وسىعان وراي ەلىمىز الەمنىڭ دامىعان ەلدەرىنىڭ ەليتالىق كلۋبىنا كىرۋى ءۇشىن ادامي كاپيتالدىڭ ءوسۋى مەن باسەكەگە قابىلەتتىلىگى بويىنشا بىرقاتار ماسەلەنى شەشۋ قاجەت. وسى رەتتە تەحنيكالىق جانە كاسىپتىك ءبىلىم بەرۋ جۇيەسىن الەۋمەتتىك جانە ەكونوميكالىق درايۆەردىڭ نەگىزى رەتىندە قاراستىرۋعا بولادى.
ارينە, بۇل باعىتتاعى وتاندىق تەحنيكالىق جانە كاسىپتىك ءبىلىم بەرۋ جۇيەسىندەگى كادرلار دايارلاۋدا ايتارلىقتاي جەتىستىكتەر دە بار. دەگەنمەن دە كادرلار دايارلاۋ جۇيەسىن حالىقارالىق تالاپتارمەن ۇندەستىرۋ ءۇشىن ءالى دە ءتيىستى جۇمىستار اتقارۋىمىز كەرەك, ونىڭ ىشىندە تسيفرلاندىرۋعا دا ايرىقشا نازار اۋدارۋ ماڭىزدى. مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىندا «تسيفرلاندىرۋ جوباسى اياسىندا 100 مىڭ بىلىكتى IT-مامانىن دايارلاۋ كەرەك جونىندە تاپسىرما بەرىلدى», دەپ تسيفرلاندىرۋدىڭ ەڭبەك نارىعىنداعى ءرولىن زەردەلەپ ايتتى.
تەحنيكالىق جانە كاسىپتىك ءبىلىم بەرۋ مەن وقىتۋدى جاڭعىرتۋ پروتسەسى تسيفرلى ەكونوميكا مەن تسيفرلى قوعامعا كوشۋدىڭ جاھاندىق پروتسەستەرىنەن دە تۋىنداۋدا. «جاس مامان» جوباسى اياسىندا «قوندىرعىلار پاركى» جاڭارتىلىپ جاتقان 180 كوللەدجدى جابدىقتاۋ ەڭبەك نارىعىنىڭ سۇرانىسىنا ساي, سونداي-اق اقپاراتتىق جۇيەلەرگە, اۆتوماتتاندىرۋعا جانە تسيفرلىققا باعىتتالۋدا. ويتكەنى الەمدىك ەكونوميكاداعى, قوعامداعى ۇزدىكسىز وزگەرىستەر جاعدايىندا كادرلار دايارلاۋ جۇيەسىن ۇنەمى جاڭعىرتىپ وتىرۋ قاجەت, ءداستۇرلى فورماتتار ەسكىرۋدە. ءوز كەزەگىندە ءوندىرىستىڭ ترانسفورماتسياسى كادرلاردىڭ كاسىبي داعدىلارىنىڭ وزەكتى بولۋىن, زاماناۋي قۇرىلعىلاردا جۇمىس ىستەي الۋىن ۇنەمى قاجەت ەتىپ تۇرادى.
«Talap» كوممەرتسيالىق ەمەس اكتسيونەرلىك قوعامى تاراپىنان دا ءتيىستى جۇمىستار جۇرگىزىلۋدە. كوللەدجدەرگە اكادەميالىق دەربەستىك بەرۋ ارقىلى ءبىلىم مازمۇنى ەڭبەك نارىعىنىڭ سۇرانىسىنا ساي وزگەرەتىنىن ەسكەرسەك, ءبىزدىڭ تاراپىمىزدان ءبىلىم باعدارلامالارىن رەەسترگە (ەلەكتروندى) ورنالاسۋى قاداعالانادى.
قاشىقتان وقىتۋ فورماتىنا كوشۋگە بايلانىستى تجكب پەداگوگتەرى كوپتەگەن قيىندىققا تاپ بولدى. سول سەبەپتى پەداگوگتەرگە IT-باعىت بويىنشا جاپپاي وقىتۋ ۇيىمداستىرىلدى, 30 مىڭعا جۋىق پەداگوگ بىلىكتىلىگىن ارتتىردى. قازىرگى تاڭدا كوللەدج پەداگوگتەرى ءبىزدىڭ سايت ارقىلى ونلاين رەجىمدە كۋرستان وتۋدە.
سونداي-اق Talap سايتىندا تجكب ماماندىقتارى بويىنشا بەينەساباقتار, ەلەكتروندى وقۋلىقتار مەن قوسىمشا ماتەريالدار بەرىلگەن. قازىرگى ۋاقىتتا كاتالوگتا 24 100 تسيفرلى رەسۋرس بويىنشا سىلتەمەلەر ۇسىنىلعان, ولاردىڭ ىشىندە: 13 757-ءسى – بەينەساباق, 4 005-ءى – ەلەكتروندى وقۋلىق, 6 338-ءى – قوسىمشا ماتەريالدار. ءبىزدىڭ سايتتان جۇكتەپ الۋعا بولادى. جۇمىسشى ماماندىعىنىڭ مارتەبەسىن ارتتىرۋ مەن دارىپتەۋگە باعىتتالعان WorldSkills Kazakhstan قوزعالىسىنىڭ اياسىنداعى چەمپيوناتتاردا دا IT-باعىتتاعى قۇزىرەتتىلىكتەر بويىنشا سايىستار وتكىزۋدەمىز. جالپى, كادر دايارلاۋدى جاقسارتۋ بويىنشا, ونىڭ ىشىندە IT قۇزىرەتتىلىكتەردىڭ دامۋى بويىنشا جۇمىستاردى جالعاستىرامىز.
ءابدىماناپ بەكتۇرعانوۆ,
«Talap» كوممەرتسيالىق ەمەس اكتسيونەرلىك قوعامى پرەزيدەنتى
