ءبىرىنشى كەزەكتە پرەزيدەنت ەڭ تومەنگى جالاقى مولشەرىن 60 مىڭ تەڭگەگە دەيىن كوتەرۋدى تاپسىردى. بۇل قادام تابىس دەڭگەيى تومەن ازاماتتاردىڭ ەكونوميكالىق بەلسەندىلىگىن ارتتىرادى, سونداي-اق ەلدىڭ ىشكى جالپى ءونىمىن 1,5%-عا ارتتىرادى. الايدا بۇل باستاما, ەڭ الدىمەن, وتانداستارىمىزدىڭ ءال-اۋقاتىن, ءومىر ءسۇرۋ دەڭگەيىن ارتتىرۋدى كوزدەيدى.
بيۋدجەتتىك ۇيىمداردىڭ قىزمەتكەرلەرى مەملەكەت باستاماشىلىق ەتكەن جالاقىنى ارتتىرۋ جونىندەگى شارالاردىڭ ىسكە اسىرىلۋىن ءبىرىنشى بولىپ سەزىنەدى. الايدا مەملەكەت باسشىسى اتاپ وتكەندەي, ەلىمىزدە شامامەن 6,5 ملن-عا جۋىق جالدامالى جۇمىسشى بار. ولاردىڭ جالاقىسىن ارتتىرۋ ءۇشىن مەملەكەت بيزنەسكە قاتىستى «جۇمساق» شارالاردى قولداناتىن بولادى. مۇنداي قادامدار جەكەلەگەن ازاماتتاردىڭ تابىسىن «كولەڭكەدەن» شىعارۋعا باعىتتالعان. سونداي-اق ميكرو جانە شاعىن بيزنەس ءۇشىن ەڭبەكاقى تولەۋ قورىنان بىرىڭعاي تولەم ەنگىزىلەدى. بۇل رەتتە, ونىڭ مولشەرى 34%-دان 25%-عا دەيىن تومەندەيدى. بۇل باستامانى ىسكە اسىرۋ ءۇشىن تولەم جۇيەسىن قۇرۋ كوزدەلىپ وتىر.
پرەزيدەنتتىڭ تاعى ءبىر ماڭىزدى باستاماسى – 600 مىڭ ازاماتتىق قىزمەتكەردىڭ جالاقىسىن ارتتىرۋى دەر ەدىم. ولاردىڭ جالاقىسىن 2022-2025 جىلدارى 20%-عا ۇلعايتۋ جوسپارلانىپ وتىر. مۇنداي باستامانى ىسكە اسىرۋ – اسا ماڭىزدى. سەبەبى بارلىق وتانداستارىمىز مەملەكەتتىك قىزمەتشىلەردىڭ جەڭىلدىكتەرىنە قول جەتكىزە المايدى, ءارى ولاردىڭ باسىم كوپشىلىگىنىڭ جالاقىسى نارىقتاعىدان تومەن.
ازاماتتاردىڭ بجزق-دا جيناعان ارتىق قاراجاتىن 2021 جىلى تۇرعىن ءۇي جاعدايىن جاقسارتۋ جانە ەمدەۋ ءۇشىن پايدالانۋ تاجىريبەسى بىرىڭعاي تۇرعىن ءۇي باعدارلاماسىن ازىرلەۋ, ءارى ونى ىسكە اسىرۋ قاجەتتىلىگىنە جەتەلەيدى. پرەزيدەنت بيىلعى جولداۋدا وسى ماسەلەگە قاتىستى ناقتى تاپسىرما بەردى.
جالپى, مەملەكەت باسشىسىنىڭ جولداۋىندا قازاقستاندىقتاردىڭ ءومىر ءسۇرۋ جاعدايىن جاقسارتۋعا باعىتتالعان ەلەۋلى الەۋمەتتىك پاكەت بار. سوندىقتان پاندەميا كەزىندەگى مەملەكەتتىك ساياساتتىڭ الەۋمەتتىك سيپاتىنىڭ ساباقتاستىعى قوعامداعى تۇراقتىلىققا جانە ەلدىڭ ساياسي, ەكونوميكالىق باعىتىن ساقتاۋعا ىقپال ەتەدى.
ەرمەك توقتاروۆ,
پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىنىڭ جەتەكشى عىلىمي قىزمەتكەرى
