ۇلتتىق ستاتيستيكا بيۋروسى اتىراۋ وبلىسى بويىنشا دەپارتامەنتىنىڭ باسشىسى عاليا مۇحانعاليەۆانىڭ ايتۋىنشا, حالىق ساناعىنا دايىندىق كەزەڭى 1-30 ماۋسىم ارالىعىندا وتكىزىلگەن. وعان 170 ادام تارتىلىپتى. ولار تۇرعىن ۇيلەردىڭ, عيماراتتار مەن تۇرعىن ەمەس ءۇي-جايلاردىڭ ءتىزىمىن جاساقتاپ, تۇرعىنداردىڭ سانىن الدىن الا ناقتىلاۋدى ىسكە اسىردى.
– ۇلتتىق ستاتيستيكا بيۋروسىنىڭ «اۋدانداستىرۋ» اۆتوماتتاندىرىلعان اقپاراتتىق جۇيەسىنە اتىراۋ وبلىسىنان 176 389 نىسان ەنگىزىلدى. ارالاۋ جۇمىستارىنىڭ قورىتىندىسىمەن 175 641 نىسان انىقتالدى. جوسپارلى نىسانداردىڭ 99,6 پايىزى قامتىلدى. قاتە نىسانداردىڭ سانى – 2 178. وڭىردە 149 نەگىزگى تىركەۋ ۋچاسكەسىنەن بولەك ارنايى ۇيىمداردا 139 نىسان قالىپتاستىرىلدى. وندا تۇراقتى تۇراتىنداردىڭ سانى 2 877 ادامدى, 11 369 توسەكتىك ورىندى قۇرادى. وسىلايشا, انىقتالعان نىساندارداعى تۇرعىندار سانى ارنايى ۇيىمداردا تۇراقتى تۇراتىنداردى قوسا العاندا 664 493 ادامدى قۇراپ وتىر, – دەيدى ع.مۇحانعاليەۆا.
ونىڭ ايتۋىنشا, حالىق ساناعىنا دايىندىق كەزەڭىن وتكىزۋ كەزىندە بىرقاتار قيىندىق تۋىنداپتى. اسىرەسە, ساناق پەرسونالىنىڭ جاۋاپسىزدىعى مەن نەمقۇرايلىعى, كوشە اتاۋلارى مەن ءۇي نومىرلەرى ىلىنگەن انشلاگتاردىڭ جوقتىعى قيىندىق تۋعىزعان. سونداي-اق وبلىستىق ساۋلەت جانە قالا قۇرىلىسى باسقارماسى تاراپىنان ۇسىنىلعان ەلدى مەكەندەردىڭ سحەمالىق كارتاسىندا كەيبىر نىسانداردىڭ بەلگىلەنبەۋى, كەيبىر ءۇي شارۋاشىلىقتارىنىڭ ساناقتان بەيحابار بولۋى جۇمىسقا كەرى اسەرىن تيگىزىپتى.
– ۇلتتىق حالىق ساناعىنىڭ نەگىزگى كەزەڭىندە 913 ادام ۋاقىتشا جۇمىسقا تارتىلادى. ونىڭ ىشىندە 114 نۇسقاۋشى-باقىلاۋشى مەن 799 ينتەرۆيۋەر بار, – دەپ ءمالىم ەتتى ول.
بۇل ماسەلە وبلىس اكىمى ماحامبەت دوسمۇحامبەتوۆتىڭ دە نازارىن اۋداردى. اكىم اتالعان كەمشىلىكتەردى جويىپ, قالا, اۋدان اكىمدەرىنە حالىق ساناعىنا قولداۋ ءبىلدىرۋ قاجەتتىگىن تاپسىردى.
– ينتەرۆيۋەرلەردى ۆاكتسينالاۋدان وتكىزۋ قاجەت. مامانداردىڭ قاۋىپسىزدىگى ءۇشىن ۋچاسكەلىك پوليتسيا قىزمەتكەرلەرىمەن بىرلەسە ارالاۋدى ۇيىمداستىرۋ, ساناق پەرسونالدارىن قاجەتتى ورىن-جايمەن, كەرەك-جاراقپەن قامتاماسىز ەتۋ قاجەت. نۇسقاۋشى-باقىلاۋشىلار مەن مامانداردىڭ قوعامدىق كولىكتە تەگىن ءجۇرۋى قاراستىرىلادى, – دەيدى وبلىس اكىمى.
اتىراۋ وبلىسى
