ونەر • 03 تامىز، 2021

رۋح بەينەسى

38 رەت كورسەتىلدى

ايپارا جۇزىنەن اقيقاتتىڭ نۇرى ەسكەن الداسپان اقىننىڭ بەينەسىندە رۋح­ بار. جانارىنان تۇنعان ىزعاردان ۇلتقا دەگەن جاناشىرلىقتىڭ لەبى ەسەدى. كورگەن كوز ۇزاق قاراۋعا باتپايدى. قايتكەنمەن دە پوەزيالىق پورترەتتىڭ مىسى باسادى. جىلدار جانارىن بۋلاسا دا وسى ءتۇر، وسى كەيىپ ماڭگىلىكتىڭ تورىندە. بورىلەرمەن بورىلەرشە بەلدەسكەن اقىننىڭ تۇلعاسى بولاشاقتىڭ بەت­تۇزەر رۋحاني قۇبىلاسىنا اينالۋى زاڭدىلىق!

كوكىرەگىنىڭ كومبەسىنە كوز سالساڭ تىم كۇڭگىرت. جاندى ۋاتادى، كوڭىلدى الا­سا­پىران ەتەتىن كۇشكە يە. كارتينادا جۇ­رەكتى قازاقتىڭ ءجۇزى مەنمۇندالاپ تۇر. تۋىن­دىنىڭ تاقىرىبى – «اقىننىڭ باسى». اۆتورى – تانىمال سۋرەتشى اماندوس اقاناەۆ. تۇيعىن مىنەزدى تالانتتىڭ كەنەپ بەتىندەگى كەسكىنى جىگەرىڭدى قايرايدى. مۇنى جاسىرۋ مۇمكىن ەمەس.

بۇل كارتينانى پسيحولوگيالىق پورترەت جانرىنا جاتقىزۋعا ابدەن بولادى. كوركەم پورترەت ادامنىڭ ىشكى الەمىن جانە كۇيزەلىسىن، ادامي سەزىمدەرى مەن ارەكەتتەردىڭ الۋان تۇرلىلىگىن كورسەتۋگە، ونىڭ تۇلعاسىن شىنايىلىقپەن جەتكىزۋگە ارنالعان. سۋرەتشى ءوز تۋىندىسىندا حا­لىق جازۋشىسى، داڭقتى اقىن، قوعام قاي­راتكەرى ولجاس سۇلەيمەنوۆتى بەينەلەگەن.

وتكەن عاسىردىڭ اياعىندا سۋرەتشى اماندوس اقاناەۆ ءوز شەبەرحاناسىندا اقىن ولجاس سۇلەيمەنوۆپەن كەزدەسەدى. قايسار قالامگەردىڭ «قىش كىتابى» سۋرەت­شىنىڭ ەڭ سۇيىكتى شىعارماسىنىڭ ءبىرى بولا­تىن. قالامگەر مەن قىلقالام شە­بە­رىنىڭ جۇزدەسۋى ۇلكەن دوستىققا ۇلاسادى. «از ي يا» كىتابى شىققاننان كە­يىن ايبارلى اقىن سوكپ ساياسي بيۋرو­سىنىڭ، عىلىمداعى شەنەۋنىكتەر مەن گەنە­رالداردىڭ قۋعىنىنا ءتۇستى. ايتسە دە اقىن سول الماعايىپ زاماندا كونە تۇركىلىك وركەنيەتتىڭ ماڭىزىن، ونىڭ ۇلى مادەنيەتىن جانە كونەدەن بۇگىنگە دەيىنگى جالپى الەمگە اسەرىن بايانداپ، تاريحي ادىلدىكتى قالپىنا كەلتىردى. مىنە، سۋرەتشىنى شابىتتاندىرعان سول ەرلىك-تۇعىن.

اۆتور ءوز تۋىندىسىندا ەكسپرەسسيو­نيست-سۋرەتشىلەرگە ءتان كەنەتتەن سىنعان سىزىقتار، قاراما-قايشى تۇستەر، ابستراك­تىلى پىشىندەر، اسىرۋ جانە جەڭىلدەتۋ سىندى امالداردى قولدانادى. كەيىپكەرىنىڭ مىنەزىن جەتكىزۋ ءۇشىن تۇستەردىڭ سيمۆوليكاسىن پايدالانادى. ول مودەلىنە قىزىل ءتۇستى جەيدە كيگىزەدى. سەبەبى قىزىل ءتۇس كوركەم ونەردە – باتىلدىقتى، قۋاتتى، تاباندىلىقتى، ادامگەرشىلىكتى، بيلىكتى، سوعىستى ءھام قاندى بىلدىرەدى. پورترەتكە جان ءبىتىرۋ ءۇشىن سۇلەيمەنوۆتى كوك فونعا ورنالاستىرادى. مۇندا كوك ءتۇس – نامىستىڭ، ادالدىقتىڭ، شىنايىلىقتىڭ جانە مىنسىزدىكتىڭ ءتۇسى.

اشىق قىزىل ءتۇستى جەيدە مەن قويۋ شاشتىڭ قاراما-قايشىلىعى، ياعني جا­رىق پەن كولەڭكەنىڭ ءانتونيمى كارتينا كەيىپكەرىنىڭ مىنەزى مەن ەموتسيالىق احۋالىن كورسەتەدى. سۇلبالاردىڭ اشىقتىعى، بوياۋلاردىڭ ايقىن جاعىلۋى، تۇستەردىڭ قاراما-قايشىلىعى ءومىردىڭ يلليۋزياسى مەن قوزعالىسىن جاسايدى. قارا­ڭىز­شى، اقىن ولجاس سۇلەيمەنوۆ ءبىزدىڭ كوز الدىمىزعا قايراتكەر-اقىن، شىندىق جولىنداعى كۇرەسكەر، ومىرلىك پوزيتسياسى بەلسەندى ادام رەتىندە ەلەستەيدى. ونىڭ تاۋ تۇلعاسى اسقاق جازىلعان.

 

سوڭعى جاڭالىقتار

قانشا ادام ۆاكتسينا سالدىردى؟

كوروناۆيرۋس • بۇگىن، 09:16

ۇقساس جاڭالىقتار