وقيعا • 02 تامىز، 2021

شاحتينسكىدەگى بوكسشىنىڭ ءولىمى: سوت ۇكىمى شىقتى

253 رەت كورسەتىلدى

قاراعاندى ​​وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى شاحتينسك قالاسىنىڭ بوكسشىسى يۆان تاتسيدىڭ ولىمىنە قاتىستى ءىس بويىنشا ۇكىم شىعاردى. ايىپتالۋشى 11 جىلعا باس بوستاندىعىنان ايىرىلدى، دەپ حابارلايدى Egemen.kz.

قىلمىستىق ءىستى قاراعاندى ​​وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى قايرات قاسىموۆ قارادى. سوتتالۋشى قر قك-نىڭ 99-بابى 1-بولىگى «ادام ءولتىرۋ» بويىنشا سوتقا تارتىلدى. سوت ونى كىنالى دەپ تانىپ، 11 جىلعا باس بوستاندىعىنان ايىرۋ جازاسىن قاتاڭ رەجيمدەگى مەكەمەدە وتەۋگە ۇكىم شىعاردى.

«2020 جىلدىڭ 20 تامىزىندا شاحتينسك قالاسىندا سوتتالۋشى دوستارىمەن بىرگە اۆتوۆوكزال ارتىنا يۆان تاتسيدى بۇرىن بولعان كەلىسپەۋشىلىكتى شەشۋ ءۇشىن شاقىرعان. سول توبەلەس كەزىندە يۆان پىشاقتالعان. سوتتالۋشى پىشاعىن جولدىڭ بويىنا لاقتىرىپ، وقيعا ورنىنان قاشىپ كەتتى. ونىڭ كىناسى ايعاقتارمەن، بەينەجازبالارمەن جانە سوت-مەديتسينالىق ساراپتامالارمەن دالەلدەندى»، دەدى قاراعاندى ​​ وبلىستىق قىلمىستىق ىزدەستىرۋ باسقارماسىنىڭ ءباسپاسوز قىزمەتىندەگىلەر.

ايتا كەتەيىك، قر قك-نىڭ 99-بابىنىڭ سانكتسياسى بويىنشا 8 جىلدان 15 جىلعا دەيىن باس بوستاندىعىنان ايىرۋ جازاسى قاراستىرىلعان.

«سوتتالۋشى بۇرىن قىلمىستىق جاۋاپكەرشىلىككە تارتىلماعان. ول جاساعان ىسىنە وكىنگەن جوق. سوندىقتان، ول قاتاڭ تارتىپتەگى قىلمىستىق-اتقارۋ جۇيەسى مەكەمەسىندە جازاسىن وتەي وتىرىپ، 11 جىلعا باس بوستاندىعىنان ايىرىلدى. سوت ۇكىمى زاڭدى كۇشىنە ەنگەن جوق»، دەدى سوت.

ەسكە سالايىق، 2020 جىلدىڭ 20 تامىزىنا قاراعان ءتۇنى شاحتينسك قالاسىنىڭ ورتالىق اۋرۋحاناسىنا پىشاق جاراقاتىمەن 24 جاستاعى قالا تۇرعىنى جەتكىزىلگەن. جاس جىگىت ەس-ءتۇسسىز جاتقان. دارىگەرلەر بارلىق كۇش-جىگەرلەرىن سالعانىنا قاراماستان جىگىتتى امان الىپ قالا المادى. كەيىن مارقۇمنىڭ كاسىپقوي بوكسپەن اينالىسقانى بەلگىلى بولدى. ونى ءولتىردى دەگەن كۇدىكپەن شاحتينسك قالاسىنىڭ 22 جاستاعى تۇرعىنى ۇستالدى. قايتىس بولعان ادام مەن ۇستالعان جىگىت بۇرىن دوس بولعان.

 

 

سوڭعى جاڭالىقتار

ۇكىمەت شيكى مۇناي باعاسىن بەكىتتى

ەكونوميكا • 24 قىركۇيەك، 2021

قىتاي مەن قازاقستان جۇك تاسىمالى ارتقان

ەكونوميكا • 24 قىركۇيەك، 2021

ۇقساس جاڭالىقتار