«الىپپە» مەن «ساۋات اشۋدىڭ» ايىرماشىلىعى بار. ەڭ باستىسى – بالانىڭ ساۋاتىن اشۋ كەزەڭدەرىندەگى ايىرماشىلىعى. الىپپە دەيىنگى كەزەڭ, الىپپە كەزەڭى, الىپپەدەن كەيىنگى كەزەڭ ەكى وقۋلىقتا ءارتۇرلى ۋاقىتتى قامتيدى. «الىپپەنى» 1-جارتىجىلدىقتا اياقتاپ, «انا ءتىلى» وقۋلىعىنا كىرىسەتىنبىز.
ال «ساۋات اشۋدا» الىپپە كەزەڭى 3-توقسانعا دەيىن جالعاسادى. بۇل بالانى جالىقتىرىپ جىبەرەتىن پروتسەسس.
«الىپپەدە» بارلىق ءسوز, سويلەم بۋىن-بۋىنعا ءبولىنىپ بەرىلەتىن. ارىپپەن تانىسقاندا, تومەنگى جاعىندا ءارىپتىڭ جازبا ءتۇرى, سوزدەردىڭ, سويلەمدەردىڭ كوركەم جازۋ ۇلگىسى كورسەتىلەتىن. الىپپە كەزىندە ارىپكە بايلانىستى اڭگىمە ماتىندەر بەرىلەدى. ماتىندەر قىسقا مازمۇندى, بالانىڭ تۇسىنۋىنە جەڭىل, ولەڭدەر جاتتاپ الۋعا, ەستە ساقتاۋعا, قابىلداۋعا وڭاي بولاتىن.
«ساۋات اشۋدىڭ» جاڭالىعى مەن وزگەشەلىگى كوپ. باستى ەرەكشەلىگى - تىڭدالىم, جازىلىم, وقىلىم جانە ايتىلىم سىندى دەڭگەيلەردەن تۇرادى. ءبىر ءارىپتى ۇيرەنۋگە ءتورت-بەس ساباق ارنالادى دا, سول ۋاقىتتا بالانى وزدىگىنەن ىزدەنۋگە ۇيرەتەتىن ءتۇرلى تاپسىرما بەرىلەدى. ياعني, بالانى جاتتاندى بىلىمگە باعىتتاۋ ەمەس, ءبىر دۇنيەنى ۇيرەنۋگە وزىنشە تالپىنۋ, ىزدەنۋ, كەرەكتى ءبىلىمدى يگەرۋگە ءوزى كۇش سالىپ بارىپ, قابىلداۋعا باۋليدى. قاراپايىم ديالوگتى وقۋشىلار تىڭدالىم ارقىلى ءبىرىنشى سىنىپتا-اق مەڭگەرۋىنە مۇمكىندىك بەرەدى», دەپ ءتۇسىندىردى مارال سماعۇلوۆا baq.kz-كە بەرگەن سۇحباتىندا.
