ەكولوگيا • 04 تامىز، 2021

قازاقستاندا ورمان القاپتارى ازايا ما؟

43 رەت كورسەتىلدى

الەۋمەتتىك جەلىلەردە «قازاقستانداعى ورمانداردىڭ جويىلۋى تۋرالى» اقپارات تارادى، دەپ حابارلايدى Egemen.kz ەكولوگيا، گەولوگيا جانە تابيعي رەسۋرستار مينيسترلىگىنىڭ ءباسپاسوز قىزمەتىنە سىلتەمە جاساپ.

قازاقستان شاعىن ورماندى ەل بولىپ تابىلادى. قازىرگى ۋاقىتتا ورمان قورىنىڭ اۋدانى (بارلىق ورماندار مەن ورمان شارۋاشىلىعىن جۇرگىزۋگە ارنالعان جەرلەردىڭ جيىنتىعى) 30،4 ملن گەكتاردى قۇرايدى، ونىڭ ىشىندە 13،3 ملن گەكتارى ورمانمەن قامتىلعان (ەل اۋماعىنىڭ 11% - ى).

قازاقستاندا ورماندار بىركەلكى ورنالاسپاعان. ورمان وسىمدىكتەرىنىڭ تۇرلەرى تابيعي ايماقتاردىڭ ارتۇرلىلىگىمەن انىقتالادى. ءشولدى ايماقتا سەكسەۋىل ورماندارى وسەدى. تاۋلى ورمانداردىڭ نەگىزگى بولىگى التاي، جوڭعار جانە ىلە الاتاۋىنىڭ قارا قىلقاندى ەكپەلەرىمەن كومكەرىلگەن. دالا جانە ورماندى دالا ايماقتارىنىڭ جازىق بولىگىندە قايىڭ-كوكتەرەك شوق ورماندار، قاراعايلى ورماندار، ەرتىس ءوڭىرىنىڭ جالدى ورماندارى وسەدى.

سەكسەۋىل ورماندارى ورمانمەن قامتىلعان بارلىق القاپتىڭ 50،5% - ىن، قىلقان جاپىراقتى ەكپەلەر - 13،5% - ىن، جۇمساق جاپىراقتى ەكپەلەر-11،7% - ىن قۇرايدى.

2000 جىلى ورمان قورىنىڭ اۋدانى 26،5 ملن گا قۇرادى، ونىڭ 11،4 ملن گا - ورمانمەن قامتىلعان، ورماندىلىعى - 4،1%. 2015 جىلى بۇل كورسەتكىشتەر تيىسىنشە 29،3 ملن گا، 12،6 ملن گا جانە 4،6% - دى قۇرادى.

2020 جىلى ورمانمەن قامتىلعان القاپ 1،6 ملن گەكتارعا ۇلعايىپ، 13،1 ملن گەكتاردى قۇراعانىن اتاپ وتكەن ءجون.

وسىلايشا، 2001-2020 جىلدارى ەل 60،1 مىڭ گا ورمان جامىلعىسىن جوعالتتى دەگەن اقپارات راستالمادى. كەرىسىنشە، جالپى ورمان القاپتارىنىڭ ۇلعايۋ ءۇردىسى بايقالادى. بۇعان وڭىرلەردەگى ورمان قورىنىڭ جاي-كۇيى تۋرالى دەرەكتەر دالەل.

ماسەلەن، شىعىس قازاقستان وبلىسىندا بۇگىندە ورمان قورىنىڭ اۋدانى 3،8 ملن گەكتاردى قۇرايدى، ونىڭ 2 ملن گەكتارى ورمانمەن قامتىلعان. 2001 جىلمەن سالىستىرعاندا بۇل كورسەتكىشتەر تيىسىنشە 349،3 مىڭ گا جانە 252،2 مىڭ گەكتار ۇلعايدى.

قوستاناي جانە سولتۇستىك قازاقستان وبلىستارىندا ورمان قورلارىنىڭ اۋدانى 2001 جىلدان باستاپ 621،1 مىڭ گەكتارعا، ورمانمەن قامتىلعاندار - 54،8 مىڭ گەكتارعا ۇلعايدى، بۇگىندە بۇل كورسەتكىشتەر ەكى وبلىس بويىنشا تيىسىنشە 1،8 ملن گا جانە 815 مىڭ گا قۇرايدى.

اقمولا وبلىسىنىڭ ورمان قورى بۇگىندە 1 ملن گەكتاردان استام اۋماقتى الىپ جاتىر، ونىڭ ىشىندە 384،8 مىڭ گەكتارى ورمانمەن قامتىلعان، كورسەتكىشتەردىڭ ءوسۋى تيىسىنشە 251،3 مىڭ گەكتاردى جانە 66،4 مىڭ گەكتاردى قۇرادى.

قازىرگى ۋاقىتتا الماتى وبلىسىندا ورمان قورىنىڭ اۋدانى 5411،5 مىڭ گەكتاردى قۇرايدى، ونىڭ 2005،9 مىڭ گەكتارى ورمانمەن قامتىلعان. كورسەتكىشتەردىڭ ءوسۋى تيىسىنشە 556،9 مىڭ گا جانە 211،5 مىڭ گا قۇرايدى.

جوعارىدا ايتىلعانداردى قورىتىندىلاي كەلە، كوميتەت جەلىدە تارالعان اقپارات شىندىققا جاناسپايتىنىن حابارلايدى.

سوڭعى جاڭالىقتار

ۇكىمەت شيكى مۇناي باعاسىن بەكىتتى

ەكونوميكا • بۇگىن، 22:48

ۇقساس جاڭالىقتار