الەم • 01 تامىز، 2021

تۇركياداعى الاپات ءورت

289 رەت كورسەتىلدى

تۇركيانىڭ ءبىراز قالاسى ورتكە وراندى. سەنبىدە ەل پرەزيدەنتى رەجەپ تايپ ەردوعان ءورت شىققان وڭتۇستىكتەگى قالالاردى اپاتتى ايماق دەپ جاريالادى.

سارسەنبىدە باستالعان اپات ورماندى، ەلدى مەكەندەردى شارپىپ، ەندى ۇلكەن كۋرورتتارعا جەت­كەن. ەل بيلىگى ازاماتتاردى ەۆاكۋاتسيالاۋعا ءماجبۇر بولدى. اۋىل شارۋاشىلىعى جانە ورمان ءمينيسترى بەكير پاكدەميرلي سەنبىدە تىركەلگەن 98 ءورتتىڭ 88-ءى سوندىرىلگەنىن حابارلادى.

قاتتى جەلدىڭ اسەرى مەن اۋا تەمپەراتۋراسىنىڭ جوعارى­لا­ۋى­نان ءتىلسىز جاۋدى باقىلاۋعا الۋ مۇمكىن بولمادى. ماناۆگات قالا­سىندا 5 كىسىنىڭ، ال مار­ما­ريس­تە 1 ادامنىڭ ورتتە كۇيىپ، قازا بولعانى ءمالىم بولدى. ەكى قالا دا – جەرورتا تەڭىزىنە جاقىن ورنا­لاسقان تۋريستىك مەكەن.

دەنساۋلىق ساقتاۋ ءمينيسترى فاحرەتتين كوجا ءبىر عانا ماناۆ­گات­تاعى ورتتەن 400 ادام زارداپ شەكتى دەپ حابارلادى. ولاردىڭ 10-ى ءالى دە ەم قابىلداپ جاتىر. ال مارماريستە 159 ادامنىڭ دەنساۋلىعىنا زاقىم كەلگەن. 1 ادام كۇيىك شالىپ، اۋرۋحاناعا جات­قىزىلدى.

حاتاي قالاسىنا جەتكەن ءورت تە قاتتى جەلدىڭ سالدارىنان باقى­لاۋ­دان شىققان. ونىڭ ۇستىنە ءتىل­سىز جاۋ ادام كوپ شوعىرلانعان ورىندارعا دەيىن جەتكەن.

تۇركيا بۇقارالىق اقپارات قۇ­رالدارى ەگەي تەڭىزىنىڭ جا­عا­سىن­دا ورنالاسقان بودرۋم­دا­عى قوناقۇي تۇرعىندارى دا ەۆاكۋا­تسيالاۋدى سۇراعانىن جازادى. ولاردى قۇتقارۋ ءۇشىن جەكە ياحتالار مەن كەمەلەر شاقىرىلعان.

ءورت بولعان جەرلەردى پرەزيدەنت ەردوعان تىكۇشاقپەن ارالاپ شىقتى. ودان كەيىن ول ايماق­تار­دى رەسمي تۇردە اپاتتى ايماق دەپ جاريالادى.

«حالىقتى قۇتقارۋ ءۇشىن قاجەت شارالاردى، قولدان كەلگەننىڭ ءبارىن ىستەيمىز. ازاماتتاردىڭ شىعىنىن جابۋ، مۇمكىندىكتەرىن ارتتىرۋ جوسپارلانىپ وتىر»، دەدى مەملەكەت باسشىسى.

تۇركيانىڭ وڭتۇستىگىندەگى ماناۆگات قالاسىندا وتكەن ءباس­پا­­سوز ءماسليحاتىندا ەردوعان ان­كا­را وقيعانى ساياساتتاندىرۋعا تىرىسپاسا دا، ادەيى ۇيىم­داس­تى­رىل­دى دەگەن نۇسقانى دا جوققا شىعارمايتىنىن جانە ءورتتىڭ سەبەپتەرىن انىقتاۋ ءۇشىن تەرگەۋ جۇرگىزىلىپ جاتقانىن ايتتى. ء«بىز ءورتتىڭ سەبەپتەرىن مۇقيات زەرت­تەي­مىز. ەگەر ءوز وتانىن ورتەۋگە تىرىسقان ساتقىندار بولسا، ولار ەڭ اۋىر جازاعا تارتىلادى»، دەدى تۇرىك ەلىنىڭ باسشىسى.

تۇركيا بۇرىن ورىن العان ورمان ورتتەرىندە «كۇردىستان جۇمىسشى پارتياسى» مەن باسقا دا تىيىم سالىنعان توپتاردى ايىپتاعان ەدى.

ەردوعان ۇكىمەتتەن ۇيلەرىن نە­مەسە اۋىلشارۋاشىلىق جەرلە­رىن جوعالتقان وتباسىلارعا وتەم­اقى تولەنەتىنىن حابارلادى. ونىڭ ايتۋىنشا، زارداپ شەككەن­دەر­گە سالىقتار، الەۋمەتتىك قام­سىز­دان­دىرۋ جانە نەسيە تولەم­دە­رىن كەشىكتىرىپ تولەۋگە رۇقسات بەرىلىپ، شاعىن بيزنەسكە نولدىك پا­يىزدىق نەسيەلەر ۇسىنىلادى.

«قايتىس بولعاندارعا قۇداي­دىڭ راقىمىن تىلەۋدەن باسقا ەش­تەڭە ىستەي المايمىز، بىراق ءبىز ور­تەنگەن دۇنيەنى باسقامەن الماس­­­تىرا الامىز»، دەدى ول.

ەردوعان ورتپەن كۇرەسەتىن ۇشاق­­تاردىڭ سانى 6-دان 13-كە دە­يىن جەتكىزىلگەنىن مالىمدەي كەلە، ۋكراينا، رەسەي، ازەربايجان جانە يراننان ۇشاقتار جىبە­رىل­گە­نىن جانە مىڭداعان تۇرىك اسكەرى، سونداي-اق ونداعان تىك­ۇشاق­تار مەن قاشىقتان باس­قا­رى­لاتىن ۇشاقتار ءورت سوندىرۋگە جۇ­مىلدىرىلعانىن ايتتى.

قازاقستان باسشىسى قاسىم-جومارت توقاەۆ تۇركيادا بولعان الاپات ءورت سالدارىنان ەلدىڭ ەكونوميكاسى مەن تۋريستىك بازاسىنا ورا­سان زور شىعىن كەلگەنىنە جانە ازاماتتاردىڭ دەنساۋلىعىنا اۋىر زاردابىن تيگىزگەنىنە باي­لا­نىس­­­تى تۇركيا پرەزيدەنتى رەجەپ تايپ ەردوعانعا نيەتتەس­تىك بىل­دىرگەن جەدەلحاتىن جولدادى. سونىمەن قاتار باۋىرلاس حا­لىققا گۋمانيتارلىق كومەك كور­سە­تۋگە دايىن ەكەنىن اتاپ ءوتتى.

بۇقارالىق اقپارات قۇرالدارى تۇركيا پوليتسياسى ماناۆگات قا­لا­­سىندا ورمان ورتىنە قاتى­سى بار دەگەن كۇدىكتىلەردى ۇستا­عا­نىن حابارلادى. قۇقىق قورعاۋ ورگاندارىنىڭ ايتۋىنشا، كۇدىك­تى­لەردى جەرگىلىكتى تۇرعىن بايقاپ قال­عان. «ازاماتتار كۇدىكتىنى سوت­قا بەرۋدى تالاپ ەتتى»، دەدى سىرت­­قى ىستەر ءمينيسترى مەۆليۋت چاۆۋ­شو­گلۋ.

پرەزيدەنت تەرگەۋ ىسىنە بارلاۋ قىزمەتكەرلەرىن دە جۇمىلدىرىپ، ۇلكەن زارداپ اكەلگەن ءورت سەبەبىن جەدەل انىقتاۋدى تاپسىردى.

سوڭعى جاڭالىقتار

ۇكىمەت شيكى مۇناي باعاسىن بەكىتتى

ەكونوميكا • 24 قىركۇيەك، 2021

قىتاي مەن قازاقستان جۇك تاسىمالى ارتقان

ەكونوميكا • 24 قىركۇيەك، 2021

ۇقساس جاڭالىقتار