قازاقستاننىڭ تۇڭعىش پرەزيدەنتى بەلگىلى جازۋشى, سىنشى, تەلەجۋرناليست, قازاقستاننىڭ ەڭبەك سىڭىرگەن قايراتكەرى سۇلتان ءورازاليننىڭ دۇنيەدەن وتۋىنە بايلانىستى اۋىر قايعىعا ورتاقتاسىپ, كوڭىل ايتتى.
«سۇلتان ءشارىپ ۇلى بۇكىل سانالى عۇمىرىن ادەبيەت پەن مادەنيەتكە, اسىرەسە قازاق تەلەۆيزياسى مەن راديوسىنىڭ وركەندەۋىنە ارنادى. سونىمەن قاتار ەگەمەندىك جىلدارى بىرقاتار جاۋاپتى مەملەكەتتىك قىزمەتتەردى دە ابىرويمەن اتقارىپ, قالامگەرلىك پەن قايراتكەرلىكتىڭ تىزگىنىن تەڭ ۇستاعان تالانتتى تۇلعا, مايتالمان مامان بولاتىن. ونىڭ قوعامداعى كوكەيكەستى ماسەلەلەردى ارقاۋ ەتىپ, الەۋمەتتىك استارىن اشا بىلگەن ايشىقتى اۆتورلىق باعدارلامالارى مەن ادەبي-مادەني حابارلارى, تانىمدىق تەلەقويىلىمدارى, مازمۇندى كىتاپتارى قاشاندا ءوز قۇندىلىعىن جوعالتپاسى انىق», دەلىنگەن جەدەلحاتتا.
ەلباسى شەبەر ۇيىمداستىرۋشى, سۇڭعىلا سۇحباتشى رەتىندە كوپشىلىكتىڭ ىقىلاسىنا بولەنگەن ابزال ازاماتتىڭ عيبراتتى عۇمىرى مەن جارقىن بەينەسى جۇرتشىلىق جادىندا ءاردايىم ساقتالاتىنىنا سەنىم ءبىلدىردى.
