الەم • 18 تامىز، 2021

كوروناۆيرۋس: الەمدەگى ەپيداحۋال قانداي؟

ۋكراينادا ءبىر تاۋلىكتە COVID-19 جۇقتىرۋ بويىنشا رەكوردتىق كورسەتكىش تىركەلدى، دەپ حابارلايدى Egemen.kz.

برازيليادا 20،5 ميلليونعا جۋىق ادام كوروناۆيرۋس جۇقتىردى. قايتىس بولعانداردىڭ جالپى سانى 570 000-نان استى. وتكەن تاۋلىكتە SARS-CoV-2 اۋرۋىنىڭ 37 613 جاعدايى تىركەلدى. ماۋسىم ايىندا برازيليانىڭ سانيتارلىق قاداعالاۋ جونىندەگى ۇلتتىق اگەنتتىگى «سپۋتنيك V» ۆاكتسيناسىن اكەلۋدى جانە شۇعىل قولدانۋدى ماقۇلدادى.

ۋكراينا سوڭعى ەكى ايدا كۆي جۇقتىرۋدىڭ رەكوردىن جاڭارتتى. ەلدە ءبىر تاۋلىكتە COVID-19 جۇقتىرۋ بويىنشا رەكوردتىق كورسەتكىش تىركەلدى. 24 ساعات ىشىندە كوروناۆيرۋستىق ينفەكتسيانىڭ 1 447 جاعدايى راستالدى، ناۋقاستار اراسىندا – 104 بالا جانە 38 دارىگەر بار، ءبىر تاۋلىكتە 40 ادام قايتىس بولدى. بۇل 10 ماۋسىمنان بەرگى ەڭ جوعارى كورسەتكىش، ول كەزدە 1 603 ادام اۋىرعان. ۋكراينادا ىندەت باستالعاننان بەرى 2 268 666 COVID-19 جاعدايى راستالدى.

اقش-تا كوروناۆيرۋستىق ينفەكتسيانى جۇقتىرۋ كورسەتكىشى كۇننەن كۇنگە ارتۋدا. بيلىك COVID-19 جاڭا تولقىنىن جاريالادى جانە ونى «دەلتا» شتامىنىڭ تارالۋىمەن بايلانىستىردى. انىقتالعان جاعدايلاردىڭ تاۋلىكتىك سانى 130 مىڭنان استى. وتكەن اپتاداعى ىندەتكە شالدىعۋشىلاردىڭ سانى 900 مىڭنان اسادى. سونىمەن قاتار اۋرۋحاناعا جاتقىزىلعان بالالار سانى دا ءوسىپ كەلەدى. وسىعان وراي، اق ءۇي قايتالاما ۆاكتسينا الۋ مەرزىمىن بەلگىلەدى. ۆاكتسينانىڭ ءۇشىنشى دوزاسىن 8 ايدان كەيىن الۋعا بولادى.

بالكان كوسوۆو رەسپۋبليكاسى بارلاردىڭ جۇمىس ۋاقىتىن شەكتەدى جانە تۇنگى كلۋبتاردىڭ جۇمىسىنا تىيىم سالدى. 20 تامىزدان 1 قىركۇيەككە دەيىن مەيرامحانالار مەن كافەلەر ساعات 22:30-دا جابىلادى، كەلۋشىلەردى تەك ۆاكتسيناتسيا سەرتيفيكاتى ۇسىنىلعان كەزدە قابىلداي الادى. توي قوناقتارىنىڭ ەڭ كوپ سانى 300-دەن 150 ادامعا دەيىن شەكتەلگەن. بۇرىن مۇنداي شارالار سولتۇستىك ماكەدونيادا ەنگىزىلگەن بولاتىن.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز