وبلىستىق ءبىلىم باسقارماسى باسشىسىنىڭ ورىنباسارى ءجاميلا بەكباتىروۆانىڭ ايتۋىنشا, جاڭا وقۋ جىلىندا وڭىردەگى 442 مەكتەپكە 240 مىڭنان اسا وقۋشى بارادى. ءبىرىنشى سىنىپقا بولجاممەن 22 مىڭ 327 وقۋشى كەلەدى دەپ كۇتىلۋدە. مەكتەپ مۇعالىمدەرىنىڭ 98,6 پايىزى كوروناۆيرۋسقا قارسى ەكپە سالدىرعان. سونىمەن قاتار ءبىلىم باسقارماسىنىڭ وكىلى جاڭا وقۋ جىلىنا وقۋلىقتار مەن وقۋ-ادىستەمەلىك كەشەندەردى جانە قوسىمشا وقۋ قۇرالدارىن ساتىپ الۋ ءۇشىن 3,1 ملرد تەڭگە بولىنگەنىن دە ايتتى.
«جاڭا وقۋ جىلىندا وقۋشىلار وقۋلىقتارمەن 100 پايىز قامتاماسىز ەتىلەدى دەپ جوسپارلانۋدا. بۇگىندە وقۋلىقتاردى باسپادان تاسىمالداۋ جۇمىستارى جۇرگىزىلۋدە. ال وبلىس مەكتەپتەرى وقۋ ۇدەرىسىندە پايدالاناتىن جۇمىس قالپىنداعى 52 مىڭ 797 دانا كومپيۋتەرمەن جابدىقتالعان», دەيدى ج.بەكباتىروۆا.
بۇل اقپاراتقا قاراپ وڭىردەگى ءبىلىم وشاقتارىنىڭ جاڭا وقۋ جىلىنا دايىندىعى جاقسى ەكەنىن كورۋگە بولادى. الايدا ايماقتا اپاتتى جانە ءۇش اۋىسىمدى مەكتەپتەردىڭ ماسەلەسى ءالى كۇنگە دەيىن وزەكتى بولىپ وتىر. جىل سايىن جۇمىس جۇرگىزىلگەنىمەن, وڭىردەگى بۇل ماسەلە تولىق شەشىلگەن جوق.
جالپى, وبلىستا قازىرگى كەزدە 3 اپاتتى, 6 ءۇش اۋىسىمدى جانە 6 ورىن تاپشىلىعى بار مەكتەپتەر بار. اتالعان مەكتەپتەر تاراز قالاسى مەن قورداي, شۋ اۋداندارىندا ورنالاسقان. دەگەنمەن بيىل وڭىردە 10 جاڭا ءبىلىم وشاعى پايدالانۋعا بەرىلەدى دەپ جوسپارلانىپتى. Oنىڭ ىشىندە قۇرىلىس ەسەبىنەن 8, جەكەمەنشىك مەكتەپتەر اشۋ ەسەبىنەن 2 مەكتەپ بار. الايدا وڭىردە مەكتەپ سالۋ, مەكتەپتەردى كۇردەلى جوندەۋدەن وتكىزۋ ماسەلەسىنە كەلگەندە جاۋاپتى مەكەمەلەر سىننىڭ استىندا قالىپ وتىر. بىرقاتار ءبىلىم وشاعىندا جۇمىس باياۋ. وبلىس اكىمى بەردىبەك ساپارباەۆ تا جۋىردا وبلىستىق ءبىلىم باسقارماسىنىڭ باسشىلىعىن سىنعا العان بولاتىن. ماسەلەن, قورداي اۋدانى, كۇنباتىس اۋىلىنداعى اپاتتى مەكتەپتىڭ ورنىنا سالىنىپ جاتقان 150 ورىندىق مەكتەپتىڭ قۇرىلىسىنا قاتىستى ماسەلە كوتەرىلگەن. جۇمىستى باياۋ جۇرگىزىپ كەلە جاتقان مەردىگەر كومپانيانىڭ اتالعان نىساندى جاڭا وقۋ جىلىنا دەيىن تاپسىرا الماۋى مۇمكىن ەكەنى ايتىلعان. دەگەنمەن ولار قىركۇيەك ايىنا دەيىن تاپسىراتىنىن ايتىپ, سەندىرۋدە. مۇنداي ماسەلە تاراز قالاسىندا دا بار.
«بۇگىنگى تاڭدا 2 مەكتەپتىڭ كۇردەلى جوندەۋ جۇمىستارى تولىق اياقتالدى. 1 قىركۇيەككە دەيىن 9 مەكتەپتىڭ كۇردەلى جوندەۋ جۇمىستارى اياقتالادى. ال 4 مەكتەپتەگى كۇردەلى جوندەۋ جۇمىستارى وسى جىلدىڭ سوڭىنا دەيىن اياقتالادى دەپ كۇتىلۋدە. بۇل جۇمىس مەكتەپتەردە وقۋ پروتسەسى وقۋشىلاردى جاقىن ورنالاسقان مەكتەپتەردە نەمەسە اكىمشىلىك عيماراتتارىندا وقىتۋ ارقىلى ۇيىمداستىرىلادى», دەيدى ج.بەكباتىروۆا.
ال جامبىل وبلىسى بويىنشا ءبىلىم سالاسىندا ساپانى قامتاماسىز ەتۋ دەپارتامەنتىنىڭ باسشىسى دامەش وسكەمباەۆا بيىلعى ماۋسىم-شىلدە ايلارىندا ەلىمىزدىڭ ءبىلىم جانە عىلىم ءمينيسترىنىڭ تاپسىرماسىنا سايكەس, مەملەكەتتىك جالپى ءبىلىم بەرەتىن مەكتەپتەردە كەشەندى مونيتورينگ جۇرگىزىلگەنىن, وعان وبلىستاعى بارلىق 442 مەكتەپ قامتىلعانىن جەتكىزدى.
«مونيتورينگ قورىتىندىسى بويىنشا بىرقاتار ماسەلە انىقتالعان. اتاپ ايتقاندا, مەكتەپتەردەگى اسحانالاردىڭ, سپورت زالدارىنىڭ, ءپان كابينەتتەرى مەن لابوراتوريالاردىڭ جەتىسپەۋى سياقتى ماسەلەلەر بار. بۇل بويىنشا ءبىلىم جانە عىلىم مينيسترلىگىنە, وبلىس اكىمدىگى مەن ءبىلىم باسقارماسىنا تالدامالىق اقپاراتتار جولداندى. سونداي-اق انىقتالعان ماسەلەلەر بويىنشا ءبىلىم بولىمدەرىنە ناقتى تاپسىرمالار بەرىلدى», دەيدى ول.
سونىمەن قاتار بۇگىندە وبلىس بويىنشا 9 مەكتەپتە قۇرىلىس جۇمىستارى جۇرگىزىلۋدە. ونىڭ ىشىندە تاراز قالاسىنداعى №2, №16, №22 جانە «شالعاي قاراسۋ» الابىندا ورنالاسقان ورتا مەكتەپتەر, بايزاق اۋدانىنداعى بۋرىل جانە ۇلگىلى ورتا مەكتەپتەرى, قورداي اۋدانىنداعى ماسانشى, كۇنباتىس جانە قالعۇتى ورتا مەكتەپتەرى بار. ال 4 مەكتەپتىڭ قۇرىلىسى جاڭا وقۋ جىلىنا دەيىن اياقتالىپ, پايدالانۋعا بەرىلەدى دەپ جوسپارلانعان.
جامبىل وبلىسى
