قاراعاندىدا جاس بالانى زورلاعان مەشىت مولداسىنا ۇكىم شىقتى

بۇگىن قاراعاندى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىمەن جاس قىز بالاعا قاتىستى كۇش قولدانىپ، ونىڭ دارمەنسىز كۇيىن پايدالانىپ بىرنەشە رەت زورلاۋ فاكتىسى بويىنشا قك-ءتىڭ 120-ب. 4-ب ساي ۇكىم جاريالاندى.

سوتتالۋشىنىڭ كىناسى جابىرلەنۋشىنىڭ، ونىڭ زاڭدى وكىلىنىڭ، كۋالاردىڭ ايعاقتارىمەن، ساراپتاما قورىتىندىسى جانە باسقا ماتەريالدارمەن دالەلدەندى.

ەستەرىڭىزگە سالا كەتەيىك، 2020 جىلدىڭ قاڭتار ايىندا اۋىل مەشىتىنىڭ مولداسى قىزمەتىن اتقارىپ ءجۇرىپ، سول اۋىلدىڭ ءبىر وتباسىنا ءۇي مەن مال شارۋاشىلىعىنا كومەكتەسىپ جۇرگەن. ءبىر كۇنى ۇيدە ۇلكەندەردىڭ جوقتىعىن پايدالانىپ، ءدىن قىزمەتكەرى سول ءۇيدىڭ 14 جاسار قىز بالاسىن زورلاعان. كەيىن انىقتالعانداي، ونداي ارەكەتتەردى مولدا بىرنەشە رەت قايتالاعان. سالدارىنان قىز بالا جۇكتى بولىپ قالعان.

پروكۋرور سوتتالعاندى قىلمىستىق كودەكستىڭ 120-ب. 4-ب. بويىنشا كىنالى دەپ تانىپ 20 جىلعا باس بوستاندىعىنان ايىرۋ جازاسىن تاعايىنداۋدى سۇرادى.

جابىرلەنۋشىنىڭ زاڭدى وكىلى پروكۋرورمەن كەلىستى. الايدا قورعاۋشى تاراپ سوتتالعان كىناسىن جارتىلاي مويىنداعاندىقتان، ونى كاتاڭ جازالاماۋدى سۇرادى.

ناتيجەسىندە، سوتتىڭ ۇكىمىمەن ايىپتالۋشى جاس بالانى، ونىڭ دارمەنسىز كۇيىن پايدالانىپ بىرنەشە رەت زورلاعانى ءۇشىن كىنالى دەپ تانىلىپ (قك 120-ب. 4-ب.)، وعان پەداگوگيكالىق لاۋازىمداردى جانە كامەلەتكە تولماعاندارمەن جۇمىس ىستەۋگە بايلانىستى لاۋازىمداردى اتقارۋعا ءومىر بويىنا تىيىم سالا وتىرىپ، 20 جىلعا باس بوستاندىعىنان ايىرۋ جانە جازانى وتەۋ قىلمىستىق-اتقارۋ جۇيەسىنىڭ قاۋىپسىزدىگى بارىنشا جوعارى مەكەمەسىندە تاعايىندالدى.

ء«ىس بويىنشا قىلمىستىق جاۋاپكەرشىلىك پەن جازانى جەڭىلدەتەتىن جانە اۋىرلاتاتىن ءمان-جاي انىقتالماعان. قىلمىستىق زاڭدا وسىنداي قىلمىس ءۇشىن 20 جىلعا باس بوستاندىعىنان ايىرۋ جازاسى قاراستىرىلعان. جازانى تاعايىنداۋ كەزىندە سوتتالعاننىڭ بالا كەزىنەن ءۇشىنشى توپتاعى مۇگەدەك ەكەنى، بۇرىن سوتتى بولماعانى جانە كىناسىن جارتىلاي مويىنداعانى، سونىمەن قاتار جابىرلەنۋشىنىڭ پىكىرى ەسكەرىلدى»، دەپ مالىمدەدى قاراعاندى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ءباسپاسوز قىزمەتى.