فوتو: getty images
توكيودا وتەتىن پاراليمپيادانىڭ اشىلۋ سالتاناتىندا اۋعانستاننىڭ تۋىن كوتەرىپ, سول ەلدىڭ جارىسقا قاتىسا المايتىن سپورتشىلارىنا قولداۋ بىلدىرەدى. بۇل تۋرالى دۇيسەنبىدە جاپونيا استاناسىندا وتكەن ءباسپاسوز كونفەرەنتسياسىندا حالىقارالىق پاراليمپيادا كوميتەتىنىڭ باسشىسى ەندريۋ پارسونس مالىمدەدى.
«اۋعانستاننىڭ تۋى پاراليمپيادانىڭ اشىلۋ سالتاناتىندا شەرۋگە قاتىسادى. ونى الىپ ءجۇرۋ ءۇشىن بۇۇ بوسقىندار ءىسى جونىندەگى جوعارعى كوميسسارىنىڭ وكىلىن شاقىردىق. سوندىقتان ءبىز ىنتىماعىمىزدى كورسەتكىمىز كەلەدى. ولار وليمپياداعا قاتىسۋى كەرەك ەدى, بىراق, وكىنىشكە قاراي, بۇل مۇمكىن بولمادى», دەدى ول.
پاراليمپياداعا اۋعانستاننان ەكى سپورتشى قاتىسۋى كەرەك ەدى. ولاردىڭ اراسىندا زاكيا حۋدادادي بار, ول پاراليمپياداعا اۋعانستان اتىنان قاتىسقان ءبىرىنشى ايەل بولدى. ۇلتتىق قۇراما توكيوعا 17 تامىزدا كەلۋى كەرەك ەدى. الايدا, اۋعانستانداعى جاعدايعا بايلانىستى ولاردى جاپونياعا جەتكىزۋدىڭ قاۋىپسىز جولى بولماي تۇر.
«تاليبان» قوزعالىسىنىڭ سودىرلارى 15 تامىزدا كابۋلعا ۇرىسسىز كىردى جانە بىرنەشە ساعات ىشىندە اۋعانستان استاناسىن تولىق باقىلاۋعا الدى. اۋعانستان پرەزيدەنتى اشراف عاني قانتوگىستى بولدىرماۋ ءۇشىن ەلدەن كەتكەنىن ايتتى. بىرقاتار ەلدەر ازاماتتارى مەن ەلشىلىك قىزمەتكەرلەرىن ەۆاكۋاتسيالاپ جاتىر.
توكيوداعى پاراليمپيادا ويىندارى 24 تامىز بەن 5 قىركۇيەك ارالىعىندا وتەدى.
