ەكى جاقتى كەزدەسۋ بارىسىندا سەربيا پرەزيدەنتى قازاقستاندىق ديپلوماتتى قىزمەتكە تاعايىندالۋىمەن قۇتتىقتاپ, ەكى ەل اراسىنداعى قارىم-قاتىناستىڭ جوعارى دەڭگەيىن اتاپ ءوتتى.
پرەزيدەنت الەكساندر ۆۋچيچ بەلگراد پەن نۇر-سۇلتان اراسىنداعى ءداستۇرلى دوستىق بايلانىستاردى ودان ءارى نىعايتۋعا نيەت ءبىلدىردى. ءمادي اتامقۇلوۆ ءوز كەزەگىندە قازاقستان مەن سەربيا اراسىنداعى ىنتىماقتاستىقتىڭ ماڭىزدىلىعىنا توقتالىپ ءوتتى.
قوس تاراپ ساياسي, ەكونوميكالىق جانە مادەني-گۋمانيتارلىق سالالارداعى ءوزارا ءىس-قيمىلدىڭ جوعارى الەۋەتىن ىسكە اسىرۋ قاجەتتىلىگى تۋرالى ورتاق پىكىرگە كەلدى. بۇل رەتتە اعىمداعى جىلى جوسپارلانعان ءىس-شارالار ەكى ماڭىزدى وقيعا – قازاقستان مەن سەربيا اراسىنداعى ديپلوماتيالىق قاتىناستاردىڭ ورناعانىنا 25-جىلدىعى جانە قازاقستان رەسپۋبليكاسى تاۋەلسىزدىگىنىڭ 30-جىلدىعى اياسىندا وتەدى.
كەزدەسۋدى قورىتىندىلاي كەلە, الەكساندر ۆۋچيچ ەلشىگە تابىستى جانە جەمىستى جۇمىس تىلەپ, قازاقستان پرەزيدەنتى قاسىم-جومارت توقاەۆ پەن قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆقا ىزگى تىلەكتەرىن جولدادى.
