قىزىلوردا وبلىستىق پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنا جەدەل حابارلاما كەلىپ ءتۇستى.
اتالعان ماقساتتا جەدەل-ىزدەستىرۋ ءىس-شارالارى جۇرگىزىلدى. ناتيجەسىندە وبلىس ورتالىعىندا اتىراۋلىق 23 جاستاعى تۇرعىن ۇستالدى. ودان جالپى سالماعى 116 گرامنان اساتىن مەفەدرون سينتەتيكالىق ەسىرتكى زاتى تاركىلەندى. بۇل – قىزىلوردادا اينالىمنان العاش الىنعان قاۋىپتى ەسىرتكى پرەپاراتتارىنىڭ ءبىرى.
«اتىراۋلىق جىگىت قالا ورتالىعىنان پاتەر جالداعان. وعان ءتىنتۋ جۇرگىزۋ بارىسىندا پاتەردى سينتەتيكالىق ەسىرتكى دايىندايتىن كىشىگىرىم زەرتحاناعا اينالدىرعانى بەلگىلى بولدى. پاتەر ىشىنەن ساتۋعا دايىندالعان 91 داناعا بولەكتەنگەن اق ءتۇستى ۇنتاقتار تاركىلەندى. سول جەردەن دايىنداۋعا ارنالعان تارازى, رۋلون فولگا, ءتۇرلى-ءتۇستى يزولەنتا, سكوتچتار, ءتۇرلى-ءتۇستى بوياعىشتار, دامدەۋىشتەر زاتتاي دالەل رەتىندە الىندى. ساراپتاما قورىتىندىسى بويىنشا تاركىلەنگەن ۇنتاقتىڭ مەفەدرون سينتەتيكالىق ەسىرتكىگە جاتاتىنى ناقتىلاندى», دەپ ءمالىم ەتتى قىزىلوردا وبلىستىق پوليتسيا دەپارتامەنتىنەن. ۆەدومستۆو مالىمەتىنشە, كۇدىكتى ينتەرنەت جەلىسى ارقىلى تاپسىرىس قابىلداپ, سينتەتيكالىق ەسىرتكى زاتتارىن قالا ورتالىعىنداعى ءارتۇرلى ورىندارعا جاسىرعان.
ول پوليتسيا سينتەتيكالىق ەسىرتكىن جاسىرعان جەرلەرىن كورسەتتى. بۇل ورىنداردان جالپى سالماعى 81 گرامنان اساتىن 50 دانا ەسىرتكى زاتى تاركىلەندى.
كۇدىكتى قىزىلوردا قالالىق پوليتسيا باسقارماسىنىڭ ۋاقىتشا ۇستاۋ يزولياتورىنا قاماققا الىندى.
ونىڭ ۇستىنەن قر قىلمىستىق كودەكسىنىڭ 297-بابى 3-بولىگىنىڭ 3-تارماعىنا سايكەس سوتقا دەيىنگى تەرگەپ-تەكسەرۋ امالدارى جالعاسۋدا.
