ايماقتار • 14 تامىز، 2021

الماتىدا ءورت شىعىپ، 13 وتباسى باسپاناسىز قالدى

202 رەت كورسەتىلدى

الماتى قالالىق توتەنشە جاعداي دەپارتامەنتىنىڭ مالىمەتىنشە، 13 تامىزدا تۇنگى ساعات 02: 58-دە «101» پۋلتىنە جەتىسۋ اۋدانى، اقتولقىن كوشەسى №12 ءۇيدىڭ جانىپ جاتقانى تۋرالى حابارلاما كەلىپ ءتۇستى. بۇل تۋرالى ۆەدومستۆانىڭ ءباسپاسوز قىزمەتى حابارلادى، دەپ جازادى Egemen.kz.

 «تجد كۇشتەرى مەن قۇرالدارى جوعارى دارەجەدەگى شاقىرتۋ بويىنشا جىبەرىلدى. بەلگىلەنگەن نورماتيۆتىك ۋاقىت بويىنشا (8 مينۋتتا) وقيعا ورنىنا جەتكەندە، 2-قاباتتى تۇرعىن ءۇيدىڭ جالپى اۋدانى 300 شارشى مەتر اشىق جالىنمەن جانىپ جاتقانىن انىقتاعان. ءورتتىڭ تەز تارالۋىنا 1943 جىلى سالىنعان عيماراتتىڭ اعاش قۇرىلىمى (اعاش قالقالار، اعاش توبە جابىندىلارى) ىقپال ەتتى. تۇرعان ءۇيدىڭ بارلىق قاباتتارىندا قويۋ تۇتىننەن ەۆاكۋاتسيا جولدارى جابىلىپ، تۇرعىنداردىڭ ءومىرى مەن دەنساۋلىعىنا قاۋىپ ءتوندى»، دەپ حابارلادى ۆەدومستۆانىڭ ءباسپاسوز قىزمەتى.

ءورتتىڭ شىعۋ سەبەبىن تەكسەرۋ الماتى قالاسىنىڭ اكىمى باقىتجان ساعىنتاەۆتىڭ جەكە باقىلاۋىندا.

«13 وتباسى باسپاناسىز قالدى، ونىڭ جەتەۋى تۋىستارىنىڭ ۇيلەرىندە. التى وتباسىنىڭ 23 مۇشەسى ۋاقىتشا قوناقۇيلەرگە ورنالاستىرىلعان. باقىتجان ساعىنتاەۆتىڭ تاپسىرماسى بويىنشا ولارعا بارلىق قاجەتتى كومەك كورسەتىلىپ جاتىر، ونىڭ ىشىندە گيگيەنا بۇيىمدارى مەن تاعام بار. مەكتەپ جاسىنداعى بالالارعا وقۋ جىلىنا دايىندالۋعا كومەك كورسەتىلەدى»، دەپ حابارلادى اكىمدىكتەن.

ءورتتىڭ شىعۋ سەبەپتەرى انىقتالىپ، كوميسسيا قورىتىندىسى شىققان سوڭ تۇرعىندارىنىڭ باسپانا ماسەلەسى بويىنشا شەشىم قابىلداناتىن بولادى.

سوڭعى جاڭالىقتار

ۇقساس جاڭالىقتار