حالىقتى ۆاكتسينامەن قامتۋ 59%-دى قۇرادى
ءبىرىنشى ماسەلە – قازىرگى جاعداي مەن حالىقتى ۆاكتسينالاۋ بارىسى تۋرالى دەنساۋلىق ساقتاۋ ءمينيسترى الەكسەي تسوي, نۇر-سۇلتان قالاسىنىڭ اكىمى التاي كولگىنوۆ, قىزىلوردا وبلىسىنىڭ اكىمى گۇلشارا ابدىقالىقوۆا, اقتوبە وبلىسىنىڭ اكىمى وڭداسىن ورازالين, كاسىپكەرلىك سۋبەكتىلەرىن Ashyq جۇيەسىمەن قامتۋ تۋرالى «اتامەكەن» ۇكپ باسقارما توراعاسىنىڭ ءبىرىنشى ورىنباسارى ناريمان ابىلشايىقوۆ باياندادى.
دەنساۋلىق ساقتاۋ ءمينيسترى الەكسەي تسويدىڭ ايتۋىنشا, الەمدە COVID-19-بەن اۋىرۋ مەن ءولىم-ءجىتىم بويىنشا جاعداي ءالى دە تۇراقسىز بولىپ تۇر. سوڭعى اپتادا اۋرۋدىڭ ەڭ كوپ ءوسۋى جاپونيادا بايقالدى, وندا ءبىر اپتا ىشىندە اۋرۋ 98%-عا, يزرايلدە 75%-عا, ازەربايجاندا 69%-عا ءوستى. قازاقستاندا ءبىر اپتا ىشىندە ءوسىم 10%-دى قۇرادى. «قازاقستاندا «دەلتا» شتامىنىڭ انىقتالۋىنا بايلانىستى شىلدە ايىندا سىرقاتتانۋشىلىقتىڭ ءوسۋى تىركەلدى, بىراق تامىز ايىنىڭ باسىنان باستاپ نۇر-سۇلتان قالاسىندا كوروناۆيرۋس ينفەكتسياسىمەن سىرقاتتانۋشىلىق ءوسىمىنىڭ باياۋلاۋى جانە COVID-19 بويىنشا ەپيدەميالىق جاعدايدىڭ تۇراقتانۋى بايقالادى», دەدى ا.تسوي.
ونىڭ ايتۋىنشا, 1 تامىزدان باستاپ ەلىمىزدە ىندەتتىڭ تارالۋ يندەكسى 1,11-دەن 1,01-گە دەيىن 9%-عا تومەندەدى, نۇر-سۇلتان قالاسىندا كورسەتكىش بىرلىكتەن تومەن, الماتى قالاسىندا R سانى 19%-عا تومەندەدى (1,19-دان 1,0-گە دەيىن). وڭىرلەر بولىنىسىندە كۇندەلىكتى توسەكتىك ورىنداردىڭ جۇكتەلۋى مونيتورينگىنە سايكەس وسى جىلدىڭ 11 تامىزىنداعى جاعداي بويىنشا 328 مەديتسينالىق وبەكتىدە بارلىعى 55 658 ينفەكتسيالىق توسەكتىك ورنى بار, رەسپۋبليكا بويىنشا 54%-ى تولى. ينفەكتسيالىق ستاتسيونارلارداعى رەانيماتسيالىق توسەكتىك ورىن سانى 4 969-دى قۇرايدى, ولار
45%-ى تولى. ەپيدەميالىق احۋال قيىنداعان جاعدايدا 7 419 ينفەكتسيالىق توسەكتىك ورىن رەزەرۆى بار.
ينفەكتسيالىق توسەكتىك ورىنداردىڭ جوعارى جۇكتەمەسى اتىراۋ وبلىسىندا, نۇر-سۇلتان قالاسىندا – 69%-دان, اقتوبە وبلىسىندا – 65%-دان, الماتى قالاسىندا جانە جامبىل وبلىسىندا 63%-دان بايقالادى. ۆاكتسينالاۋعا كەلەر بولساق, بۇگىنگى تاڭدا 1-كومپونەنتتى 5,9 ملن-عا جۋىق ادام الىپ, ءتيىستى حالىقتى قامتۋدىڭ 59%-ىن قۇرادى, ال 2-كومپونەنتتى ۆاكتسينا الۋعا ءتيىستى حالىقتىڭ 45,2%-ى الىپ, شامامەن 4,5 ملن ادام ۆاكتسينا سالدىردى. ءبىرىنشى دوزامەن ۆاكتسينالاۋدىڭ ەڭ از پايىزى ماڭعىستاۋ وبلىسىندا (33,1%) بايقالادى. وڭىرلەر ۆاكتسينامەن جەتكىلىكتى مولشەردە قامتاماسىز ەتىلگەن. ۆاكتسينالاردى جەتكىزۋ كەستەگە سايكەس جۇزەگە اسىرىلادى. «ۆاكتسينالاۋ تيىمدىلىگىن باعالاۋ كەزىندە سىرقاتتانۋشىلاردىڭ 99,9%-ى ۆاكتسينا الماعاندار ەكەنى انىقتالدى, بۇل رەتتە ۆاكتسينا العاننان كەيىن سىرقاتتانعانداردىڭ ۇلەسى نەبارى 0,1%-دى قۇرادى», دەپ اتاپ ءوتتى ا.تسوي.
ونىڭ ايتۋىنشا, ۆاكتسينا الماعاندار اراسىندا CوVID-19-دان ءولىم-ءجىتىمنىڭ ۇلەس سالماعى 97,7%-دى قۇرادى, ال ۆاكتسينا العاندار بويىنشا كورسەتكىش 2,3%-دى قۇرايدى, وعان قوسا ۆاكتسينا العانداردىڭ اۋىر سوزىلمالى اۋرۋلارى بولعان. بۇل فاكتىلەر, مينيستر اتاپ وتكەندەي, COVID-19 اۋىر سالدارىنىڭ الدىن الۋدا ۆاكتسينانىڭ تيىمدىلىگى بارىن تاعى دا دالەلدەيدى. «ەپيدەميالىق احۋالدى, «دەلتا» شتامىنىڭ تارالۋىن جانە ۆاكتسينامەن قامتۋدى ەسكەرە وتىرىپ, باعالاۋ بولجامدارىنا سايكەس ءبىز وپتيميستىك ستسەناري بويىنشا ارەكەت ەتىپ كەلەمىز», دەدى ا.تسوي.
ماسەلەنى قورىتىندىلاعان ۇكىمەت باسشىسى اسقار مامين بيىل تامىز
ايىندا ۆاكتسينالاۋ جوسپارىنىڭ ورىندالۋىن قامتاماسىز ەتە وتىرىپ, اسىرەسە باتىس قازاقستان, ماڭعىستاۋ جانە اتىراۋ وبلىستارىندا ۆاكتسينالاۋ قارقىنىن كۇشەيتۋ قاجەتتىگىن اتاپ ءوتتى. پرەمەر-مينيستر نۇر-سۇلتان, الماتى جانە شىمكەنت قالالارىنا, سونداي-اق قاراعاندى وبلىسىنا ەرەكشە نازار اۋدارا وتىرىپ, بارلىق وڭىردەگى سانيتارلىق-ەپيدەميالىق جاعدايدى باقىلاۋدا ۇستاۋدى تاپسىردى.
سونىمەن قاتار حالىقتىڭ شەكتەۋ شارالارىن, ەڭ الدىمەن, ماسكا تاعۋ رەجىمىن ساقتاۋىن قامتاماسىز ەتۋ قاجەت ەكەنى اتاپ ءوتىلدى. ول ءۇشىن كارانتين تالاپتارىن بۇزۋشىلاردى جاۋاپكەرشىلىككە تارتا وتىرىپ, مونيتورينگتىك توپتاردىڭ جۇمىسىن جانداندىرۋ تاپسىرىلدى. Ashyq جۇيەسىنە قاتىساتىن كاسىپكەرلىك سۋبەكتىلەرىنىڭ سانى ۇنەمى ارتىپ كەلەدى. ولاردىڭ سانى 5 ەسەگە – 21 مىڭنان 101 مىڭعا دەيىن ءوستى. بۇل بيزنەسكە ءوز قىزمەتىن جالعاستىرۋعا مۇمكىندىك بەرەدى. سوندىقتان Ashyq قوسىمشاسىنىڭ قولدانىلۋ اياسىن ودان ءارى كەڭەيتۋ قاجەت.
ەكونوميكادا سەنىمدى
ءوسىم بايقالادى
ۇكىمەت وتىرىسىندا ەلىمىزدىڭ 2021 جىلعى قاڭتار-شىلدەدەگى الەۋمەتتىك-ەكونوميكالىق دامۋىنىڭ جانە رەسپۋبليكالىق بيۋدجەتتىڭ اتقارىلۋىنىڭ قورىتىندىلارى قارالدى.
ۇلتتىق ەكونوميكا ءمينيسترى اسەت ەرعاليەۆ بايانداعانداي, وسى جىلدىڭ قاڭتار-شىلدە ايلارىندا قازاقستان ەكونوميكاسى جەدەل قارقىنمەن قالپىنا كەلە باستادى جانە قازىرگى تاڭدا 2,7% ءوسۋدى كورسەتتى. «وسى ەسەپتى كەزەڭدە نەگىزگى ترەندتەر بويىنشا ناقتى سەكتورداعى ديناميكالىق جانە تۇراقتى ءوسۋ, قىزمەت كورسەتۋ سەكتورىنداعى ديناميكانىڭ جەدەلدەۋى, ءوندىرۋشى ەمەس سەكتورلارداعى ينۆەستيتسيانىڭ جوعارى ءوسۋى, ساۋدا بالانسىنىڭ وڭ سالدوسىنىڭ ساقتالۋى بايقالۋدا. ناقتى سەكتور ەكونوميكانىڭ ورنىقتى دامۋ فاكتورى بولىپ وتىر. وسى جىلدىڭ قاڭتار-شىلدەسىندە ناقتى سەكتورداعى ءوسىم 3,6%-عا دەيىن جەدەلدەدى. ىسكەرلىك بەلسەندىلىك قىزمەت كورسەتۋ سالاسىندا 2%-عا دەيىن ءوستى», دەدى ءا.ەرعاليەۆ.
قارجى ءمينيسترى ەرۇلان جاماۋباەۆتىڭ ايتۋىنشا, بيىلعى 7 ايدىڭ قورىتىندىسى بويىنشا مەملەكەتتىك بيۋدجەتكە 5 ترلن 832 ملرد تەڭگە سوماسىندا كىرىس ءتۇستى (جوسپار 105,8%-عا اتقارىلدى), ونىڭ 3,6 ترلن تەڭگەسى رەسپۋبليكالىق بيۋدجەت ەنشىسىندە (جوسپار 100,1%-عا اتقارىلدى). جالپى, كىرىستەر بويىنشا جوسپار 4 ملرد تەڭگەگە اسىرا ورىندالدى.
ساۋدا جانە ينتەگراتسيا ءمينيسترى باقىت سۇلتانوۆتىڭ ايتۋىنشا, ۇلكەن شۋ بولعان كارتوپ باعاسىنىڭ ماۋسىمدىق ءوسۋى ءساۋىر-ماۋسىم ارالىعىندا بەلگىلەندى. بۇدان ءارى وڭتۇستىك ايماقتارداعى ەرتە پىسەتىن كارتوپتىڭ ءتۇسىمى ۇلعايعان سايىن, ءونىمنىڭ باعاسى تومەندەدى. ەڭ جوعارى ءوسۋ ساتىنەن باستاپ, باعالار 26%-عا نەمەسە 54 تەڭگەگە ءتۇستى. تامىز جانە قىركۇيەك ايلارىندا سولتۇستىك ايماقتاردا ءونىمنىڭ جاپپاي جينالۋى كۇتىلۋدە, بۇل ىشكى نارىقتى كارتوپپەن تولىقتىرىپ, باعانىڭ ودان ءارى تومەندەۋىن ىنتالاندىرادى. ءسابىز ءۇشىن باعانىڭ ماۋسىمدىق ءوسۋى ءبىر ايعا كەشىرەك سوزىلادى. نارىقتى جاڭا داقىلمەن قانىقتىرۋ ورتا ەسەپپەن شىلدە ايىنىڭ سوڭىنان باستالىپ, قىركۇيەككە دەيىن جالعاسادى. ەگىن جيناۋ كەزەڭىندە 577 مىڭ توننا ءسابىز ءتۇسىمى كۇتىلۋدە. بۇل ءسابىزدىڭ باعاسىن ەداۋىر تۇسىرۋگە ىقپالىن تيگىزەدى. پياز بەن قىرىققابات باعالارىنىڭ ءوسۋى ءالى دە بايقالادى. جىل باسىنان بەرى ءبىر كەلى پيازدىڭ باعاسى 29%-عا نەمەسە 23 تەڭگەگە قىمباتتادى. ال قىرىققاباتتىڭ باعاسى 22%-عا نەمەسە 20 تەڭگەگە قىمباتتادى. ادەتتەگى مالىمەتتەرگە سايكەس, پياز بەن قىرىققابات بويىنشا جاپپاي ەگىن جيناۋ تامىز ايىنىڭ سوڭى مەن قىركۇيەكتىڭ باسىنان باستالادى. «تيىسىنشە, باعانىڭ تومەندەۋى تەك وسى ايدىڭ سوڭىندا كۇتىلەدى. ءبىز باعا تۇراقتاندىرۋدىڭ نەگىزگى قۇرالدارىنا تالداۋ جۇرگىزدىك. ناتيجەلەرى وڭىرلەردە تۇراقتاندىرۋ قورلارىنا تاۋارلاردى ساتىپ الۋعا قاراجاتتىڭ دۇرىس بولىنبەگەنىن جانە مەحانيزمدى ءتيىمسىز پايدالانۋدىڭ ءالى دە فاكتىلەرى بار ەكەنىن كورسەتتى. كەيبىر وڭىرلەردە تاۋەكەلى جوعارى ونىمدەرگە ءمان بەرۋدىڭ ورنىنا, باعالارى تۇراقتارى تاۋارلار ساتىپ الىنعان. مىسالى, قاراجاتتىڭ 37%-ى ۇندى ساتىپ الۋعا جۇمسالدى. ونىڭ باعاسى بىزدە تۇراقتى. سونداي-اق ادەتتە ينفلياتسيا شەگىندە عانا قىمباتتايتىن تۇز جانە ءسۇت ونىمدەرى سياقتى تاۋارلار ساتىپ الىندى», دەدى ساۋدا ءمينيسترى.
ماسەلەنى قورىتىندىلاعان ۇكىمەت باسشىسى اسقار مامين قازاقستان ەكونوميكاسىندا ءتورت اي قاتارىنان سەنىمدى ءوسىم بايقالاتىنىن اتاپ ءوتتى. جەتى ايدىڭ قورىتىندىسى بويىنشا ءىجو ءوسىمى 2,7%-دى قۇرادى. ەكونوميكانىڭ ناقتى سەكتورى ءوسىمنىڭ نەگىزگى درايۆەرى بولىپ قالۋدا. سەرپىن ونەركاسىپتەگى 2,5%, قۇرىلىستاعى 11,1% ءوندىرىستىڭ وسۋىمەن, سونداي-اق اۋىل شارۋاشىلىعىنداعى تۇراقتى ءوسۋ قارقىنىمەن (+2,4%) قامتاماسىز ەتىلدى.
وسى جىلدىڭ 7 ايىنىڭ قورىتىندىسى بويىنشا الماتى, جامبىل, ماڭعىستاۋ وبلىستارى جانە شىمكەنت قالاسى بارلىق 7 نەگىزگى ماكروكورسەتكىش بويىنشا, اقمولا, اقتوبە, قاراعاندى, قوستاناي, قىزىلوردا, پاۆلودار, سولتۇستىك قازاقستان, تۇركىستان وبلىستارى جانە نۇر-سۇلتان قالاسى 6 كورسەتكىش بويىنشا, اتىراۋ, شىعىس قازاقستان وبلىستارى جانە الماتى قالاسى 5 كورسەتكىش بويىنشا الەۋمەتتىك-ەكونوميكالىق دامۋ ءوسىمىن قامتاماسىز ەتتى. باتىس قازاقستان وبلىسى ەڭ تومەنگى كورسەتكىشتەرگە يە.
ۇكىمەت باسشىسى اكىمدىكتەرگە الەۋمەتتىك ماڭىزى بار ازىق-ت ۇلىك ونىمدەرىنىڭ باعاسىن ۇستاپ تۇرۋ شارالارىن كۇشەيتۋدى جانە ەرەكشە باقىلاۋعا الۋدى, ۇلتتىق ەكونوميكا مينيسترلىگىنە جانە مۇددەلى مەملەكەتتىك ورگاندارعا بيىلعى تامىز ايىنىڭ سوڭىنا دەيىن ينفلياتسياعا قارسى دەن قويۋ شارالارىنىڭ كەشەنىن, سونداي-اق الەۋمەتتىك ماڭىزى بار تاۋارلاردىڭ باعاسىن ۇستاپ تۇرۋ جونىندەگى شارالاردىڭ جاڭا توپتاماسىن قابىلداپ, ىسكە اسىرا باستاۋدى تاپسىردى. «بارلىق ءوڭىر الەۋمەتتىك-ەكونوميكالىق دامۋدىڭ جوسپارلانعان كورسەتكىشتەرىنە قول جەتكىزۋدى جانە مەملەكەت باسشىسى قاسىم-جومارت توقاەۆ العا قويعان مىندەتتەردى ءتيىمدى ىسكە اسىرۋدى قامتاماسىز ەتۋى قاجەت», دەدى ا.مامين.
وقۋ پروتسەسىن پوستكوۆيدتىك كەزەڭگە بەيىمدەگەن ءجون
ۇكىمەت وتىرىسىندا وقۋ جىلىنىڭ باستالۋىنا دايىندىق بارىسى قارالدى. بۇل جونىندە ءبىلىم جانە عىلىم ءمينيسترى اسحات ايماعامبەتوۆ, دەنساۋلىق ساقتاۋ ءمينيسترى الەكسەي تسوي, ماڭعىستاۋ وبلىسىنىڭ اكىمى سەرىكباي ترۇموۆ جانە تۇركىستان وبلىسىنىڭ اكىمى ومىرزاق شوكەەۆ بايانداما جاسادى.
2021-2022 وقۋ جىلىندا قازاقستاننىڭ
7 475 مەكتەبىندە 3,4 ملن-نان اسا ادام, ونىڭ ىشىندە 1 سىنىپتا 380 مىڭنان اسا بالا وقيدى. وقۋ ءداستۇرلى فورماتتا جۇرگىزىلەدى. ۆاكتسينا العان پەداگوگتەر جۇمىسقا جىبەرىلەدى. قازىرگى ۋاقىتتا ۆاكتسينالاۋعا جاتاتىن پەداگوگتەردىڭ 93,1%-ى جانە ءبىلىم بەرۋ مەكەمەلەرىنىڭ باسقا قىزمەتكەرلەرىنىڭ 88,4%-ى ۆاكتسينا الدى.
ءبىلىم جانە عىلىم ءمينيسترى اسحات ايماعامبەتوۆ بايانداماسىندا اتاپ وتكەندەي, جاڭا وقۋ جىلىنا دايىندىق جوسپارعا سايكەس جۇرگىزىلۋدە. وقۋ جىلى ءداستۇرلى تۇردە 1 قىركۇيەكتەن باستالادى دەپ جوسپارلانۋدا. ءبىر وقۋ جىلى 34 اپتانى قامتيدى. سونىمەن قاتار تاعى 4 اپتاعا جازعى مەكتەپتى ۇيىمداستىرۋ كوزدەلگەن. جاڭا مەكتەپتەر جەلىسىنىڭ ءوسۋى بايقالادى, ولاردىڭ اراسىندا مەملەكەتتىك مەكتەپتەرمەن قاتار جەكە مەكتەپتەر دە بار. مەملەكەتتىك مەكتەپتەر جەلىسى – 7 475, جەكەمەنشىك مەكتەپتەر – 298. جالپى وقۋشىلار سانى – 3,6 ملن. كوللەدجدەر كونتينگەنتى – 470 مىڭ, جوو-لار كونتينگەنتى – 650 مىڭ ستۋدەنت.
ءمينيستردىڭ ايتۋىنشا, بارلىق ءبىلىم بەرۋ ۇيىمىندا ءبىلىم بەرۋ پروتسەسىنە قاتىسۋشىلاردىڭ قاۋىپسىزدىگىن قامتاماسىز ەتۋ جانە دەنساۋلىعىن ساقتاۋ ماقساتىندا سانيتارلىق-ەپيدەميالىق شارالار قابىلدانادى. اتاپ ايتساق: كۇندەلىكتى تەرمومەتريا, جەلدەتۋ, كۆارتستاۋ, دەزينفەكتسيا; Ashyq جۇيەسىن قولدانۋ, 18 جاستان اسقان ستۋدەنتتەردى, مۇعالىمدەردى جانە باسقا قىزمەتكەرلەردى 100% ۆاكتسينالاۋ. مەكتەپكە بوگدە ادامداردىڭ كىرۋىنە, بۇقارالىق ءىس-شارالار وتكىزۋگە تىيىم سالىنادى. ء«بىر سىنىپ – ءبىر كابينەت» جۇيەسى قولدانىلادى. «كوللەدجدەر مەن جوعارى وقۋ ورىندارىندا ۇزىلىستەر ءارتۇرلى ۋاقىتتا بولىپ, ماسكا تاعۋ رەجىمى ساقتالادى», دەدى ا.ايماعامبەتوۆ.
جاڭا وقۋ جىلىندا بالاباقشالار 20-25 بالا توپتارىمەن شتاتتىق رەجىمدە جۇمىس ىستەيدى. مەكتەپتەردە 1-11-سىنىپتاردى وقىتۋ سانيتارلىق شەكتەۋلەردى ساقتاي وتىرىپ, شتاتتىق رەجىمدە جۇرگىزىلەدى. كوللەدجدەر مەن جوعارى وقۋ ورىندارىنىڭ بارلىق كۋرس ستۋدەنتتەرى شتاتتىق رەجىمدە وقيدى.
مەكتەپتەردە قوسىمشا اۋىسىمدار ۇيىمداستىرىلادى, ۇزىلىستەرگە ۋاقىت بەلگىلەنەدى جانە وقۋشى نەمەسە ونىڭ اتا-اناسى اۋىرعان جاعدايدا قاشىقتان وقىتۋ فورماتىنا اۋىستىرۋ بويىنشا شارالار قابىلدانادى. ء«بىلىم كۇنى» تاۋەلسىزدىكتىڭ 30 جىلدىعىنا ارنالادى جانە العاشقى قوڭىراۋ ءداستۇرلى فورماتتا تەك 1-سىنىپ وقۋشىلارى ءۇشىن وتەدى. 1-سىنىپ وقۋشىلارىنا «الىپپە» («بۋكۆار») تابىستالادى. 2-11-سىنىپ وقۋشىلارىنا بەكىتىلگەن كابينەتتەردە سىنىپ ساعاتتارى وتكىزىلەدى. جاڭا وقۋ جىلىندا مەكتەپ فورماسى بويىنشا تالاپتار ساقتالادى, سونىمەن قاتار مەكتەپكە كلاسسيكالىق ستيلدەگى ىڭعايلى كيىممەن كەلۋگە رۇقسات ەتىلەدى.
ماسەلەنى قورىتىندىلاعان ۇكىمەت باسشىسى وقۋشىلار مەن پەداگوگتەردىڭ قاۋىپسىزدىگى مەن دەنساۋلىعىن ساقتاۋدى قامتاماسىز ەتۋ بويىنشا ۇيىمداستىرۋشىلىق ماسەلەلەردى بارىنشا تەزدەتىپ شەشۋ قاجەتتىگىن اتاپ ءوتتى. ءبىلىم جانە عىلىم, دەنساۋلىق ساقتاۋ مينيسترلىكتەرىنە, وڭىرلەردىڭ اكىمدىكتەرىنە جاڭا وقۋ جىلىندا مەكتەپكە دەيىنگى جانە ورتا ءبىلىم بەرۋ ۇيىمدارىندا, سونىمەن قاتار كوللەدجدەر مەن جوعارى وقۋ ورىندارىندا وقۋدى شتاتتىق رەجىمدە قامتاماسىز ەتۋ تاپسىرىلدى. بۇل رەتتە ءاربىر مەكتەپكە ءداستۇرلى فورماتتا وقۋ بويىنشا ناقتى ۇسىنىمدار جەتكىزىلۋى ءتيىس.
پرەمەر-مينيستر وسى جىلعى 25 تامىزعا دەيىن مەديتسينالىق قارسى كورسەتىلىمدەرى بار ادامداردان باسقا, پەداگوگتەر مەن تەحپەرسونالدى ۆاكتسينالاۋمەن 100% قامتاماسىز ەتۋدى, وسى جىلعى 20 تامىزعا دەيىن مەكتەپتەردى سانيتارلىق تالاپتارعا سايكەس (كۆارتستەۋ, دەزينفەكتسيا, ماسكا تاعۋ رەجىمى, كۇندەلىكتى تەرمومەتريا جانە ت.ب.) قابىلداۋدى اياقتاۋدى تاپسىردى. بارلىق ءبىلىم بەرۋ ۇيىمىندا پەداگوگتەر, قىزمەتكەرلەر مەن اتا-انالار ءۇشىن Ashyq جۇيەسى ەنگىزىلەدى. ۇكىمەت باسشىسى وسى جىلدىڭ 25 تامىزعا دەيىن, ەڭ الدىمەن, كەستەدەن كەشىگىپ وتىرعان پاۆلودار جانە تۇركىستان وبلىستارىندا وقۋلىقتاردى مەكتەپتەرگە كەستەگە سايكەس تولىعىمەن جەتكىزۋدى تاپسىردى.
ا.مامين كەستەدەن ارتتا قالعان مەكتەپتەردە جوندەۋ جۇمىستارىن اياقتاۋ قاجەتتىگىن ايتتى. جوندەۋ جۇمىستارى اياقتالماعان مەكتەپتەردىڭ ەڭ كوپ سانى الماتى (9), قوستاناي (6) جانە باتىس قازاقستان (5) وبلىستارىندا ەكەنى اتاپ ءوتىلدى. پرەمەر-مينيستر 25 تامىزعا قاراي ءبىلىم بەرۋ ۇيىمدارىنىڭ وقۋ جىلىن باستاۋعا 100% دايىن بولۋىن قامتاماسىز ەتۋدى, بالالاردىڭ قاۋىپسىزدىگى, تاماقتاندىرۋ جانە مەكتەپكە جەتكىزۋ بويىنشا بارلىق ماسەلەلەردىڭ شەشىمىن تابۋدى تاپسىردى.
