ءيا, 2000 جىلى سيدنەيدە الاۋى تۇتانعان عالامدىق دودادا قازاقتىڭ ءتورت بىردەي ورەنى اقتىق سىنعا دەيىن القىنباي جەتكەن ەدى. اتاپ ايتساق, قارسىلاستارىن قوعاداي جاپىرعان بەكزات ساتتارحانوۆ پەن ەرماحان ىبىرايىموۆ التىن تۇعىرعا كوتەرىلسە, بولات ءجۇمادىلوۆ پەن مۇحتارحان دىلدابەكوۆ كۇمىس مەدال يەلەندى. تىپتەن جۇلدەسىز قالعان نۇرجان كارىمجانوۆ, دانيار مۇڭايتپاسوۆ جانە ولجاس ورازالينوۆكە دە وكپە ايتقان ەشكىم بولمادى. سەبەبى ولار دا اۋستراليا تورىندە ەش ايانباي ايقاسىپ, شيرەك فينالعا شىققان ەدى.
– تۇرسىنعالي اعا, تاياۋدا اياقتالعان توكيو وليمپياداسىن باسىنان اياعىنا دەيىن تاماشالاعان بولارسىز. نەبارى ەكى قولا مەدالدى ەنشىلەگەن بوكسشىلاردىڭ ونەرىنە ءدۇيىم جۇرتتىڭ كوڭىلى تولمادى. ءسىز دە جىگىتتەرىمىزدىڭ جىگەرسىزدىگىنە قىنجىلعان شىعارسىز؟
– بۇل جولى ادەتتەگىدەي ءتورت جىل ەمەس, بەس جىل بويى تاعاتسىزدانا كۇتكەن وليمپيا ويىندارىندا ءبىزدىڭ بوكسشىلار ءدال وسىلاي سۇرەڭسىز ونەر كورسەتەدى دەپ ەشكىم دە ويلاعان جوق. تەك ءبىز عانا ەمەس, شەتەلدىكتەردىڭ وزدەرى دە اڭ-تاڭ. قازىرگى كەزدە قازاقستان بوكسىن دامىتۋ ءۇشىن مەملەكەت تاراپىنان قىرۋار قارجىنىڭ جۇمسالىپ جاتقانى بەلگىلى. وسى سالانىڭ باسى-قاسىندا جۇرگەن اۋقاتتى ازاماتتار دا اقشانى اياپ جاتقان جوق. ءبىر سوزبەن ايتساق, بوكسشىلاردىڭ ەش الاڭسىز دايارلانۋىنا قولايلى جاعدايدىڭ بارلىعى جاسالعان. بىراق سپورتتىڭ بۇل تۇرىندە ىلگەرىلەۋ بايقالمايدى. كەرىسىنشە, كەرى كەتىپ بارا جاتقاندايمىز. قازاقستان سەكىلدى بوكس ونەرىندە باي ءداستۇرى بار ىرگەلى مەملەكەت ءۇشىن قوس قولا دەگەنىڭىز تىم ناشار كورسەتكىش. سوعان قالاي كۇيىنبەيسىڭ؟! كەزىندە بىزدە مۇنداي جاعدايدىڭ ءبىرى دە بولمادى. ايتەۋىر, اركىمگە الاقان جايعانداي بولىپ, قارىز سۇراپ, ءوز جىرتىعىمىزدى ءوزىمىز جاماپ جۇردىك. سوعان قاراماستان زور بەلەستەردى باعىندىردىق. ءسوز ورايى كەلگەندە ۇزاق جىلدار بويى وتاندىق بوكسىمىزدى ورگە سۇيرەگەن ىسكەر باسشى بەكەت ماحمۇتوۆتىڭ ەرەن ەڭبەگىن ەرەكشە اتاپ وتكىم كەلەدى.
– وسى سالانىڭ بىلىكتى مامانى رەتىندە توكيو وليمپيادا-
سىندا ءبىزدىڭ بوكسشىلارعا نە جەتپەدى دەپ ويلايسىز؟
– ءاربىر جارىستىڭ ناتيجەسى ءۇشىن ەڭ ءبىرىنشى كەزەكتە ۇلتتىق قۇراما باپكەرلەرى جاۋاپ بەرۋگە ءتيىس. نەگىزى بۇل سۇراقتى سولارعا جولداعانىڭىز ءجون. ال مەنىڭ جەكە پىكىرىمدى بىلگىڭىز كەلسە, دايىندىق جۇمىسىن جۇرگىزۋ بارىسىندا كوپتەگەن كەمشىلىك كەتكەنىن ايتار ەدىم. بىرىنشىدەن, مەنىڭ ءبىر بايقاعانىم, وقۋ-جاتتىعۋ جيىندارى تىم ءجيى وتكىزىلدى. ونىڭ قاجەتى بار ما, جوق پا, وعان ءمان بەرگەن ەشكىم بولعان جوق. سول سانى كوپ, ساپاسى از جيىندار سپورتشىلاردى قاتتى قاجىتتى. ماسەلەن, جىل باسىنان بەرى ۇلتتىق قۇراما مۇشەلەرى كۋبا مەن اقش-تا, ودان كەيىن رەسەيدىڭ كيسلوۆودسك قالاسىندا دايارلاندى. اينالايىندار-اۋ, وسىدان بىرنەشە جىل بۇرىن الماتىنىڭ ءدال ىرگەسىندە كەرەمەت وليمپيادالىق بازا سالىندى عوي. ول جەردىڭ تابيعاتى كەرمەت, اۋاسى ساف تازا. ايبا-نىڭ بازاسىندا ەش الاڭسىز جاتتىعۋ ءۇشىن بارلىق جاعداي بار. اندا-مىندا ساندالا بەرگەنشە, سول جەردە نەگە دايارلانا بەرمەسكە؟ ەكىنشىدەن, وليمپيا ويىندارىنىڭ باستالۋىنا ەكى ايدان كەم ۋاقىت قالعاندا ەلىمىزدىڭ ءبىرىنشى ءنومىرلى بوكسشىلارىن ازيا چەمپيوناتىنا قاتىستىردىق. ونىڭ نە قاجەتى بولعانىن ءالى دە تۇسىنە الماي وتىرمىن. دۋباي جاقىن جەر ەمەس. ونىڭ ۇستىنە ول كەزدەرى پارسى شىعاناعىندا كۇن كۇيىپ تۇردى. وسى جاعداي ەسكەرىلمەدى. قۇرلىقتىق دەڭگەيدەگى دوداعا قوسالقى قۇرامداعى جىگىتتەردى اپارسا دا, ەشتەڭەدەن ۇتىلمايتىنىمىز انىق. ال نەگىزگى كۇشىمىزدى وليمپيا ويىندارىنا ساقتاۋ كەرەك ەدى.
جالپى, دۋبايداعى ساتسىزدىك ءبىزدىڭ جىگىتتەرگە پسيحولوگيالىق تۇرعىدان اۋىر سوققى بولدى. ازيادان التىنسىز قايتقان جەرلەستەرىمىز وليمپيادادا دا تۇك تىندىرا المادى. بوكسشىلاردىڭ توكيوعا شارشاپ-شالدىققان كۇيى كەلگەنى بىردەن بايقالدى. شىنى كەرەك, شارشى الاڭدا ەشقايسىسى كوسىلىپ ونەر كورسەتە المادى. ولاردىڭ قيمىل-ارەكەتتەرىنە قاراپ, ءدال ءبىر ەلىشىلىك جارىستاردا كۇش سىناسىپ جۇرگەندەي اسەردە بولدىق.
– «وليمپياداعا شارشاپ كەلدى» دەپ ناقتى كىمدەردى مەڭزەپ تۇرسىز؟
– كوماندا مۇشەلەرىنىڭ دەنى ءدال سونداي كۇيدە بولدى. ماسەلەن, 81 كيلو سالماقتاعى بەكزات نۇرداۋلەتوۆتى الايىق. 2019 جىلعى الەم چەمپيوناتىندا ونىڭ قالاي جۇدىرىقتاسقانىن كوردىڭىزدەر. ءار جەكپە-جەككە جۇلقىنىپ شىعىپ, بارلىق قارسىلاسىن سىپىرا ۇتتى. تىپتەن كۋبانىڭ داڭقتى بوكسشىسى حۋليو سەزار دە لا كرۋستىڭ ءوزىن ەسەڭگىرەتىپ تاستادى. بيىل سانكت-پەتەربۋرگتە وتكەن «گۋبەرناتور كۋبوگى» جولىنداعى جارىستا دا تاماشا بابىندا بولدى. فينالدا رينگ قوجايىنى يمام حاتاەۆتى جەڭدى. باسەكە بارىسىندا قارسىلاسىن نوكداۋنعا جىبەردى. بىراق وليمپيادادا ءبىز مۇلدە باسقا بەكزاتتى كوردىك. ەڭ وكىنىشتىسى, توكيودا ول ءدال سول حاتاەۆقا ەسە جىبەردى. باسەكە بارىسىندا قانداسىمىزدىڭ بويىنان جەڭىسكە دەگەن زور قۇلشىنىستى بايقامادىق. بۇل جەردە قورىتىندى بىرەۋ عانا – وليمپيادانىڭ التىن تۇعىرىنا كوتەرىلۋگە ءتيىس بوكسشىنى ءبىز ەڭ ماڭىزدى جارىسقا ابدەن شارشاتىپ اكەلدىك.
69 كيلو سالماقتاعى ابىلايحان ءجۇسىپوۆتىڭ دە كۇش-قۋاتى كەمىگەن, جانارىندا وت جوق. وسىدان ەكى جىل بۇرىن ەكاتەرينبۋرگتە وتكەن الەم چەمپيوناتىنىڭ جارتىلاي فينالىندا ول رەسەيلىك اندرەي زامكوۆويمەن وتە جاقسى جۇدىرىقتاستى. تىپتەن جەڭىستى ءبىزدىڭ جىگىتكە دە بەرۋگە بولاتىن ەدى. ال وليمپيادانىڭ تۇساۋكەسەر كەزدەسۋىندە ءجۇسىپوۆ ەسىمى كوپشىلىككە بەيمالىم امەريكالىق دەلانتە دجونسوننان ويسىراي ۇتىلدى.
– سوندا ءسىز ازيا چەمپيو-
ناتىنا بۇل بوكسشىلاردى بەكەر قوستىق دەپ وتىرسىز عوي؟ بارلىق گاپ وسىندا عانا ما؟
– ءدال سولاي. وزدەرىڭىزگە ءمالىم, دۋبايداعى جارىستىڭ كوماندالىق ەسەبىندە كوش باستاۋدى كوزدەگەن وزبەكستان مەن قازاقستان قۇرامالارى ءبىر-بىرىمەن ابدەن «قىرقىستى». ارادا ەكى اي وتكەن سوڭ وليمپيا ويىندارىندا ەكى جاق تا وڭباي وپىق جەدى. ريو-دە-جانەيروداعى جارىستا ءۇش التىن, ەكى كۇمىس جانە ەكى قولانى ولجالاپ, ايدى اسپانعا ءبىر-اق شىعارعان وزبەكتەر توكيودا جالقى التىندى قاناعات تۇتتى. بۇعان دەيىن عالامدىق ويىنداردان باس جۇلدەسىز ورالماعان قازاقتارعا بۇل جولى قوس قولانى قاناعات تۇتۋعا تۋرا كەلدى. بىزگە كەرەگى وسى ما ەدى؟ نەگىزى بۇل اڭگىمە قازاقستان مەن وزبەكستانعا عانا قاتىستى ەمەس. سارى قۇرلىقتان بارعان كوماندالاردىڭ بارلىعى دا وليمپيادادا وتە ناشار ونەر كورسەتتى.
ءسوزىمىز دالەلدى بولۋ ءۇشىن مىنا ءبىر دەرەكتى العا تارتايىق: ايتۋلى جارىستا باسەكەلەر سەگىز سالماق دارەجەسى بويىنشا وربىگەنىمەن, سونىڭ تەك بىرەۋىندە عانا ازيانىڭ وكىلى التىن تۇعىرعا كوتەرىلدى. ول – اسا اۋىر سالماقتا ايقاسقان وزبەكستاندىق باحودير جالولوۆ. فيليپپيندىك كارلو پاالام (52 كيلو) كۇمىس السا, ونىڭ وتانداسى ەۋمير مارسيال (75 كيلو), جاپونيالىق رەمەي تاناكا (52 كيلو) جانە ءبىزدىڭ ساكەن بيبوسىنوۆ (52 كيلو) پەن قامشىبەك قوڭقاباەۆ (+91 كيلو) قولا مەدالدى مويىندارىنا ءىلدى. بايقاپ قاراساڭىزدار, ساراپقا سالىنعان 32 جۇلدەنىڭ التاۋى عانا ازيالىقتارعا بۇيىرعان ەكەن. بۇل – وتە ناشار كورسەتكىش! سالىستىرمالى تۇردە الساق, 2016 جىلعى وليمپيا ويىندارىندا ولار 12 (4 التىن+4 كۇمىس+5 قولا) جۇلدە الدى. ال 2012 جىلى لوندوندا سارى قۇرلىقتىڭ سايىپقىراندارى 11 مارتە (3 التىن+4 كۇمىس+4 قولا) ولجا سالدى.
– ريو وليمپياداسىندا تورەشىلەر ۆاسيلي لەۆيتكە كوپە-كورنەۋ قيانات جاساپ, ونى التىننان ايىردى. جەرلەسىمىز توكيوعا 91 كيلو سالماقتىڭ باستى فاۆوريتتەرىنىڭ ءبىرى رەتىندە اتتاندى. بىراق العاشقى كەزدەسۋىندە ول ويدا-جوقتا يسپانيالىق ەمانۋەل رەيەستەن نوكاۋتپەن ۇتىلدى. اسا جاۋاپتى جارىستا جانكۇيەرلەر لەۆيت ءدال وسىلاي جەڭىلەدى دەپ مۇلدە كۇتپەگەن ەدى...
– ءيا, ۆاسيانىڭ ريو-دە-جانەيرودا ناعىز بابىندا بولعانى راس. فينالدا وعان قيانات جاسالعانىن دا كوزىمىز كوردى. بىراق ودان بەرى بەس جىل ءوتتى عوي. ءيا, بۇرىندارى جيعان مول تاجىريبەسىنىڭ ارقاسىندا لەۆيت كەيىننەن دە ءبىراز بەلەستى باعىندىردى. الايدا 2019 جىلى تاشكەنتتە وتكەن ازيا چەمپيوناتىندا ول وڭتۇستىك كورەيانىڭ ورتاڭقول بوكسشىسىنان وڭباي ۇتىلدى. سول جەكپە-جەكتە نوكاۋت العاننان كەيىن-اق ءۆاسيليدىڭ شاما-شارقى بەلگىلى بولدى. وسى جايتتىڭ بارلىعىن سارالاي وتىرىپ, توكيودا ونىڭ مەدال المايتىنىن ءىشىم سەزدى. بىراق ساقا سپورتشى ءدال وسىلاي ويسىراي ۇتىلادى دەپ ەش ويلامادىم. مەنىڭشە, ارداگەردىڭ ورنىنا باسقا ءبىر جالىنداپ تۇرعان جاستى اپارۋ كەرەك ەدى.
– قازاق جانكۇيەرلەرى 75 كيلو سالماق دارەجەسىندە كۇش سىناسقان ءابىلحان امانقۇل دا «الىسقا باراتىن شىعار» دەپ ۇمىتتەندى. تالاي بايراقتى باسەكەدە ەل نامىسىن ابىرويمەن قورعاعان بوكسشىعا توكيو تورىندە نە جەتپەدى؟
– جارىستى ءابىلحان تەحنيكالىق تا, تاكتيكالىق تۇرعىدان دا جاقسى باستاعان ەدى. العاشقى كەزدەسۋىندە وزبەكستاننىڭ مىقتىسى فانات قاھارمونوۆتى قاپى قالدىردى. بىراق ودان كەيىن ەبەرت كونسەيسان سوۋزاعا ءالى جەتپەدى. شىنى كەرەك, بۇل جەكپە-جەكتە برازيليالىق جىگىت بارلىق جاعىنان باسىم بولدى. ءدال سول بوكسشىنىڭ ونەرىنە تورتكۇل دۇنيە جۇرتشىلىعى تامساندى دەپ ويلايمىن. ول ءبىزدىڭ ءابىلحان امانقۇلدان بولەك, رەسەيدىڭ ماقتانىشى گلەب باكشيدەن باسىم ءتۇستى. بۇل باسەكەلەردىڭ ەكەۋىندە دە سوۋزا كۇمانسىز جەڭىسكە جەتتى. ال فينالداعى جەكپە-جەگى تىپتەن كەرەمەت بولدى. كۇنشىعىس ەلىنە التىن الامىن دەپ نىق سەنىممەن كەلگەن ۋكراينالىق الەكساندر حيجنياكتى ەسىنەن تاندىردى. ال شەشۋشى تۇستا سوۋزاعا جول بەرگەن بوكسشىلاردىڭ ەكەۋىنىڭ دە الەم چەمپيونى دەگەن دارداي اتاقتارى بار.
– قازاق «بىتكەن ىسكە سىنشى كوپ» دەپ بەكەر ايتپاعان عوي. تورتجىلدىقتىڭ باستى دوداسى اياقتالعاننان كەيىن «امانقۇلدىڭ ورنىنا تۇرسىنباي قۇلاحمەتتى نەمەسە ءجۇسىپوۆتىڭ ورنىنا اسلانبەك شىمبەرگەنوۆتى اپارۋ كەرەك ەدى» دەگەن سىڭايدا اڭگىمەلەر ءوربىدى. ءسىزدىڭ ويىڭىز قانداي؟
– بۇگىنگى تاڭدا 75 كيلو سالماقتا ءابىلحاننىڭ الدىن ورايتىن ەشكىم جوق. ول تۇرسىنبايدان الدەقايدا كۇشتى. مەنىڭ بۇل پىكىرىممەن مامانداردىڭ دەنى كەلىسەدى دەپ ويلايمىن. ال ابىلايحاننىڭ ورنىنا اسلانبەكتى اپارۋعا بولار ەدى. بۇل رەتتە ۇلتتىق قۇراما باپكەرلەرى 2018 جىلعى قازاقستان چەمپيوناتىنىڭ قورىتىندىسىنا سۇيەندى. اقتاۋدا وتكەن جارىستا ءجۇسىپوۆتىڭ شىمبەرگەنوۆتى نوكداۋنعا جىبەرگەنى ەسىمىزدە. وسى ورايدا, مىنا ءبىر جايت ەسكەرىلۋگە ءتيىس ەدى: جامبىل وبلىسىنىڭ وكىلى دۇنيەجۇزىلىك بوكس سەرياسى جارىسىندا (WSB) «استانا ارلاندارىنىڭ» نامىسىن ابىرويمەن قورعاپ, اسا ماڭىزدى جەكپە-جەكتەردە جەڭىسكە جەتتى. ءسويتىپ, اسلانبەك دۇرىستاپ دەمالىپ, تىنىعىپ, ءوز-وزىنە كەلمەگەن كۇيى ەل بىرىنشىلىگىنە قاتىستىرىلدى. ول جارىسقا قاراعاندىلىق ورەن تىڭ كەلدى. ناتيجەسىندە, ابىلايحان جەڭىسكە جەتىپ, ەلىمىزدىڭ ءبىرىنشى ءنومىرلى بوكسشىسى اتاندى.
«شاۋ تارتىپ» قالعان زاكىر ءسافيۋلليندى باسقا بوكسشىلارمەن الماستىرعان ءجون ەدى. 63 كيلو سالماق دارەجەسىندە ودان بولەك ءساناتالى تولتاەۆ پەن ەرتۋعان زەينۋللينوۆ بار. ءيا, «ولار توكيوعا بارعاندا مىندەتتى تۇردە جۇلدە الاتىن ەدى» دەپ ەشكىم كەسىپ ايتا المايدى. الايدا جاستىڭ اتى جاس قوي. زاكىرگە قاراعاندا ولار الدەقايدا باتىل قيمىلداپ, جەڭىستى قارسىلاسىنىڭ ۋىسىنان ج ۇلىپ الۋ ءۇشىن جانىن سالىپ ايقاساتىن ەدى. وكىنىشكە قاراي, ارداگەر بوكسشىنىڭ بويىنان ونداي ەرىك-جىگەر بايقالمادى. شيرەك فينالدا سافيۋللين سول كۇنگە دەيىن ەسىمىن ەشكىم ەستىمەگەن اۋستراليالىق بوكسشىعا ەسە جىبەردى.
– جاپونيا استاناسىندا قازاق بوكسشىلارىنىڭ جەڭىپ العان قوس قولا مەدالىن كوڭىلگە مەدەت تۇتۋعا تۋرا كەلدى. الايدا كۇللى الاش جۇرتى جارتىلاي فينالعا دەيىن سۇرىنبەي جەتكەن ساكەن بيبوسىنوۆ پەن قامشىبەك قونقاباەۆ التىن السا دەپ ارمانداعان ەدى...
– ءسوز جوق, 52 كيلو سالماقتا سايىسقا تۇسكەن ساكەن ءدال وسىنداي قارقىن كورسەتەدى دەپ ەشكىم كۇتپەدى. جاپون جەرىندە ول ءوزىن كەرەمەت قىرىنان كورسەتتى. تىپتەن جەرلەسىمىز جارتىلاي فينالدا «جەڭىلدى» دەپ ايتۋعا اۋىز بارمايدى. بيبوسىنوۆ ۇلىبريتانيالىق گالال يافايمەن جاقسى جۇدىرىقتاستى. تەك ءبىرىنشى راۋندتا تورەشى بەلگىلەگەن نوكداۋن باسەكە تاعدىرىن شەشتى. ءيا, ودان كەيىن ساكەن بىرتە-بىرتە «ويىن» تىزگىنىن قولعا الدى. بىراق جەڭىسكە جەتۋ ءۇشىن بۇل جەتكىلىكسىز بولدى.
اسا اۋىر سالماقتاعى 22 جاستاعى اقش بوكسشىسى ريچارد توررەز جىلدامىراق قيمىلداپ, ۇنەمى قارسىلاسىنىڭ الدىن وراۋعا تىرىستى. تاۋەكەلگە دە ءجيى باردى. العاشىندا قوڭقاباەۆ ونىڭ بۇل ىرقىنا كونبەدى. بىراق باسەكە بەل ورتادان اۋعاندا 30 جاستاعى قامشىبەكتىڭ قارقىنى ءبىراز باسەڭدەپ قالدى. اياعىمەن از قيمىلداي باستادى. سونداي ساتتەردىڭ بىرىندە ريچاردتىڭ جۇدىرىعى ءبىزدىڭ جىگىتكە وڭباي ءتيدى. سوققىنىڭ اۋىر بولعانىن دەر كەزىندە اڭعارعان تورەشى جەكپە-جەكتى توقتاتتى. بۇل دۇرىس شەشىم دەپ ويلايمىن. جالپى, الدىڭعى جىلعى الەم چەمپيوناتىمەن سالىستىرعاندا توررەزدىڭ قاتتى وسكەنى بايقالدى. ەكاتەرينبۋرگتەگى جارىستىڭ شيرەك فينالىندا وزبەكستاندىق باحودير جالولوۆتان اۋىر نوكاۋت العاننان كەيىن دارىگەرلەر ونى زەمبىلگە سالىپ الىپ كەتكەنى ەسىمىزدە. ال بۇل جولى امەريكالىق «ولىسپەي بەرىسپەيمىن» دەگەن كەيىپ تانىتىپ, اقتىق سىنعا دەيىن القىنباي جەتتى. تىپتەن فينالدا جالولوۆتىڭ جۇيكەسىن ءبىراز توزدىرعانىن دا كوزىمىز كوردى.
– قازىرگى كەزدە «ۇلتتىق كوماندا ساپىنا كاسىپقوي بوكسشىلاردى دا تارتۋ كەرەك» دەگەن اڭگىمەلەر دە ارا-تۇرا ايتىلىپ ءجۇر. وسى ماسەلەگە بايلانىستى ءوز كوزقاراسىڭىزدى بىلدىرسەڭىز.
– ەگەر ولار ۇلتتىق قۇراما مۇشەلەرىمەن تاجىريبە ءبولىسىپ, كومەكتەسۋ ءۇشىن كەلسە, بۇل – قۇپتارلىق ءىس. ال ەل نامىسى سىنعا تۇسەتىن بايراقتى باسەكەلەردە كاسىپقويلارعا ءۇمىت ارتۋدىڭ ەش قاجەتى جوق. ونىڭ وزىندىك سەبەبى بار. بىرىنشىدەن, جوعارىداعىداي قادامعا بارۋ ارقىلى ماسەلە تۇبەگەيلى شەشىلمەيدى. كاسىپقويلارعا ارقا سۇيەگەننەن گورى, ءوزىمىز ارەكەت ەتۋمىز كەرەك. قازىرگى كەزدە رەسپۋبليكامىزدىڭ ءار قيىرىندا كوپتەگەن سپورت مەكتەبى مەن مامانداندىرىلعان ينتەرناتتار بار. سول جەرلەردە مىڭداعان جاس جەتكىنشەك جاتتىعىپ, تالاي باپكەر ەڭبەك ەتىپ ءجۇر. سولاردىڭ اراسىنان دارىندى جاستاردى ىزدەپ تاۋىپ, ولاردى جاقسىلاپ تۇرىپ باپتاپ, دۇرىس باعىت بەرۋىمىز كەرەك. ولاي ەتپەسەك, جوعارىدا ايتىلعان مەكتەپتەر مەن ينتەرناتتاردى مەملەكەتتىڭ ەسەبىنەن قارجىلاندىرۋدىڭ نە قاجەتى بار؟ وندا ول مەكەمەلەردى جابا سالايىق! ەكىنشىدەن, ەسكى جۇيەدەن ارىلۋ قاجەت. ول ءۇشىن جاسوسپىرىمدەر مەن جاستار بۋىنىنان باستاپ, ۇلتتىق قۇراماداعى دايىندىق پروتسەسىن وڭتايلاندىرۋعا ءتيىسپىز. جۇمىس ناتيجەلى بولۋ ءۇشىن جاڭاشىل كوزقاراس, جاڭا بۋىن, جاڭا لەپ قاجەت. ۇشىنشىدەن, ۇلكەن ارەنادا وزدەرىن مويىنداتىپ ۇلگەرگەن كاسىپقويلاردىڭ اۋەسقويلار اراسىندا كۇش سىناسۋعا كەلىسە قويۋى ەكىتالاي. ويتكەنى ولاردىڭ ءوز جوسپارلارى مەن العا قويعان ماقساتتارى بار. ال ول جاقتا كوپتىڭ ءبىرى بولىپ, ءىلىنىپ-سالىنىپ جۇرگەندەردىڭ بىزگە ەش قاجەتى جوق. تورتىنشىدەن, كاسىپقوي مەن اۋەسقوي بوكس اراسىندا ايىرماشىلىق وتە كوپ. تىپتەن ەكەۋىن ەكى ءتۇرلى سپورت دەسەك تە بولادى. ەكى جاقتا دا جۇدىرىقتاسىپ جۇرگەن جىگىتتەر ونى جاقسى بىلەدى. تىپتەن مىقتى دەگەن كاسىپقوي بوكسشىنىڭ ءوزى اۋەسقوي رينگتە ءوزىن تۇبەگەيلى مويىنداتا الماۋى مۇمكىن. مەنىڭ ايتار ءۋاجىم وسى.
– اڭگىمەڭىزگە راحمەت.
اڭگىمەلەسكەن
عالىم سۇلەيمەن,
«Egemen Qazaqstan»
الماتى
