭىردەگى ءتورت ت ۇلىكتى قىستىق مال ازىعىمەن قامتاماسىز ەتۋ ماقساتىندا, پرەمەر-مينيستر ا.ءماميننىڭ تاپسىرماسىنا سايكەس, بيۋدجەتتەن قايتارىمدى قاراجات رەتىندە مال ازىعىنا 5,3 ملرد تەڭگە قارجى بولىنگەن, ونىڭ 1,9 ملرد تەڭگەسى شوپكە, 3,4 ملرد تەڭگەسى جەمگە جۇمسالماق. بۇل قارجىعا جىل سوڭىنا دەيىن 26 مىڭ توننا ءشوپ پەن 34 مىڭ توننا جەم ساتىپ الىنادى دەپ جوسپارلانۋدا.
قازىر اتالعان قارجىنىڭ 600 ملن تەڭگەسىنە مال ازىعىن تاسىمالدايتىن وپەراتورلار تاعايىندالىپ, وزگە وڭىرلەردەن ءشوپ تاسىمالداۋ جۇمىستارى باستالىپ كەتتى.
– ءار اۋداندا جەمشوپ ساقتايتىن بازا جاساقتاپ, قىسقا دايىندىقتى كۇشەيتۋ باعىتىندا جۇمىس اتقارىلۋدا. وسىعان وراي ءار اۋداننىڭ ورنالاسقان گەوگرافيالىق ايماعىنا بايلانىستى بازالار جاساقتاپ جاتىرمىز. ماسەلەن, ماڭعىستاۋ اۋدانىندا 4 بازا بولادى, تۇپقاراعان مەن قاراقيادا 3 بازادان بولماق. اۋىل, اۋدان اكىمدىكتەرى جۇمىسىن باستاپ كەتتى, – دەيدى سەرىك قالدىعۇل.
بۇدان بولەك اتىراۋ مەن اقتوبە وبلىستارىنىڭ شابىندىق جەرلەرىنەن ءشوپ شابۋعا 5 شارۋا قوجالىعى اتتاندى. ولار وزدەرىنە قور جيناپ, ارتىعىن وزگە مال يەلەرىنە ساتاتىن بولادى. سونداي-اق بۇگىنگى كۇنى جەرگىلىكتى شابىندىقتا 14 بريگادا ءشوپ شاۋىپ جاتىر. ولار جىل اياعىنا دەيىن 15 مىڭ توننا ءشوپ دايىنداماق.
ماڭعىستاۋدا بيىل مال باسىن امان الىپ قالۋ ماسەلەسى كۇن تارتىبىندە تۇر. قۇزىرلى ورىندار بەرگەن اقپارات بۇل باعىتتا اتقارىلىپ جاتقان جۇمىستاردى باياندايدى. «جاقسى ءسوز – جارىم ىرىس» دەگەندەي, جاقسىلىقتىڭ جاقىن بولۋى – كوپتىڭ جالعىز تىلەگى.
ماڭعىستاۋ وبلىسى
