ونەر • 28 شىلدە، 2021

اۆتوپورترەت

17 رەت كورسەتىلدى

تاعى ءبىر تۋىندىعا كوزىمىز ءتۇستى. كەنەپ بەتىنە جايعاسقان بەينەگە جانار قاداساڭىز اۆتوردىڭ ءوزىن كورەسىز. ونداعى وگەي ويلاردىڭ ءوزى دە ىستىق. بوياۋلار سويلەيدى، تەك تىڭدار قۇلاق بولسا. مىڭداعان شىعارمانىڭ ىشىندە ناعىز شەبەردىڭ قولتاڭباسى الىستان مەنمۇندالايدى. بۇل كوركەم كارتينا اۆتوردىڭ اۆتوپورترەتى. عالام عاجايىبىن قىلقالام ۇشىنان تامىزعان جاننىڭ جان الەمى.

حالىق سۋرەتشىسى ءھام كەسكىندەمەشى ايشا عالىم­باەۆا ەسىمى ەلگە ەتەنە تانىس. تۋىندىنىڭ اتى – «اۆتوپورترەت». سۋرەتشى ۇلتتىق بەينەلەۋ ونەرىنە ءنار بەرگەن جاننىڭ ءبىرى. ءتىپتى قازاق كەسكىندەمەسىنىڭ التىن قورىن قۇرايتىن قازاق سۋرەتشىلەرىنىڭ العاشقى بۋىنىنا جاتادى. بۇلاي سالماق ارتىپ وتىرعان سەبەبىمىز، ول – قازاقستاننان شىققان العاشقى ايەل سۋرەتشى.

اۆتور ءوزى جەتىك بىلگەن اراب تىلىندەگى ماتىندەر ارقىلى دا قازاقتىڭ ۇلتتىق كيىمىن ەگجەي-تەگجەيلى زەرتتەپ، سۋرەتتەرىن سالىپ، جۇيەلەگەن. الماتى كوركەم جانە حرونيكالى فيلمدەر كينوستۋدياسىندا جۇمىس ىستەي ءجۇرىپ، «اباي اندەرى»، «ماحاببات پوەماسى»، «قىز بەن جىگىت»، «بۇل شۇعىلادا بولعان»، «ونىڭ ۋاقىتى كەلەدى» كينولەنتالارىنا ەسكيزدەر جاسادى.

اۆتوپورترەت – ونەردە ەڭ كۇردەلى ءھام ەرەكشە جانر. ەگەر باسقا باعىتتا جۇمىس ىستەيتىن كەسكىندەمەشى كەنەپ بەتىنە سىرتقى زاتتاردى مۇقيات زەردەلەپ، جەت­كىزۋگە تىرىساتىن بولسا، ال اۆتوپورترەت سالعان سۋرەت­شى نازارىن ءوزىنىڭ جان دۇنيەسىنە اۋدارىپ، ءوزىن ءوزى تەرەڭ زەرتتەۋىنە تۋرا كەلەدى.

اۆتوپورترەتتى كاسىپشىلىك ساناتقا جاتقىزۋعا بولادى. ايشا عالىمباەۆا ءوزىنىڭ سۋرەتشى ەكەنىن تانىتىپ، پاليترا جانە قىلقالام ۇستاپ تۇرعان ءساتىن جازادى. سۋرەتشىنىڭ باسى ازداپ ءبىر جاعىنا بۇرىلعان ءارى نازارىن الىسقا قاداپ تۇر. بۇل ونىڭ قيالعا بەرىلگەن نۇرلى ءساتى.

كارتينادا تاڭبا مەن ءتۇس باسىمدىققا يە. ول قانىق اشىق تۇستەردى جالپاق، ەركىن اسەرلى جاعۋ ارقىلى جازعان. ارتقى پلان جورامالمەن الىنعان. سۋرەتشىنىڭ سۇل­باسى قىزىل جانە قىزىل-سارى تۇستەردىڭ كومە­گىمەن باسىم تۇسەدى. سۇلبانىڭ جازىق شەشىمى جانە ۇساق-تۇيەكتىڭ بولماۋى شىعارمانى مازمۇندى ءارى تۇل­عالى ەتىپ تۇر.

جىلى جانە سۋىق تۇستەردىڭ قاراما-قايشىلىعى ەموتسيالىق تولقۋدىڭ كەڭ سپەكترىن بەرۋدە. نازارىن سىرتقا سالعان، جۇزىندە ازداعان جىميىس بار كارتينادا قاندايدا ءبىر قۇپيا بارداي. «سۋرەتشى قايدا قاراپ تۇر؟» «نە ويلاپ وتىر؟»، «نەنى ايتقىسى كەلدى؟»، مىنە، وسى ساۋالدار ادامعا وي تاستايدى.

سوڭعى جاڭالىقتار

ءالتىنساريننىڭ ادامي بولمىسى

رۋحانيات • بۇگىن، 00:01

ۋاقىت جاراتقان ۇلى جىر

ادەبيەت • كەشە

ۇقساس جاڭالىقتار