قازاقستان • 30 شىلدە، 2021

اۋىل شارۋاشىلىعى ءمينيسترى قىزىلوردا وبلىسىنا باردى

178 رەت كورسەتىلدى

اۋىل شارۋاشىلىعى ءمينيسترىنىڭ مىندەتىن اتقارۋشى ەربول قاراشوكەەۆ ەكى كۇندىك ىسساپارمەن قىزىلوردا وبلىسىندا ءجۇر، دەپ جازادى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.

فوتو ءباسپاسوز قىزمەتىنەن

ساپاردىڭ ءبىرىنشى كۇن مينيستر ارال اۋدانىنىڭ قۇرعاقشىلىقتان زارداپ شەككەن اۋىلدارىن ارالاپ، جەرگىلىكتى حالىقپەن كەزدەستى. شارۋالاردىڭ تىنىس-تىرشىلىگىمەن تانىسىپ، اۋىل اقساقالدارىنىڭ ءوتىنىش-تىلەگىن تىڭدادى. سونداي-اق، مەملەكەت تاراپىنان كورسەتىلەتىن كومەك جايلى ايتىپ، تۇرعىنداردىڭ سۇراعىنا جاۋاپ بەردى.

بۇگىن جالاعاش، سىرداريا، شيەلى جانە جاڭاقورعان اۋداندارىن ارالادى. جالاعاش اۋدانىنداعى «بايتابىن» شارۋاشىلىعىنىڭ ءشوپ جيناۋ دايىندىعىمەن تانىستى، كەيىن سىرداريا اۋدانىنداعى جوڭىشقا ەگەتىن «ماعجان جانە ك» سەرىكتەستىگىنىڭ جۇمىسىن باعامدادى.

شيەلى اۋدانىنا جەتكەن ەربول قاراشوكەەۆ ارال اۋدانىنا كومەك رەتىندە ءشوپ جونەلتىپ جاتقان «بيدايكول» شارۋا قوجالىعىنىڭ باسشىسىمەن كەزدەسىپ، قۇرعاقشىلىقتان زارداپ شەككەن اۋدانعا كومەك كورسەتكەنى ءۇشىن العىس ءبىلدىردى.

«وزدەرىڭىز بىلەسىزدەر، ارال اۋدانىنىڭ شارۋالارى بيىل قۇرعاقشىلىقتان قاتتى زارداپ شەكتى. ءبىزدىڭ قولعا تيگەن دەرەك بويىنشا، 559 باس مال شىعىن بولعان. وسىدان كەيىن اۋدان اكىمدىگىنىڭ توتەنشە جاعداي جاريالاۋىنا تۋرا كەلدى. قازىر ماسەلە رەتىمەن شەشىلىپ كەلەدى. وبلىستىڭ بەس اۋدانىنان جانە اقتوبە وبلىسىنىڭ ىرعىز اۋدانىنان مال ازىعى جەتكىزىلەتىن بولدى. ول ءۇشىن كەلىسىم جاسالدى. مەن جەرگىلىكتى بيلىككە وسى مۇمكىندىكتى پايدالانىپ، تەز ارادا مال ازىعى قورىن جيناپ الۋدى تاپسىردىم. بۇگىنگى تاڭدا قىزىلوردا وبلىسى اكىمدىگىنىڭ رەزەرۆىنەن 250 ملن تەڭگە ءبولىندى، ونىڭ 49،5 ملن تەڭگەسى ءشوپ تاسيتىن كولىك شىعىنىن كوتەرۋگە جۇمسالادى. جالپى، بۇل جاعداي مينيسترلىكتىڭ تۇراقتى باقىلاۋىندا بولادى»، دەدى ە.قاراشوكەەۆ.

ءمينيستردىڭ مىندەتىن اتقارۋشى مال سۋاراتىن قۇدىق سالۋ جانە سۋ بوگەتتەرىن قالپىنا كەلتىرۋ جۇمىستارى تۋرالى دا ايتتى. مال ازىعىنىڭ قىمباتتاۋىن دا نازاردان تىس قالدىرمادى.  ە.قاراشوكەەۆتىڭ ايتۋىنشا، «قازاقستان تەمىر جولى» ۇلتتىق كومپانياسى باسقا وڭىرلەردەن جەم-ءشوپ تاسىمالداۋعا ارنايى جەڭىلدىك بەرەتىن بولدى.

«بۇگىنگى كۇنى وبلىستا 347 مىڭ توننا مال ازىعى دايىندالدى، بۇل قاجەتتىلىكتىڭ 45%-ىن قۇرايدى. وڭىردە جۇمىستى ۇيلەستىرەتىن وبلىستىق جانە اۋداندىق شتاب قۇرىلدى. مال ازىعىن دايىنداۋ جانە قامتاماسىز ەتۋ جونىندە وبلىستىق جوسپار بەكىتىلدى. سوعان سايكەس، ارنايى ءشوپ دايىنداۋ بريگادالارى، ەرىكتىلەر، «جاسىل ەل» ستۋدەنتتىك وتريادىنان جاستار دا كومەككە كەلىپ جاتىر. مىڭعا جۋىق ادامنىڭ قاتىسۋىمەن 114 بريگادا قۇرىلىپ، 170 اۋىل شارۋاشىلىعى تەحنيكاسى تارتىلدى»، دەدى ۆەدومستۆو باسشىسى.

ە.قاراشوكەەۆ قىزىلوردا وبلىسىنا جاساعان ساپارىنىڭ سوڭىندا جاڭاقورعان اۋدانىنداعى الما باعىن باپتاپ وتىرعان «جان-اراي» سەرىكتەستىگى، قۇس شارۋاشىلىعىمەن اينالىساتىن «ابدۋللا» شارۋا قوجالىعى جانە مال شارۋاشىلىعىمەن اينالىساتىندارعا جەم-ءشوپ دايىندايتىن «نۇربول ي» شارۋاشىلىعىنىڭ جۇمىسىمەن تانىستى.

سوڭعى جاڭالىقتار

شىمكەنتتە قوناەۆ داڭعىلى اشىلدى

ايماقتار • بۇگىن، 17:58

الماتى ماڭىندا جەر سىلكىندى

ايماقتار • بۇگىن، 16:42

دوللار ارزاندادى

ەكونوميكا • بۇگىن، 14:08

ۇقساس جاڭالىقتار