الەم • 31 تامىز، 2021

تۇرىك ازاماتشاسى: اتاجۇرتتاعى باۋىرلارىمنىڭ قولىنا تىكەن باتسا، مەن ونىڭ اۋىرتپالىعىن سەزىنەمىن

تۇرىك ازاماتشاسى كىرىككالەدەگى ۇيىنە قازاقستان تۋىپ ءىلىپ، جامبىلداعى جاعدايعا بايلانىستى كوڭىل ءبىلدىردى، دەپ جازادى Egemen.kz.

اسەل سارقىت

29 تامىز قازاقستاندا ۇلتتىق ازا تۇتۋ كۇنى بولىپ جاريالانعانى بەلگىلى. وسى كۇنگە وراي كىرىككالە قالاسىنىڭ تۇرعىنى قازاقستان تۋىن ءۇيىنىڭ بالكونىنا ءىلىپ قويعان.

«قازاقستاندا بولعان جارىلىس سالدارىنان شەيىت بولعان جاۋىنگەرلەر مەن قازاق باۋىرلارىمىزدىڭ قازاسىنا قاتتى قايعىردىم. اللا تاعالا ولاردىڭ وتباسىلارىنا سابىر بەرگەي. قازاقستان – مەنىڭ اتا جۇرتىم، تۇركى الەمىنىڭ جارقىراعان جۇلدىزى، بارشامىزدىڭ قارا شاڭىراعىمىز. ەگەر اتاجۇرتىمدا مەنىڭ ءبىر باۋىرىمنىڭ قولىنا تىكەن باتسا، مەن ونىڭ اۋىرتپالىعىن سەزىنەمىن. جارالىلار تەز ساۋىعىپ كەتسىن، اللا اتاجۇرتىمىزدى قورعاسىن. پرەزيدەنت قاسىم-جومارت توقاەۆ پەن ەلباسىمىز نۇرسۇلتان ءابىش ۇلىنا جانە بارلىق قازاق باۋىرلارىما سالەمىمدى جولدايمىن. ولاردىڭ اۋىرتپالىعىن جۇرەگىممەن بولىسەمىن. ول جەرگە بارىپ، قولداۋ كورسەتە المايتىندىقتان، ءوز ءۇيىمنىڭ بالكونىنا اتا جۇرتىمنىڭ كوك تۋى مەن ءوز ەلىمنىڭ اي مەن جۇلدىزدى تۋىن ءىلىپ، سىزدەرمەن بىرگە ەكەنىمدى بىلدىرگىم كەلدى»، دەدى فاتما سونمەز.

فاتما - دەنساۋلىق ساقتاۋ سالاسىنىڭ قىزمەتكەرى. 27 جىل بويى قازاقستان-تۇركيا قارىم-قاتىناسىنىڭ دامۋىنا ءوزىنىڭ جەكە جوبالارىمەن ەرىكتى تۇردە ۇلەس قوسىپ كەلەدى. ول تۇركىستان قالاسىنداعى دەنساۋلىق ساقتاۋ سالاسىندا دا ءوز ەڭبەگىن سىڭىرگەن جانە تاريحي-مادەني ورىنداردى تۇرىك تىلىندە ناسيحاتتاۋعا دا بەلسەنە ۇلەس قوسىپ جۇرگەن بىردەن-ءبىر جاناشىر جانداردىڭ ءبىرى.

فاتما سونمەز تۇركىستان قالاسىنىڭ قۇرمەتتى ازاماتى اتانىپ، قازاقستان تاراپىنان بىرنەشە مەدال جانە سىيلىقتارمەن ماراپاتتالعان.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز