كاسىپكەرلىكتى مەملەكەتتىك قولداۋ جانە قورعاۋ دەپارتامەنتىنىڭ باسقارما باسشىسى شولپانساۋلە مومبەكوۆانىڭ ايتۋىنشا, قولدانىستاعى زاڭناماعا ءتيىستى وزگەرىستەر ەنگىزىلىپ, وندا العاش رەت الەۋمەتتىك ماسەلەلەردى شەشۋگە باعىتتالعان كاسىپكەرلىك سۋبەكتىلەرىنە انىقتاما بەرىلگەن.
سوعان سايكەس, الەۋمەتتىك كاسىپكەرلىك سۋبەكتىسى مارتەبەسىن الۋ ءۇشىن كاسىپكەر كەلەسى شارتتاردىڭ كەم دەگەندە بىرەۋىن ورىنداۋى ءتيىس ەكەن: كاسىپورىن قىزمەتكەرلەرىنىڭ جالپى سانىنىڭ كەمىندە 50 پايىزىن الەۋمەتتىك وسال سانات ازاماتتارى قۇرايتىن جۇمىس ورىندارىن قۇرۋ; حالىقتىڭ وسال توپتارىنا ارنالعان تاۋارلاردى وندىرۋگە, ولاردى وتكىزۋدەن تۇسەتىن تابىس كاسىپورىننىڭ جالپى تابىسىنىڭ كەمىندە 50 پايىزىن قۇراۋى ءتيىس; الەۋمەتتىك قىزمەتتەردى, سونداي-اق دەنساۋلىق ساقتاۋ, ءبىلىم بەرۋ جانە تاربيەلەۋ, مادەنيەت جانە سپورت سالاسىندا قىزمەتتەر كورسەتۋ.
سونىمەن قاتار حالىقتىڭ الەۋمەتتىك وسال توپتارىنىڭ سالالىق تىزبەسى انىقتالىپ, وعان – بارلىق توپتاعى مۇگەدەكتەر; كوپبالالى جانە تولىق ەمەس وتباسىلاردان شىققان ەڭبەككە جارامدى ازاماتتار; مۇگەدەك بالانى تاربيەلەپ وتىرعان اتا-انالار; باس بوستاندىعىنان ايىرۋ ورىندارىنان بوساتىلعاندار; حيميالىق تاۋەلدىلىكتەن ەمدەلگەن ازاماتتار; زەينەتاقى جانە زەينەتكەرلىك جاس الدىنداعى ادامدار ەنگىزىلگەن. «ارەكەت» جوباسى ىسكە قوسىلعان ءۇش جىل ىشىندە 120-دان اسا كوممەرتسيالىق ەمەس ۇيىم (كەۇ) الەۋمەتتىك كاسىپكەرلىكتى دامىتۋعا گرانتتار الىپتى.
– «ارەكەت» جوباسى بارىسىندا 360-تان اسا كەۇ قاتىسۋعا ءوتىنىم بەردى. گرانت الۋشىلار جوبالارىنىڭ نەگىزگى باعىتتارى – حالىقتىڭ الەۋمەتتىك وسال توپتارىنان ادامداردى جۇمىسقا ورنالاستىرۋ, ەرەكشە قاجەتتىلىكتەرى بار بالالاردى وڭالتۋ جانە تۇزەتۋ, ينكليۋزيۆتى ءبىلىم بەرۋ, سپورت, مەكتەپكە دەيىنگى وقىتۋ. بۇگىنگى تاڭدا الەۋمەتتىك كاسىپكەرلىكتىڭ مەملەكەتتىك دەڭگەيدە قولداۋ تاۋىپ جاتقانى قۋانتادى. ۇكىمەت بۇل سالانىڭ ەل ەكونوميكاسىنىڭ دامۋىنا ناقتى پايدا مەن ۇلەس قوسا الاتىنىن, سونىمەن قاتار قوعامنىڭ الەۋمەتتىك پروبلەمالارىن شەشە الاتىنىن كورىپ وتىر. ماۋسىم ايىندا «الەۋمەتتىك كاسىپكەرلىك تۋرالى» زاڭ قابىلداندى, وندا وسى سالانى قولداۋ بويىنشا بىرقاتار شارا قاراستىرىلعان. وتكەن جىلداردىڭ تاجىريبەسى ءبىزدىڭ كەۇ الەۋمەتتىك كاسىپكەرلىكتى دامىتۋعا دايىن ەكەنىن كورسەتتى. تەك ساپالى مالىمەتتەر بازاسى مەن باستاپقى كاپيتالدى بەرۋ قاجەت. وسى ەكى مىندەتتى ءبىزدىڭ قور شەشەدى, – دەيدى Samruk-Kazyna Trust قورىنىڭ رەسمي وكىلى ميراس ىرگەباەۆ.
وتاندىق كەۇ-لار الەۋمەتتىك كاسىپكەرلىكتى دامىتۋ ماقساتىندا 3 ملن تەڭگەگە دەيىنگى گرانت الا الادى. كاسىپكەرلەر «ارەكەت» جوباسى اياسىندا قاراستىرىلعان ارنايى ءبىلىم بەرۋ باعدارلاماسى اياسىندا ىرىكتەۋدەن ءوتىپ, بىلىكتىلىگىن ارتتىرۋى كەرەك. وتىنىمدەردى قابىلداۋ 23 تامىزدا باستالىپ 17 قىركۇيەككە دەيىن جالعاسادى. جوباعا ەلىمىزدەگى الەۋمەتتىك كاسىپكەرلىكتى دامىتقىسى كەلەتىن بارلىق كەۇ قاتىسا الادى.
– جوبا ءۇش كەزەڭمەن وتەدى. ءبىرىنشىسى – وتىنىمدەردى جيناۋ, ولاردى دۇرىس تولتىرۋ تۇرعىسىنان قاراۋ. ەكىنشىسى – قاتىسۋشىلاردى «ينكۋباتور» جانە «اكسەلەراتور» باعدارلامالارى بويىنشا وقىتۋدى كوزدەيدى. «ينكۋباتور» – بۇل بۇرىن «ارەكەت» جوباسى اياسىندا گرانت ۇتىپ الماعان, الەۋمەتتىك كاسىپكەرلىكتىڭ نەگىزگى اسپەكتىلەرىن زەرتتەپ, نىعايتقىسى كەلەتىن, سونىڭ ىشىندە نارىقتى تالداۋ, بيزنەس مودەلدەردى قۇرۋ, PR, جوبالاردى زاڭگەرلىك سۇيەمەلدەۋ. «اكسەلەراتور» – ءبىزدىڭ گرانتتارىمىزدى العان كەۇ-عا ارنالعان باعدارلاما. ولار ءۇشىن قارجىلىق مودەل قۇرۋ, ءونىم ديزاينى, ساتۋدى جىلجىتۋ بويىنشا وقىتۋدى كوزدەيتىن تەرەڭىرەك باعدارلاما جاسالدى. «اكسەلەراتور» كورسەتىلەتىن قىزمەتتەر مەن تاۋارلاردىڭ ساپاسىن جاقسارتۋعا, الەۋمەتتىك كاسىپكەرلىك بويىنشا قولدانىستاعى جوبالارعا جاڭالارىن قوسۋعا باعىتتالعان. وقىتۋ التى اپتا بويى online فورماتتا وتەدى. قازاقستاندىق جانە شەتەلدىك ساراپشىلار ءبىلىم بەرىپ قانا قويماي, ءوز كەيستەرىمەن بولىسەدى, مەنتور بولادى», دەپ اتاپ ءوتتى سپيكەر.
