كوكشەتاۋدا ەلباسى نۇرسۇلتان نازارباەۆتىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى قازاقستان حالقىنا جولداۋىن تالقىلاۋعا ارنالعان وبلىستىق ءماجىلىس بولىپ ءوتتى.
كوكشەتاۋدا ەلباسى نۇرسۇلتان نازارباەۆتىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى قازاقستان حالقىنا جولداۋىن تالقىلاۋعا ارنالعان وبلىستىق ءماجىلىس بولىپ ءوتتى.
ونىڭ جۇمىسىنا وبلىستىق ءماسليحاتتىڭ دەپۋتاتتارى, قالالار مەن اۋدانداردىڭ اكىمدەرى, ءماسليحات حاتشىلارى, «نۇر وتان» پارتياسى اۋداندىق فيليالدارى توراعالارىنىڭ ورىنباسارلارى, وبلىستىق مەكەمەلەردىڭ, جوعارى وقۋ ورىندارىنىڭ باسشىلارى, بيزنەس وكىلدەرى, ۇكىمەتتىك ەمەس ۇيىمدار مەن ەتنومادەني بىرلەستىكتەردىڭ جەتەكشىلەرى, جۋرناليستەر قاتىستى.
– قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازارباەۆتىڭ قازاقستان حالقىنا ارناعان بيىلعى جولداۋى – تاريحي ماڭىزى زور جانە جارقىن بولاشاققا ارنالعان باستى مەملەكەتتىك باعدارلاما, –دەپ اتاپ كورسەتتى اقمولا وبلىسىنىڭ اكىمى قوسمان ايتمۇحامەتوۆ. – ەلباسى قالىپتاسقان مەملەكەتىمىزدىڭ الدىنا 2050 جىلعا دەيىن الەمدەگى ايرىقشا دامىعان وتىز مەملەكەتپەن تەرەزەسى تەڭ تىرشىلىك كەشۋىمىزدى مىندەتتەدى. «ماڭگىلىك ەلدىڭ» باستى مۇراتى دا وسى. بۇل بارشا قازاقستاندىقتار سياقتى, ءبىزدىڭ جەرلەستەرىمىزگە جىگەر-قۋاتى مول جاۋاپكەرشىلىك جۇكتەيدى ءارى كەلەشەگىمىزدىڭ كەمەلدىگىنە ءشۇبا كەلتىرمەيدى. ويتكەنى, ونىڭ ۇزاقمەرزىمدى جانە الداعى جەتى بەسجىلدىققا كەستەلەنگەن باسىمدىقتارى وتانداستارىمىزدى ايقىن مىندەت, ابىرويلى جولعا باستايدى.
وبلىس ەكونوميكاسىنداعى جاڭا باعىتتار مەن سەرپىندى دامۋ ورتاق ماقساتتاعى ۇلەسىمىزدىڭ سالماقتىلىعىن ايقىندايدى. الدىن الا ەسەپتەر بويىنشا, 2013 جىلى 938 ميلليارد تەڭگەنىڭ جالپى ءونىمى ءوندىرىلىپ, بەلگىلەنگەن مەجە 105,9 پايىزعا ورىندالدى. مۇنى اۋىل شارۋاشىلىعىنداعى (135,7 پايىز), ساۋدا (118,7) جانە كولىك تاسىمالىنداعى (107) جوعارى تابىستارمەن بايلانىستىرامىز. ايتكەنمەن, ەلباسى تاپسىرمالارىن ورىنداۋ ءۇشىن قارقىندى ەسەلەي ءتۇسۋدىڭ قوسىمشا شارالارى قاراستىرىلىپ, رەزەرۆتەر مەن قارجىنىڭ ءتيىمدى جۇمسالۋى قاتاڭ باقىلاۋدا ۇستالادى.
بيىل ەل ەكونوميكاسىن يندۋستريالاندىرۋدىڭ ءبىرىنشى بەسجىلدىعى اياقتالىپ, يندۋستريالىق-يننوۆاتسيالىق دامۋدىڭ ەكىنشى كەزەڭىنە قۋاتتى نەگىز قالانادى. باعدارلاما قولعا الىنعاننان باستاپ وڭىردە 102 ميلليارد تەڭگەنىڭ 39 نىسانى ىسكە قوسىلىپ, 4,5 مىڭنان استام تۇراقتى جۇمىس ورىندارى قۇرىلدى. ال 2014 جىلى 115,8 ميلليارد تەڭگەگە باعالانعان 11 جوبانى جۇزەگە اسىرۋ جوسپارلانىپ وتىر. مۇندا ەكسپورتتىق باعىتتاعى كاسىپورىندار قۇرىلىسىنا ەرەكشە نازار اۋدارىلادى. بۇل ورايدا, 2013 جىلى شيكىزاتقا جاتپايتىن ەكسپورتتىق تاۋارلار اۋقىمى 50 پايىزعا جەتىپ, رەسپۋبليكالىق ورتاشا كورسەتكىشتەن 2 ەسە اسىپ تۇسكەنى اتاپ ءوتىلدى. بىراق, الەمدىك رىنوكتاعى ۋران مەن التىنعا قاتىستى جاعدايدىڭ وزگەرۋى جاڭا ەكسپورتتىق پوزيتسيالارعا باسىمدىق بەرۋدى تالاپ ەتۋدە. بايانداماشى بۇل رەتتە ازىقتىق, سۋسىن جانە حيميا ونىمدەرىنىڭ كولەمىن ارتتىرۋ قاجەتتىگىن ايتتى.
اتقارىلار مىندەتتەردىڭ اۋقىمدىلىعىن ەسكە سالعان وبلىس اكىمى بارلىق دەڭگەيدەگى اكىمدەرگە, كاسىپورىندار مەن شارۋاشىلىق باسشىلارىنا, قوعامدىق بىرلەستىكتەرگە جەتى باعىتتان تۇراتىن نەگىزگى مىندەتتەردى سارالاپ كورسەتتى. بايانداما «ءبىزدىڭ پارىزىمىز – «مانگىلىك ەل» يدەياسىن ۇستانىپ, ءبىلىم مەن عىلىمدى, مادەنيەت پەن ونەردى, دەنساۋلىق ساقتاۋ مەن سالاماتتى ءومىر سالتىن دامىتا وتىرىپ, باسەكەگە قابىلەتتى ۇلتقا اينالۋ», دەگەن جىگەرلى ەكپىنمەن اياقتالدى.
بايانداما بويىنشا قىزۋ تالقىلاۋ ءجۇرىپ, وعان پارلامەنت سەناتىنىڭ دەپۋتاتى جابال ەرعاليەۆ, «رودينا» اگروفيرماسى» جشس باس ديرەكتورى, قازاقستاننىڭ ەڭبەك ەرى يۆان ساۋەر, «داستارحان» جشس ديرەكتورى, وبلىستىق ءماسليحاتتىڭ دەپۋتاتى ەلەنا ماششينسكايا, «نوۆوپەك» جشس-ءنىڭ ديرەكتورى بوريس پيسارەۆ جانە باسقالار قاتىستى.
باقبەرگەن امالبەك,
«ەگەمەن قازاقستان».
اقمولا وبلىسى.
