قازاقستان • 24 تامىز، 2021

ەڭبەك بيرجاسىندا 10 مىڭنان استام بوس جۇمىس ورنى بار

بۇگىنگى كۇنى، ياعني 24 تامىزدا ە-ەڭبەك بيرجاسىندا نۇر-سۇلتان قالاسى بويىنشا 10 503 بوس جۇمىس ورنى بار، ەلوردادا جۇمىس ىزدەۋشىلەر 5 مىڭنان استام تۇيىندەمە جىبەردى، دەپ جازادى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.

جانبولات كەنجەعۇل

جۇمىس بەرۋشىلەر كۇزەتشىلەر مەن ءۇي-جايلاردى جيناۋشىلار ءۇشىن 42500 تەڭگەدەن باستاپ، اۆياتسيا ينسپەكتورلارى مەن IT-جوبالار مەنەدجەرلەرى ءۇشىن 600 مىڭ تەڭگەگە دەيىن جالاقى ۇسىنادى.

ەلەكتروندىق ەڭبەك بيرجاسىندا ءسىز تۇراقتى جۇمىس تۋرالى 3 مىڭنان استام جارنامانى تابا الاسىز، شامامەن 600 – ۋاقىتشا، 14 – ماۋسىمدىق جانە 8 – قاشىقتان.

بۇگىندە ەلوردادا سۇرانىسقا يە ماماندىقتار تىزىمىنە: مەديتسينالىق بيكە/اعا، تاربيەشى، تاربيەشىنىڭ كومەكشىسى، ساتۋ جونىندەگى مەنەدجەر، كۇزەتشى، جۇك ءاۆتوموبيلىنىڭ جۇرگىزۋشىسى، ماشينيست، اس ءۇي جۇمىسشىسى، ساتۋشى، اسپاز، سلەسار-جوندەۋشى، بۋحگالتەر، توكار، اۆتوموبيل جۇرگىزۋشىسى، اكىمشى جانە ت.ب. كىرەدى.

ءۇش جىل بۇرىن ديپلوم العان جوو تۇلەكتەرى العان ماماندىعى بويىنشا باستاپقى تاجىريبە الۋ ءۇشىن جاستار پراكتيكاسىنان وتە الادى. ۇزاقتىعى – التى ايدان اسپايدى. اي سايىنعى جالاقى 25 اەك قۇرايدى. Enbek.kz سايتىندا «جاستار تاجىريبەسى» ساناتىندا 300 بوس جۇمىس ورنى ۇسىنىلدى.

«قوعامدىق جۇمىستار» باعىتى بويىنشا 138 بوس جۇمىس ورنى بار. بۇل جۇمىس ورىندارى الدىن الا كاسىبي دايىندىقتى قاجەت ەتپەيدى. ەلوردانىڭ حالىقتى جۇمىسپەن قامتۋ ورتالىعى قالا تۇرعىندارىن ۋاقىتشا جۇمىسپەن قامتاماسىز ەتۋ ءۇشىن الەۋمەتتىك پايدالى باعىتتاعى قوعامدىق جۇمىستاردى ۇسىنادى. ۇزاقتىعى: 12 ايدان اسپايدى، جالاقىسى كەمىندە 2 ەتج (ەڭ تومەنگى جالاقى) مولشەرىندە (جالاقى – 85 000 تەڭگە، قولعا – 73 100 تەڭگە).

جۇمىسقا ورنالاستىرۋ بويىنشا سايتتا تاعى 20 بوس جۇمىس ورنىن «الەۋمەتتىك جۇمىس ورىندارى» باعىتى ارقىلى تابۋعا بولادى. ولاردى جۇمىس بەرۋشى تابىسى از جانە كوپبالالى وتباسىلاردىڭ مۇشەلەرىن، مۇگەدەك بالالاردى تاربيەلەپ وتىرعان ادامداردى جانە حالىقتىڭ الەۋمەتتىك وسال توپتارى قاتارىنداعى باسقا دا ادامداردى جۇمىسقا ورنالاستىرۋ ءۇشىن ولاردىڭ جالاقىسىن سۋبسيديالاي وتىرىپ قۇرادى. ۇزاقتىعى: 12 ايدان اسپايدى. اي سايىنعى سۋبسيديا مولشەرى بەلگىلەنگەن جالاقى مولشەرىنىڭ 35%-ىن قۇرايدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز