ءتۋريزمدى دامىتامىز دەسەك, اۋەلى جولىمىزدى جاماپ-جاسقاپ الۋىمىز كەرەك. ونسىز ساياحاتشىلاردى تارتۋ وڭاي ەمەس. جاعالاۋىن انتالياعا تەڭەپ جۇرگەن الاكولگە جەتۋدىڭ ءوزى قيامەت-قايىم. جولاۋشىنىڭ جۇيكەسىن جۇقارتىپ, دىڭكەسىن قۇرتىپ جىبەرەدى. كولىكتىڭ ءجۇرۋ بولىگىنەن ساۋ-تامتىق قالمايدى. اسىرەلەپ ايتىپ وتىرعان جوقپىز, قىپ-قىزىل شىندىق. ۋاقىتشا سالعان اينالما جولدىڭ ءوزى ويدىم-ويدىم. دىتتەگەن جەرىڭە جەتكەنشە شاڭ جۇتاسىڭ. نەگىزىندە جولشىلار سۋ شاشىپ, جولدىڭ شاڭىن باسىپ وتىرۋى كەرەك ەدى. ول دا جوق.
– وتكەن اپتادا جەكە كولىگىممەن الاكولگە بارىپ قايتتىم. بارعانىمىز بار بولسىن. دەمالىسىمىزدى جول جەلكەدەن شىعاردى. شىنىن ايتۋ كەرەك, وسكەمەننەن شىعا بەرە, قاسىم قايسەنوۆ كەنتىنىڭ تۇسىندا تەحنيكالار قاربالاس. ال قالباتاۋدان تاسكەسكەننىڭ بۇرىلىسىنا دەيىنگى جولدان اسىر-گۇسىر جۇمىس بايقامادىم. مىنا قارقىنمەن جولدى كەلەسى جىلى دا اياقتاي المايتىن سياقتى, – دەپ كۇماندانادى وسكەمەندىك دوسان دۇيسەنوۆ.
كۇمانمەن قاراپ جۇرگەن جالعىز ول ەمەس. وسكەمەن – اياگوز, تارباعاتاي, ءۇرجار اراسىندا ۇنەمى جۇرەتىن تاكسيشىلەردىڭ پىكىرى دە – وسى. ولار دا كۇرە جول جۋىق ارادا جوندەلە قويادى دەگەن ۋادەگە سەنبەيدى.
– اۋىلدا باسقا جۇمىس بولماعان سوڭ قولدان كەلەرى وسى, تاكسيلەتەمىز. بىراق تاپقان-تايانعان تيىننىڭ جارتىسى كولىكتىڭ تەتىگىنە كەتەدى. دوڭگەلەكتىڭ ءوزى 10-15 مىڭ تەڭگە تۇرادى. ال جول جۋىق ارادا تولىق اياقتالادى دەگەن ۋادەگە سەنبەيمىز, – دەيدى تاكسيشى ارحات راقىمانوۆ.
جۋىردا جول قۇرىلىسى سالاسىندا جۇمىسىن دۇرىس اتقارماعان «قازاۆتوجول» ۇك» اق باسقارما توراعاسى, يندۋستريا جانە ينفراقۇرىلىمدىق دامۋ مينيسترلىگى اۆتوموبيل جولدارى كوميتەتىنىڭ توراعاسى قىزمەتىنەن بوساتىلعان. بۇل شارا باسقا باسشىلارعا ساباق بولدى ما, ۋاقىت كورسەتەر. ال ازىرشە جول قۇرىلىسى بالەندەي قارقىن الىپ كەتكەن جوق. «قازاۆتوجول» ۇلتتىق كومپانياسى» اق شىعىس قازاقستان وبلىستىق فيليالىنىڭ ديرەكتورى ەرلان قالىموۆتىڭ ايتۋىنشا, ومبى – مايقاپشاعاي, وسكەمەن – تالدىقورعان باعىتىنداعى كۇرە جولداردى قايتا جاڭارتۋ جۇمىستارى 2022 جىلى اياقتالادى.
– ومبى – مايقاپشاعاي اۆتوموبيل جولىندا مەملەكەتتىك ەمەس قارىز ەسەبىنەن قايتا جاڭارتۋ جۇمىستارىن «سينسين» كومپانياسى جۇرگىزىپ جاتىر. ەپيدەميالىق جاعدايعا بايلانىستى باسقا مەملەكەتتەردەن جۇمىسشى كۇشى كىرە المادى, تەحنيكالاردى قۇرىلىس ورىندارىنا جەتكىزۋ ءۇشىن كوپ ۋاقىت جوعالتتىق, – دەيدى ە.قالىموۆ.
ال قالباتاۋ – مايقاپشاعاي باعىتىنداعى 415 شاقىرىم جولدىڭ ءبىراز بولىگىنە قاتتى قابات توسەلگەن. جوبا بويىنشا, قايتا جاڭارتۋ جۇمىستارىنا 157 ملرد تەڭگە بولىنگەنى بەلگىلى. دەمەك, جولشىلار قارجىدان قىسىلماق ەمەس. تەك مەملەكەت قارجىسى ءتيىمسىز جۇمسالىپ كەتپەسە بولدى. سەبەبى مەملەكەت باسشىسى قاسىم-جومارت توقاەۆ: «ەلىمىزدەگى رەسپۋبليكالىق جانە جەرگىلىكتى جولداردىڭ جاعدايىنا قاتىستى ازاماتتاردىڭ ايتىپ جۇرگەن سىنى ورىندى. ساپاسىز جاسالعان جول جىل سايىن جوندەۋدى قاجەت ەتەدى جانە بۇعان مەملەكەتتىڭ قارجىسى ءتيىمسىز جۇمسالىپ جاتىر», دەگەن ەدى. وتە ورىندى سىن.
– اتالعان تاسجولدىڭ بويىندا «سيتيك كونستراكشن», «ك-دورستروي» اق جانە «توديني تسەنترال ازيا» جشس قايتا جاڭارتۋ جۇمىستارىن جۇرگىزىپ جاتىر. «نۇرلى جول» باعدارلاماسى اياسىندا سالىنىپ جاتقان جول 2022 جىلى تولىقتاي قولدانىسقا بەرىلەدى, – دەپ سەندىردى ە.قالىموۆ.
ءيا, پرەمەر-مينيستر اسقار ءماميننىڭ اكىمدەرگە قويعان تالابى ورىندالمادى. جول سالۋ جۇمىستارى سوزبالاڭعا سالىندى. ول ولقىلىقتى پاندەميانىڭ سالدارى دەلىك. زامان تىنىش بولسا, «قازاۆتوجول» ۇلتتىق كومپانياسى» اق باسشىلىعى ۋادە ەتكەندەي, ەكى باعىتتاعى كۇرە جولدار 2022 جىلى تولىعىمەن اياقتالىپ قالار.
شىعىستاعى جول قۇرىلىسى مۇنىمەن توقتامايدى. الداعى ۋاقىتتا اياگوز – قاراعاندى اراسىنا جاڭا جول تۇسەدى. وسكەمەن – شەمونايحا, وسكەمەن – سەمەي, سەمەي – بارناۋىل جولدارىنا قايتا قۇرۋ جۇرگىزىلەدى. سونىمەن قاتار وسكەمەن – راحمان قاينارى باعىتىنداعى كۇرە جولدىڭ دا كۇردەلى تۇسى اياقتالعان جوق.
ەرلان قالىموۆ ايتقانداي, جول ساپاسىن قاداعالاۋ جۇمىستارىنا كەز كەلگەن ەل ازاماتى ارالاسىپ, كەمشىن تۇستارىن ايتىپ وتىرۋىنا بولادى. ول ءۇشىن مالىمەتتى 1403 نومىرىنە بەينەجازبا, فوتوسۋرەتىمەن جولداي الادى.
شىعىس قازاقستان وبلىسى
