ەلوردادا ىشكى ىستەر ءمينيسترى قالمۇحانبەت قاسىموۆتىڭ توراعالىق ەتۋىمەن ىشكى اسكەرلەردىڭ اسكەري كەڭەسى بولىپ ءوتتى. وعان پارلامەنت ءماجىلىسىنىڭ دەپۋتاتتارى, كۇش قۇرىلىمدارىنىڭ باسشىلارى, اسكەري قۇرامالار مەن بولىمدەردىڭ كومانديرلەرى قاتىستى.
ەلوردادا ىشكى ىستەر ءمينيسترى قالمۇحانبەت قاسىموۆتىڭ توراعالىق ەتۋىمەن ىشكى اسكەرلەردىڭ اسكەري كەڭەسى بولىپ ءوتتى. وعان پارلامەنت ءماجىلىسىنىڭ دەپۋتاتتارى, كۇش قۇرىلىمدارىنىڭ باسشىلارى, اسكەري قۇرامالار مەن بولىمدەردىڭ كومانديرلەرى قاتىستى.
كەڭەس وتىرىسىندا وفيتسەرلەر «قازاقستان-2050» ستراتەگياسىنا سايكەس ازىرلەنگەن 2014-2016 جىلدارعا ارنالعان ىشكى اسكەردى دامىتۋ باعدارلاماسىنىڭ نەگىزگى ەرەجەلەرىن تالقىلادى. بۇل جونىندە ءىىم ىشكى اسكەردىڭ باس قولباسشىسى رۋسلان جاقسىلىقوۆ بايانداپ بەردى. ونىڭ ايتۋىنشا, وتكەن جىلى اسكەرلەر ءۇش دەڭگەيلى جۇيەگە كوشىرىلدى, بۇل باسقارۋدىڭ تيىمدىلىگىن ارتتىرادى. بۇگىندە اسكەردىڭ الدىندا جاڭا مىندەتتەر تۇر. ەڭ باستىسى – ىشكى ىستەر مينيسترلىگىمەن جانە باسقا كۇش قۇرىلىمدارىمەن ءبىرتۇتاس اۆتوماتتاندىرىلعان «ماقسات» باسقارۋ جۇيەسىن دامىتۋ.
الداعى ۋاقىتتا ىشكى اسكەردى تەحنيكامەن جابدىقتاۋدى ارتتىرۋ جانە تىل جۇيەلەرىن جەتىلدىرۋدى قامتاماسىز ەتۋ ماسەلەلەرى دە كۇن تارتىبىنە قويىلىپ وتىر. اسىرەسە, جەكە قۇرامدى وقىتۋدى جاقسارتۋعا, اسكەريلەردى جەدەل ءىس-قيمىل جاساۋعا, سونداي-اق, ولاردى جۇمىلدىرۋ دايىندىقتارىنان وتكىزۋگە باسا نازار اۋدارىلىپ كەلەدى.
جاقىندا بارلىق وڭىرلەردەن كەلگەن وفيتسەرلەرگە نۇسقاۋ بەرۋ ساباقتارى وتكىزىلدى, ولاردان اسكەري, كومانديرلىك جانە كاسىبي لاۋازىمدىق قىزمەتتەرىنە دايىندىقتارى جونىندە سىناق الىندى. سونىمەن قاتار, جيىندا 2013 جىلى وتكىزىلگەن اسكەري قىزمەتتىڭ جانە اسكەري بايقاۋ-جارىستاردىڭ قورىتىندىسى شىعارىلدى.
ال مەملەكەت باسشىسى جولداۋىندا ىشكى ىستەر مينيسترىنە, ىشكى اسكەردىڭ قولباسشىلىعىنا كەزەكتى كەزەڭگە ارنالعان جاڭا مىندەتتەر جۇكتەدى. ايتا كەتەيىك, 2014 جىل ىشكى اسكەر ءۇشىن «پاتريوتيزم مەن كاسىبيلىك – ۇزدىك قىزمەتتىڭ نەگىزى» دەگەن ۇرانمەن وتەتىن بولادى.
ءاليسۇلتان قۇلانباي,
«ەگەمەن قازاقستان».
