ۇزدىك وندىقتىڭ كوشىن «وتباسى بانك» باستاپ تۇر. جيناق بانكىنىڭ ءوسىمى 34,8 پايىزعا كوتەرىلىپ, 335,8 ملرد تەڭگە بولىپتى. سونداي-اق ۇزدىك ۇشتىكتە اتف بانك (+29,5 پايىز) پەن «الفا بانك» (+24,7 پايىز) بار. ەسكە سالايىق, اتف بانك بىلتىر جىل سوڭىندا Jusan Bank-پەن بىرىگىپ كەتكەن ەدى, دەگەنمەن پروتسەسس ءالى جالعاسۋدا.
بانك اكتيۆتەرى 20,9 پايىزعا ءوسىپ, 34,04 ترلن تەڭگەنى قۇراعان. Finprom جوباسىنىڭ جازۋىنشا, بۇل دا بانك سەكتورىنىڭ تۇراقتىلىعىن كورسەتەدى. اكتيۆتەر كورسەتكىشى بويىنشا دا ءبىرىنشى ورىندا – «وتباسى بانك» (2,33 ترلن تەڭگە). بۇل رەتتە «سبەربانك» (+52,5 پايىز) پەن Kaspi Bank-ءتىڭ دە (+27,8 پايىز) ۇلەسى مول. اكتيۆتەر كولەمى بويىنشا ءۇش بانكتى رەيتينگتىڭ انتيليدەرلەرى دەپ اتاۋعا بولادى. ولار – اتف بانك, Capital Bank جانە قىتايلىق ICBC ەنشىلەس بانكى. اتف جىل باسىنان بەرى 36 ملرد, Capital Bank 4,5 ملرد جانە ICBC 1,7 ملرد تەڭگە جوعالتقان. Capital Bank-ءتىڭ ماۋسىم ايىندا ليتسەنزياسىنان ايىرىلعانى بەلگىلى. سوندىقتان بۇل قارجى ينستيتۋتى سەكتورلىق ستاتيستيكادا سوڭعى رەت بوي كورسەتىپ وتىر. ال اتف جىل سوڭىنا دەيىن Jusan-مەن تولىققاندى قوسىلىپ ءبىتۋى ءتيىس, سودان كەيىن نارىقتان ءبىرجولا كەتەدى.
«قازاقستاندىق بانكتەر «كوروناداعدارىسقا» قاراماستان زايم بەرۋدى توقتاتقان جوق. ءبىر جىلدا ەكىنشى دەڭگەيلى بانكتەردىڭ قارىز پورتفەلى 11 پايىزعا وسكەن, 16,73 ترلن تەڭگەنى قۇراعان. دەگەنمەن بارلىق قارجى ۇيىمدارى بىردەي نەسيە بەلسەندىلىگىن ساقتاي الماي وتىر. سەكتور بويىنشا تەك 17 بانك وڭ كورسەتكىشكە يە. داعدارىسقا تولى قيىن كەزەڭدە يپوتەكالىق سەگمەنت – نەسيە نارىعىنىڭ درايۆەرىنە اينالدى, ال «وتباسى بانك» قارىز پورتفەلى بويىنشا الدا تۇر. ءبىر جىلدا 43,8 پايىزعا ءوسىم كورسەتىپ, 1,51 ترلن تەڭگەگە جەتكەن. تاعى دا «سبەربانك» پەن Kaspi Bank قارىز پورتفەلى تۇرعىسىنان «وتباسى بانكتەن» كەيىنگى ەكىنشى, ءۇشىنشى ورىنداردى بولىسەدى» دەپ جازادى Finprom. Capital (NPL 90+ ۇلەسى 88,5 پايىزدى قۇرايدى), Jusan (54,9 پايىز) جانە «ەۋرازيالىق بانكتىڭ» (9,2 پايىز) پورتفەل ساپاسى ەداۋىر ناشارلاي تۇسكەن. نارىقتان كەتكەن پاكىستان بانكتىڭ ورنىن باسقان «ەۋرازيالىق بانك» مۇنداي انتيرەيتينگكە العاش رەت ەنىپ وتىر.
سالىمدار بويىنشا جىلدىق ءوسىم – 25,4 پايىز. سالىم كولەمى 23,83 ترلن تەڭگەگە جەتتى. سالىمشىلار قارجىسىن جيناقتاۋ بويىنشا RBK Bank العاشقى ورىندا. بۇل بانك سالىمدارىن ءبىر جىلدا ەكى ەسەلەپ, 709,9 ملرد تەڭگەگە جەتكىزگەن. ەكىنشى ورىنداعى «وتباسى بانك» سالىمى ءبىر جارىم ەسە كوبەيسە, «سبەربانك» سالىمدارى 43,2 پايىزعا ارتقان. ال بولشەك سالىمدار بويىنشا حالىقتىڭ باسپاناعا دەگەن بار قارجىسىن جيىپ وتىرعان «وتباسى بانكپەن» ەشكىم تەڭدەسە المايدى. بۇل قارجى ۇيىمىنداعى سالىمدار مولشەرى 1,36 ترلن تەڭگەگە تەڭ. ودان كەيىن Kaspi Bank (+37,8 پايىز) جانە «بانك تسەنتركرەديت» (+26,8 پايىز).
