جولداۋدا ايتىلعان ەكونوميكالىق دامۋدىڭ ماڭىزدى اسپەكتىلەرىنىڭ ءبىرى رەتىندە جالعاسىپ جاتقان COVID-19 پاندەمياسىنىڭ قيىن جاعدايىندا حالىق پەن بيزنەستى قولداۋ شارالارىن كەڭەيتۋ قاجەتتىلىگىن ايتۋعا بولادى.ولار 2022 جىلعا دەيىن ۇزارتىلىپ,
1 ترلن تەڭگە سوماسىندا وتە اۋقىمدى قارجىلاندىرۋدى قاراستىراتىن «قاراپايىم زاتتاردىڭ ەكونوميكاسى» مەن «بيزنەستىڭ جول كارتاسى» باعدارلامالار نەگىزىندە جۇزەگە اسادى. بىرنەشە جىلعا سوزىلعان جانە وتكەن جىلى ولاردىڭ ماسشتابىن ۇلعايتۋ ارقىلى ەكونوميكاعا جاقسى قولداۋ بولعان بۇل باعدارلامالار الداعى ۋاقىتتا دا مەملەكەتتىڭ كومەگىمەن ەكونوميكانىڭ نەگىزگى سەكتورلارىندا جۇمىسپەن قامتۋ جانە ءوندىرىستى ودان ءارى قولداۋعا نەگىز بولادى.
پرەزيدەنتتىڭ مەملەكەتتىك قارجىنى باسقارۋدىڭ تۇجىرىمداماسىن دايىنداۋ تۋرالى تاپسىرماسى ەرەكشە ماڭىزدى جانە ۋاقتىلى. سوڭعى جىلدارداعى داعدارىس قۇبىلىستارىمەن كۇرەس بارىسىندا, اتاپ ايتقاندا, 2020 جىلدىڭ اياعىندا, جاھاندىق داعدارىس پەن پاندەميامەن كۇردەلەندىرىلگەن كەزدە, مەملەكەتتىك قارجى سالاسىندا داعدارىسقا قارسى كۇرەس شارالارىنىڭ اۋقىمدى شىعىندارىنان تۋىنداعان كۇردەلى پروبلەمالار بايقالدى. ۇلتتىق قوردىڭ شىعىستارى وتە اۋقىمدى, ودان سوڭعى جىلدارى رەسپۋبليكالىق بيۋدجەتكە 3-4 تريلليون تەڭگە قارجى اۋدارىلدى, بيۋدجەت تاپشىلىعى مەن ونىمەن بايلانىستى قارىزدار كۇرت ءوستى, بۇل مەملەكەتتىك قارىز كولەمى مەن ونىڭ ءىجو-گە قاتىناسىنىڭ ايتارلىقتاي وسۋىنە اكەلدى. بۇل پروبلەمالاردى جاي قالدىرۋعا بولمايدى, ولار شۇعىل شەشىمدى تالاپ ەتەدى, سوندىقتان مەملەكەتتىك قارجىنى باسقارۋ تۇجىرىمداماسىن ازىرلەۋ وتە ماڭىزدى.
سونداي-اق پرەزيدەنت ەكونوميكالىق دامۋ سالاسىنداعى بىرقاتار سترا-
تەگيالىق مىندەتتەرگە دە نازار اۋداردى. اعىمداعى پروبلەمالار, ءتىپتى ەڭ وزەكتى پروبلەمالار (جولداۋدا ايتىلعان ينفلياتسيانىڭ ءوسۋى نەمەسە جەكەشەلەندىرۋ سياقتى) كۇن تارتىبىندەگى ۇزاق مەرزىمدى نەگىزگى مىندەتتەردى الماستىرماۋى ءتيىس. مەملەكەت باسشىسى ناقتى تاپسىرمالار بەرگەن مۇنداي مىندەتتەرگە كەشەندى شارالار ارقىلى كولىك-ەنەرگەتيكالىق ينفراقۇرىلىمدى دامىتۋدى جالعاستىرۋ, جاڭا بىرىڭعاي تۇرعىن ءۇي باعدارلاماسىن ازىرلەۋ, حالىقتىڭ ءومىر ءسۇرۋ دەڭگەيى مەن تابىسىنىڭ جيىنتىعى ارقىلى ارتتىرۋ, قازاقستاننىڭ تسيفرلىق سالاداعى الەۋەتىن ىسكە اسىرۋ كىرەدى.
وسىلايشا, جولداۋدىڭ ەكونوميكالىق بلوگى تەڭدەستىرىلگەن سيپاتتا, ول كۇردەلى سىرتقى جاعدايلارمەن قالىپتاساتىن اعىمداعى مىندەتتەرگە دە جاۋاپ بەرەدى جانە ەلدىڭ ۇزاق مەرزىمدى دامۋىنىڭ نەگىزگى ۆەكتورلارىن, سونداي-اق ولاردى ىسكە اسىرۋ باعىتتارى مەن ادىستەرىن انىقتايدى.
ۆياچەسلاۆ دودونوۆ,
پرەزيدەنت جانىنداعى قسزي
باس عىلىمي قىزمەتكەرى, ەكونوميكا عىلىمدارىنىڭ دوكتورى
