ۇيىم وكىلدەرىن الماتىدا قارسى الۋ كەزىندە ميكاەلا فريبەرگ-ستوري كەلگەن توپتىڭ قۇرامىندا كىمدەر بار ەكەنىن قىسقاشا باياندادى.
«بۇگىن بۇۇ-نىڭ اۋعانستانعا كومەك كورسەتۋ جونىندەگى ميسسياسىنىڭ وكىلدەرى الماتىعا كەلىپ جاتىر. ءبىز قازاقستان ۇكىمەتىنە كورسەتكەن قولداۋى مەن ارىپتەستەرىمىزدى وسىندا قابىلداۋ مۇمكىندىگىن ۇسىنعانى ءۇشىن ريزامىز. اۋعانستاندا جۇمىس ىستەۋ ءۇشىن بۇكىل الەمنىڭ ءار تۇكپىرىنەن, ەۋروپادان, سولتۇستىك امەريكادان جينالعان بۇۇ قىزمەتكەرلەرى وسىندا كەلىپ وتىر. ولار اۋعانستانعا كومەك كورسەتۋ جۇمىستارىن ءارى قاراي جالعاستىرادى.
كەيبىرەۋلەرى اۋعانستانعا وسى جاقتان قولداۋ كورسەتۋ ءۇشىن الماتىدا قالادى, ال باسقالارى ودان ءارى وزدەرىنىڭ تۇراتىن ەلدەرىنە نەمەسە بۇۇ قۇرىلىمىنداعى اگەنتتىكتەرىنىڭ كەڭسەلەرى ورنالاسقان ەلدەرگە ۇشادى», دەدى بۇۇ وكىلى.
سونداي-اق, ول وسىنداي قۇبىلمالى كەزەڭدە جەدەل كومەك ۇسىنعان قازاقستان تاراپىنا ۇيىم وكىلدەرىنىڭ العىسىن جەتكىزدى.
«وزدەرىڭىز بىلەتىندەي, اۋعانستانداعى جاعداي قازىر وتە قۇبىلمالى جانە تۇراقسىز. ۇشاققا جەتۋ ءۇشىن ءبىراز ۋاقىت قاجەت بولدى. ءبىز قازاقستاندىق بيلىكتىڭ كورسەتكەن قولداۋى, سونداي-اق ارىپتەستەرىمىزدى وسىندا قابىلداۋ ماسەلەسىندە كورسەتكەن كومەگى ءۇشىن وتە ريزامىز», دەدى ميكاەلا فريبەرگ-ستوري.
