سپورت • 14 تامىز، 2021

دزيۋدو فەدەراتسياسى سپورتشىلارعا سىياقى تابىستادى

54 رەت كورسەتىلدى

بۇگىن نۇر-سۇلتان جانە الماتى قالالارىندا دزيۋدودان وليمپيادا، الەم جانە ازيا چەمپيوناتتىنىڭ جۇلدەگەرلەرىن ماراپاتتاۋ ءراسىمى ءوتتى، دەپ جازادى Egemen.kz ۇوك ءباسپاسوز قىزمەتىنە سىلتەمە جاساپ.

ەلوردادا فەدەراتسيا پرەزيدەنتى قايرات قوجامجاروۆ ءحححىى جازعى وليمپيادا ويىندارىنىڭ قولا جۇلدەگەرى دزيۋدوشى ەلدوس سمەتوۆكە 5 ملن تەڭگەنىڭ سەرتيفيكاتىن تابىستادى.

ء«بىز بۇگىن جىلدىڭ ەڭ ماڭىزدى دوداسى سانالعان وليمپيادا ويىندارىن قورىتىندىلاپ وتىرمىز. توكيو تورىندە ءبىزدىڭ ماقتانىشىمىز، وجەت ەلدوس وتە ناتيجەلى كۇرەس كورسەتىپ، ەل قورجىنىنا قولا مەدالىن سالدى. بۇل ءبىز ءۇشىن، قازاقستان دزيۋدوسى ءۇشىن تاريحي جۇلدە بولىپ سانالادى. ەلدوس دزيۋدودن وليمپيادا ويىندارىنىڭ ەكى دۇركىن جۇلدەگەرى اتانعان تۇڭعىش قازاقستاندىق سپورتشى. ۇساق جاراقاتتارىنا قاراماستان ءوزىنىڭ الەمدىك دارەجەدەگى مىقتى سپورتشى ەكەنىن تاعى ءبىر رەت دالەلدەدى»، دەدى قازاقستان دزيۋدو فەدەراتسياسىنىڭ پرەزيدەنتى قايرات قوجامجاروۆ.

1

ءوز كەزەگىندە فەدەراتسيا پرەزيدەنتى دزيۋدودان ۇلتتىق قۇراما مۇشەلەرىنىڭ جىلدىڭ ماڭىزدى دودالارىنان جۇلدەسىز قايتپاعانىن تىلگە تيەك ەتتى.

«قازاقستان دزيۋدوسى ءۇشىن بيىلعى جىلدى جامان بولدى دەۋگە بولمايدى. پاندەمياعا جانە كەزدەسكەن قيىندىقتار مەن شەكتەۋلەرگە قاراماستان ۇلتتىق قۇراما سپورتشىلارى قاتىسقان ماڭىزدى جارىستاردان جۇلدەسىز ورالعان جوق. ماسەلەن، ءالەم چەمپيوناتىنان عۇسمان قىرعىزباەۆتىڭ كۇمىس جۇلدەسىن، ەلدوس جۇماقانوۆتىڭ ازيا چەمپيوناتىنداعى قولا جۇلدەسىن ايتۋعا بولادى. قىزدارىمىز دا بيىل جۇلدەدەن قالىس قالعان جوق. ابيبا ابۋجاقىنوۆا ايەلدەر اراسىندا ازيا چەمپيوناتىنىڭ كۇمىس جۇلدەسىن يەلەنسە، سەۆارا نيشانباەۆا قولا مەدالدى ۇتىپ الىپ، ۇزدىك ۇشتىككە ەندى»، دەدى ول.

قازاقستان دزيۋدو فەدەراتسياسىنىڭ پرەزيدەنتى قايرات قوجامجاروۆتىڭ مۇرىندىق بولۋىمەن سالتاناتتى شارا الماتىدا جالعاسىن تاپتى. 2021 جىلعى الەم چەمپيوناتىنىڭ كۇمىس جۇلدەگەرى عۇسمان قىرعىزباەۆقا 4 ملن تەڭگە، ازيا چەمپيوناتىنىڭ جۇلدەگەرلەرى ابيبا ابۋجاقىنوۆا (كۇمىس) مەن ەلدوس جۇماقانوۆقا (قولا) – 500 مىڭ تەڭگە، قۇرلىقتىق بىرىنشىلىكتىڭ قولا جۇلدەگەرى سەۆارا نيشانباەۆا 300 مىڭ تەڭگە كولەمىندە سىياقى تاعايىندالدى. الماتى قالاسىندا جالعاسىن تاپقان سالتاناتتى شارادا سەرتيفيكاتتاردى سپورتشىلارعا قازاقستان دزيۋدو فەدەراتسياسىنىڭ باس حاتشىسى اسحات جيتكەەۆ تابىستادى.

2

سونىمەن قاتار، سىياقىعا ۇلتتىق قۇراما باس باپكەرى، سپورتشىنىڭ جەكە جاتتىقتىرۋشىلارى مەن عىلىمي-كەشەندى توپ وكىلدەرى دە يە بولدى.

اتاپ ايتقاندا، دزيۋدودان قازاقستان ەرلەر ۇلتتىق قۇراما كومانداسىنىڭ باس باپكەرى جانە توكيو وليمپياداسىنىڭ قولا جۇلدەگەرى ەلدوس سمەتوۆتىڭ جەكە جاتتىقتىرۋشىسى عالىمجان جىلگەلديەۆكە – 1 ملن تەڭگە، ۇلتتىق قۇرامانىڭ اعا جاتتىقتىرۋشىسى قالەن قالي ۇلى مەن الەم چەمپيوناتىنىڭ كۇمىس جۇلدەگەرى عۇسمان قىرعىزباەۆتىڭ جەك ەجاتتىقتىرۋشىسى ەرمەك ناسيەۆكە – 500 مىڭ تەڭگە، ۇلتتىق قۇراما دارىگەرى تالعات ابدىمامىنوۆقا 500 مىڭ تەڭگە جانە قۇراما ءماسساجيستى باعلان قاليبەكوۆ 300 مىڭ تەڭگە كولەمىندە سىياقىنىڭ سەرتيفيكاتىمەن ماراپاتتالدى.

«بۇگىن ماراپاتقا يە بولعان بارلىق سپورتشىلاردىڭ اتىنان قازاقستان دزيۋدو فەدەراتسياسىنا العىس ايتقىم كەلەدى. تەك قانا رەسمي سالتاناتتى شارالاردا عانا ەمەس،  تاتاميگە شىعاردا، كەز كەلگەن جارىسقا دايىندىق بارىسىندا ءبىز ءدال وسىنداي قولداۋدىڭ بارىن سەزەمىز. بىزگە ارتىلعان ءۇمىتتى، سەنىمدى اقتاۋ ءۇشىن ەشقاشان ايانىپ قالمايمىز!

الەمدىك ارەنادا ەل نامىسىن ابىرويمەن قورعاۋ - ءبىزدىڭ، سپورتشىلاردىڭ وتان الدىنداعى پارىزى. ال ءدال وسىنداي قولداۋ مەن سەنىمنىڭ ارقاسىندا ءبىز جىگەرلەنىپ، بورىشىمىزدى ادال وتەۋگە بارىمىزدى سالامىز. كوك تۋىمىزدىڭ كوكتە جەلبىرەتىپ، ەل مەرەيىن ۇستەم ەتۋ – بىزگە رۋح بەرىپ، جىگەرلەندىرەدى»، دەدى دزيۋدودان توكيو وليمپياداسىنىڭ قولا جۇلدەگەرى ەلدوس سمەتوۆ.

سوڭعى جاڭالىقتار

پاريجگە سىيماعان پول

ونەر • بۇگىن، 21:16

قارتتار ۇيىندەگى ۆالس

قوعام • بۇگىن، 21:05

دوللار قايتا كوتەرىلدى

قارجى • بۇگىن، 16:35

ۇقساس جاڭالىقتار