Polisia.kz
22 تامىزدا جامبىل وبلىسىنىڭ جەدەل-ىزدەستىرۋ ءىس-شارالارى بارىسىندا ۆاز-21015 ماركالى اۆتوكولىك نازارعا ىلىككەن. ونى ءتىنتۋ ءۇشىن «چەرنىش» اتتى قىزمەتتىك يت قولدانىلدى. ناتيجەسىندە 49 جانە 35 جاستاعى ەكى جولاۋشىدان ەكى پوليەتيلەن قاپقا سالىنعان, جالپى سالماعى 12,5 كەلىدەن اساتىن «كەپتىرىلگەن ماريحۋانا» ەسىرتكى تاركىلەندى.
«ۇستالعاندار كىناسىن مويىنداپ, شۋ قالاسىنىڭ ۋاقىتشا ۇستاۋ يزولياتورىنا قامالدى. قر قىلمىستىق كودەكسىنىڭ 296-بابىنىڭ 4-بولىگى («اسا ءىرى مولشەردە ەسىرتكى قۇرالدارىن زاڭسىز ساقتاۋ») بويىنشا سوتقا دەيىنگى تەرگەۋ امالدارى باستالدى. اتالعان قىلمىستى جاساعانى ءۇشىن ءۇش جىلدان جەتى جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان», دەدى جامبىل وبلىسىنىڭ پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ باستىعى اسقار جۇمابەكوۆ.
