رەسمي اقپارات بويىنشا قازىر وڭىردە قاتتى تۇرمىستىق قالدىققا (قتق) ارنالعان 130 ورىن (جەر اكتىلەرى بار) قاراستىرىلعان, ونىڭ ىشىندە ءتيىستى رۇقساتى بار 24 پوليگون جۇمىس ىستەپ تۇر.
بۇگىندە اقمولا وبلىسىنىڭ 10 اۋدانىندا زاڭداستىرىلعان پوليگون ءالى كۇنگە دەيىن جوق. ونىڭ سالدارى زاڭسىز قوقىس توگەتىن ورىنداردىڭ كوبەيۋىنە اكەلىپ سوعۋدا. ماسەلەن, بيىل عارىشتان جۇرگىزىلگەن مونيتورينگكە سايكەس ارقا وڭىرىندە 624 بەيبەرەكەت قوقىس ورىندارى انىقتالىپ, 361 زاڭسىز پوليگون جويىلدى.
بۇدان بولەك, وڭىردە وندىرىستىك جانە تۇرمىستىق قالدىقتاردى سۇرىپتاپ, قايتا وڭدەۋگە ارنالعان ينفراقۇرىلىم قاراستىرىلماعان. وبلىستا قاتتى تۇرمىستىق قالدىقتى جيناۋمەن 4 كاسىپورىن اينالىسادى. بىلتىر مۇندا قتق-تىڭ جالپى كولەمى 243 مىڭ توننانى قۇراسا, بيىلعى 6 ايدا ونىڭ كورسەتكىشى – 124 تىڭ توننا. بۇل رەتتە قايتا وڭدەۋدىڭ ۇلەسى نەبارى 3%-دى عانا قۇرايتىنىن ايتا كەتكەن ورىندى.
وسى وزەكتى ماسەلەنى شەشۋ ءۇشىن وڭىردەگى اتقارۋشى بيلىككە بەلگىلەنگەن تارتىپكە ساي قتق-تىڭ بارلىق پوليگونىن راسىمدەۋ جۇمىسىن جانداندىرۋعا, پوليگونداردى تالاپقا ساي ورنالاستىرۋعا, سونداي-اق اۋداندىق ەلدى مەكەندەردە قالدىقتى ۋاقىتشا ساقتاۋ الاڭدارىن ۇيىمداستىرۋعا جانە حالىقتى قالدىقتاردى فراكتسيالار بويىنشا سۇرىپتاۋعا ىنتالاندىرۋ ءۇشىن قايتالاما شيكىزاتتى ساتىپ الۋ پۋنكتتەرىن بەلگىلەۋگە كەڭەس بەرىلدى.
سونىمەن قاتار زاڭسىز قوقىس ورىندارىن ازايتۋ ءۇشىن جەرگىلىكتى پوليتسيا قىزمەتىمەن بىرلەسىپ جۇمىستى كۇشەيتكەن دۇرىس دەيدى ەكولوگتەر.
جاۋاپتى ۆەدومستۆونىڭ مالىمەتىنە سەنسەك, قازىر وڭىردە بەيبەرەكەت قوقىس ۇيىندىلەرى ازايماي تۇر. جىل سايىن وتكىزىلەتىن سانيتارلىق اباتتاندىرۋ شارالارىنا قاراماستان, ءتيىستى باقىلاۋدىڭ السىزدىگى مەن پوليگوندارداعى كوممۋنالدىق قالدىقتى رەتتەۋ جولعا قويىلماعان سوڭ ەلدى مەكەندەر ماڭىندا زاڭسىز قوقىس ورىندارى قاپتاي بەرەدى.
