سۋومي ەلىندە سەرىك كەرىمبەك ۇلى كەرەمەت ونەر كورسەتتى. باستاپقى باسەكەسىندە يرلانديالىق دجوزەف فەنلوندى ساباعان ول شيرەك فينالدا ەۋروپا بىرىنشىلىگىنىڭ كۇمىس جانە جەرورتا تەڭىزى ويىندارىنىڭ قولا جۇلدەگەرى, يۋگوسلاۆيالىق سرەتەن ميركوۆيچتەن باسىم ءتۇستى. جارتىلاي فينالدا ماجارستاننىڭ مىقتىسى تيبور مولناردى جەڭگەن قازاق جىگىتى شەشۋشى سايىستا وليمپيا ويىندارى مەن الەم چەمپيوناتىنىڭ قولا جۇلدەگەرى, گفر-دىڭ وكىلى كارل-حاينتس كريۋگەرمەن كۇش سىناستى. نەمىس بوكسشىسىن قوناقباەۆ جاقسى بىلەدى. 1979 جىلى كەلندە وتكەن ەۋروپا بىرىنشىلىگىندە دە ەكەۋىنىڭ جولى قيىسقان ەدى. سول جەكپە-جەكتە قارسىلاسىن ءۇش مارتە نوكداۋنعا جىبەرگەن سەرىكتىڭ پايداسىنا شەشىلدى. بۇل جولى دا قانداسىمىزدىڭ مىقتىلىعى ەش كۇمان تۋعىزعان جوق. گەرمانيانىڭ ءدۇلد ۇلىن 5:0 ەسەبىمەن ۇتقان سەرىك قوناقباەۆ قاتارىنان ەكىنشى رەت ەۋروپا چەمپيونى اتاندى. جانە دە سول جىلدىڭ قورىتىندىسى بويىنشا داڭقتى جامبىل بوكس مەكتەبىنىڭ تۇلەگى الەمنىڭ ەڭ ۇزدىك بىلعارى قولعاپ شەبەرى دەپ تانىلدى.
قوناقباەۆتىڭ سپورتتىق عۇمىرىندا جارقىن جەڭىستەر از بولعان جوق. ول ەۋروپا بىرىنشىلىكتەرىندەگى تابىستارىنان بولەك, الەم كۋبوگىن ەكى رەت ولجالادى. الەم چەمپيوناتىنىڭ فينالىندا كۇش سىناستى. 1980 جىلى ماسكەۋدە الاۋى تۇتانعان وليمپيا ويىندارىندا كۇمىس مەدالدى موينىنا ءىلدى. فينالدا ول يتاليالىق پاتريتسيو وليۆادان ۇتىلدى. نەگىزى عالامدىق دودادا باس جۇلدە ءبىزدىڭ جىگىتكە بۇيىرۋعا ءتيىس ەدى. بىراق بۇل باسەكەنىڭ تاعدىرى ساياسي تۇرعىدان شەشىلگەنىن كوزى قاراقتى كورەرمەن جاقسى بىلەدى. سەبەبى يتاليانىڭ سپورت باسشىلارى ءوز ورەندەرىنە كەڭەس وداعىندا وتكەن وليمپياداعا قاتىسۋعا رۇقسات بەرمەدى. باسشىلاردىڭ سوزىنە قۇلاق اسپاعان پاتريتسيو ەشبىر كەدەرگىلەرگە قاراماستان ءتورت جىلدا ءبىر وتەتىن بايراقتى باسەكەدە باق سىناۋعا بەل بۋدى. تاۋەكەل دەدى دە, ءوز قاراجاتىمەن ماسكەۋگە كەلدى. مىنە, وسى جايتتىڭ بارلىعىن ەسكەرگەن جارىس قوجايىندارى الەمدىك قوعامداستىق الدىندا ۇپاي جيناۋ ماقساتىمەن كاپيتاليستىك ەلدەن كەلگەن سپورتشىنىڭ جەڭىسكە جەتۋىنە قولايلى جاعدايدىڭ بارلىعىن جاسادى.
تامپەرەدەگى ەۋروپا چەمپيوناتىندا جامبىلدىق سەرىك قوناقباەۆتان بولەك, كسرو قۇراماسى ساپىنداعى بوكسشىلار اراسىندا ماگاداندىق ۆيكتور رىباكوۆ (60 كيلو), كۋيبىشەۆتىك ۆاسيلي شيشوۆ (63,5 كيلو), ماسكەۋلىك الەكساندر كوشكين (71 كيلو), ەستونيالىق يۋري توربەك (75 كيلو), كوسترومالىق الەكساندر كرۋپين (81 كيلو) جانە ۋكراينالىق ۆيكتور ميروشنيچەنكو (54 كيلو) مەن الەكساندر ياگۋبكين (91 كيلو) توپ جاردى. ال قالعان سالماق دارەجەلەرىنىڭ باس جۇلدەسى بولگاريالىق يۆايلو مارينوۆ (48 كيلو) پەن پەتر لەسوۆقا (51 كيلو) جانە گەرمانيالىق ريحارد نوۆاكوۆسكي (57 كيلو) مەن يتاليالىق فرانچەسكو داميانيگە (+91 كيلو) بۇيىردى.
سۋومي ەلىندەگى سول جارىستا قازاقتىڭ تاعى ءبىر مىقتى بوكسشىسى باق سىنادى. ول – سەرىك نۇرقازوۆ. قاراعاندى بوكس مەكتەبىنىڭ تۇلەگى قولا مەدالدى يەلەندى. 57 كيلو سالماقتا سىنعا تۇسكەن قانداسىمىز يۋگوسلاۆيالىق دەيان ماروۆيچ پەن يرلانديالىق داميەن فيەرستەن باسىم تۇسكەنىمەن, جارتىلاي فينالدا گدر-دىڭ وكىلى ريحارد نوۆاكوۆسكيگە ەسە جىبەردى. شىنتۋايتىنا كەلگەندە, نۇرقازوۆ داڭقتى قارسىلاسىنان ەش قايمىقپاي, تەڭ دارەجەدە ايقاسقانىنا تامپەرەدەگى ءزاۋلىم سپورت كەشەنىنە جينالعان ءدۇيىم جۇرت كۋا. بۇل جەكپە-جەكتە تارازى باسى ۇزاق ۋاقىت تەڭسەلىپ تۇردى. باسەكە اياقتالعاننان سوڭ تورەشىلەر ءبىراز ويلانا-تولعانا كەلە, مونرەال وليمپياداسىنىڭ كۇمىس, ماسكەۋ وليمپياداسى مەن الەم چەمپيوناتىنىڭ قولا جۇلدەگەرى, ەۋروپا چەمپيونى دەگەن دارداي اتاقتارى بار نەمىس بوكسشىسىنىڭ قولىن كوتەردى. ەسەپ – 3:2. وسىلايشا, ريحارد فينالعا شىقسا, ءبىزدىڭ سەرىك قولا مەدالدى قاناعات تۇتتى.
