تاريح • 27 شىلدە، 2021

ون سەگىزىندە وت كەشكەن ارۋ

113 رەت كورسەتىلدى

1942 جىلدىڭ قىركۇيەگىندە مايدانعا اقتوبە وبلىسىنان 18-25 جاس ارالىعىنداعى 300 قىز اتتانعان. سوعىستىڭ بەتالىسىن بولجاۋعا مۇمكىن بولماي، ەر جاۋىنگەرلەر جەتىسپەي جاتقان شاقتا اسكەرگە الىنعان قىزداردىڭ قاتارىندا نوۆورەسەي اۋداندىق پارتيا كوميتەتى قۇپيا ءبولىمىنىڭ حاتشىسى، 18 جاستاعى شولپان تاسمۇحامەدوۆا دا بار ەدى. مەكتەپ بىتىرگەن بويى پارتيا قىزمەتىنە ارالاسقان بويجەتكەن تاعدىرىن سوعىس وسىلايشا كۇرت وزگەرتتى.

شولپان تاسمۇحامەدوۆا ساراتوۆ قالاسىنىڭ تۇبىندە ورنالاسقان وقۋ-جاتتىعۋ بازاسىندا ءۇش اي اسكەري جاتتىعۋلاردان ءوتىپ، قاراشانىڭ سوڭىندا ماسكەۋ تۇبىندەگى مونينو قالاشىعىندا جاساقتالعان 2-اۋە ارمياسىنىڭ 728-پولكى 1-ەسكادريلياسىنا جىبەرىلدى. بۇل جەردە بومبالاۋشى ۇشاقتىڭ وقتاۋشىسى بولىپ ەكيپاجعا الىندى.

جاس كۋرسانتتار باستاپقىدا اەرودرومدا ۇشاقتارعا قارۋ-جاراق تيەپ، بىرتىندەپ اۋە شابۋىلىنا دايىندالدى. ەكيپاجدا ادەتتە ءتورت جاۋىنگەر بولادى. بىراق شايقاس قىزعاندا ۇشقىش اۋىر جارالانىپ، نە قازا بولعاندا ەكيپاجدىڭ كەز كەلگەن مۇشەسى ۇشاقتى باسقارا بەرەتىن. وسى ەسكادريليا 1942 جىلدىڭ جەلتوقسانىندا كالينين مايدانىنداعى رجەۆ پلاتسدارمى ءۇشىن بولعان اۋە سوعىسىنا كىردى.

بۇگىندە حرومتاۋ اۋدانى تاسساي ەلدى مەكەنىندە تۇراتىن ءساريا راحمەتوۆا بومبالاۋشى ۇشاقتىڭ وقتاۋشىسى بولىپ سوعىستى اياقتاعان اناسى تۋرالى بىلاي دەپ ەسكە الادى.

«اكە-شەشەمىز مايدانگەر كىسىلەر بولسا دا، ءۇي ىشىندە سوعىس تۋرالى وتە سيرەك ايتىلاتىن. اكەمىز سوعىس جايىنداعى سۇراعىمىزدى مۇلدە ۇناتپاسا، شەشەمنىڭ اڭگىمەسى ۇنەمى اياقتالماي قالاتىن. قارۋلاس قۇربىلارىنىڭ قالاي ولگەنى كوز الدىنا كەلە مە، كوزى جاساۋراپ، داۋىسى بۇزىلىپ بارا جاتقان سوڭ ءبىز دە قويا قويامىز. انام 1923 جىلى قازىرگى العا اۋدانى تابانتال اۋىلدىق كەڭەسىنە قاراستى «قىزىل تۋ» ۇجىمشارىندا دۇنيەگە كەلگەن. 10 جاسىندا اناسى قايتىس بولىپ، ۇيدە اكەسى، كىشكەنتاي ءىنىسى ۇشەۋى قالعان. مەكتەپ بىتىرگەن بويى نوۆو­رەسەي اۋداندىق پارتيا كوميتەتى قۇپيا بولىمىندە حاتشى-تەرىمشى جۇمىسىنا قابىلدانعان. سوعىسقا وسى جەردەن شاقىرتىلعان. انام اقتوبەدە تەمىر جول ۆوكزالىنان سوعىسقا اتتانعان ءساتىن ءجيى ەسىنە الاتىن. «سوعىسقا اتتانىپ بارا جاتقان جاستاردى شىعارىپ سالۋعا كەلگەندەردىڭ كەيبىرەۋى كوزىنە جاس الىپ، ءۇنسىز تۇرسا، كەيبىرى داۋىستاپ جىلاپ جاتتى. ساپ تۇزەپ تۇرعان ءبىز، 17-18-دەگى جاستار كوڭىلدىمىز. ك ۇلىپ تۇرمىز. ۆاگون سىرتىندا تۇرعان ەرەسەك كومانديرلەر بىزگە «قورىقپاڭدار، ءبارى جاقسى بولادى» دەپ قويادى. جۇرەك تۇكپىرىمىزدە الداعى سوعىس قورقىنىشىن سەزسەك تە، ناعىز مايداننىڭ قانداي بولاتىنىن ورتاسىنا تۇسكەن سوڭ عانا بىلدىك دەگەنى ەسىمدە»، دەيدى ءساريا.

بومبالاۋشى ۇشاقتىڭ وقتاۋشىسى، 18 جاستاعى سەرجانت شولپان تاسمۇحامەدوۆا مايداندا شۋرا اتاندى. ماسكەۋ ءتۇبى قورعانىسىنا كىرگەن ەسكادريليا رجەۆ پلاتسدارمىنان شىعىپ، كۋرسك شايقاسىنا كىرىپ، ودان 1-ۋكراينا مايدانىنا اۋىستىرىلدى. بۇل – ەكىنشى دۇنيەجۇزىلىك سوعىستا جاۋدىڭ 400-گە جۋىق اسكەري ۇشاعىن اتىپ تۇسىرگەن، 10 كەڭەس وداعىنىڭ باتىرى شىققان اتاقتى 728-ءشى پولك ەدى. پولك كومانديرى كەڭەس وداعىنىڭ باتىرى – سەرگەي لازارەۆ. ول 1944 جىلدىڭ كوكتەمىندە اۋەدە ۇشاعىمەن قوسا جانىپ كەتتى. ونىڭ ولىمىنە قاتىستى ءبىر دەرەكتە نەمىس ۇشاعىمەن سوقتىعىستى دەسە، ەكىنشى دەرەكتە كەڭەستىك بومبالاۋشى ۇشاقپەن اۋەدە سوقتىعىسىپ قازا تاپتى دەلىنەدى. سوعىستىڭ سوڭعى كۇندەرىن بىرگە وتكىزگەن قارۋلاسى ماشانىڭ شولپان اپايعا جازعان حاتىندا: «ۆوينۋ مى زاكونچيلي پود بەرلينوم، اەرودروم گايناۋ. تام جە پوگيب ناش كوماندير ۆاسيلياك ۆ.س. نە دوجيل 5 دنەي دو پوبەدى. پوتوم مى ۋەحالي پود پراگۋ-برەسلاۋ. مەستەچكو حالباۋ. وتتۋدا مى ۆسە دەموبيليزوۆاليس. زا ۆسيۋ ۆوينۋ وسۆوبوديلي 60 ناسەلەننىح پۋنكتوۆ، سبيلي 490 سامولەتوۆ پروتيۆنيكا. بىلو ۋ ناس 10 گەروەۆ»، دەگەن جولدار بار. مايدانگەر حاتتارى قازىر ءساريا راحمەتوۆانىڭ ۇيىندە ساقتاۋلى تۇر.

شولپان اپاي 1945 جىلدىڭ قىركۇيەگىندە مايداننان ورالىپ، 1947 جىلى قوجا راحمەتوۆپەن باس قوسقان.

«اكەمىز 1920 جىلى ويىل اۋدانىندا تۋعان. اشتىقتا اتا-اناسى قايتىس بولىپ، 1933 جىلى ويىل، كەيىن اقبۇلاق بالالار ۇيلەرىندە تاربيەلەندى. اكەمنىڭ جەتىمدەر ۇيىندە كۇن سايىن تاڭەرتەڭ 2-3 بالا ۇيقىدان ويانباي قالاتىنىن، ولگەن بالالاردى وزدەرى كومگەندەرىن ايتقانى بار. بالا كەزىمىزدە قالادان اكەمنىڭ جەتىمدەر ۇيىندە بىرگە وسكەن جولداسى كەلىپ، ەكەۋى تۇنىمەن اڭگىمە ايتاتىنى ەسىمدە قالعان. وسى اعا كەلەردە انامىز ەرەكشە دايىندالاتىن. اكەم اقتوبەدەگى №6 مەكتەپ-ينتەرناتتى ءبىتىرىپ، وسىنداعى وقىتۋشىلار ينستيتۋتىنا وقۋعا تۇسكەن. بىتىرگەن سوڭ ونى نوۆورەسەي اۋدانى قوپا مەكتەبىنە ديرەكتورلىققا جىبەرگەن. وسى جەردە 1942 جىلى مامىردا سوعىسقا شاقىرتىلىپ، بلاگوۆەششەنسك قالاسىندا كىشى كومانديرلەر كۋرسىندا وقىپ، ۋكراينا مايدانىنا اتتانعان. 1943 جىلدىڭ قاڭتارىندا سول جاق جامباسىنان اۋىر جارالانىپ، گوسپيتالدا ۇزاق ەمدەلگەن سوڭ قايتادان سوعىسقا جىبەرىلەدى. بۇل جولى مايدان مەن ماسكەۋدەگى باس شتاب اراسىنداعى بايلانىسشىلار توبىندا بولىپ، ماجارستان، بولگاريانى ازات ەتۋگە قاتىسقان. جالپى، اكەمىز سوعىستا ەكى رەت اۋىر جارالانىپ، قايتادان مايدانعا كىرگەن.

مايدان كۇندەلىگىنەن

شولپان اپاي زەينەتكەرلىككە شىعىپ، قارۋلاستارىنىڭ قاتارى سيرەي باستاعاندا كۇندەلىك جازۋدى باستاعان. بىراق جازبالارىن بالالارىنا كورسەتپەي ساقتاعان. ونىڭ سوعىس ەستەلىكتەرىن بالالارى ومىردەن وتكەن سوڭ عانا وقيدى. مايدانگەر كۇندەلىگىندە بىلاي دەپ جازعان: «العاش سوعىسقا كىرگەن ءبىزدى الدىڭعى شەپتە سوعىسىپ جاتقان جاياۋ اسكەرگە كومەككە جىبەردى. مەزگىل – كۇز ايى. كۇندىز ورمان ىشىندە دىبىسىمىزدى بىلدىرمەي ءجۇرىپ، كەش تۇسكەندە وزەنگە جەتتىك. جول باستاۋشى كوماندير ءوزى باستاپ، تايىزداۋ جەردەن ۆينتوۆكا، قاپشىقتى جوعارى كوتەرىپ سۋدان وتۋگە بۇيىردى. ءبىر-ءبىرىمىزدىڭ سوڭىمىزدان ادام بەلىنەن جوعارى كەلەتىن جەرىنەن ءوتىپ جاتىرمىز. سۋ – سۋىق، كيىم – جۇقا. ورتاسىنا جەتە بەرگەندە الدىمىزدان وق جاۋدى. جاۋ ءبىزدى كورىپ قالىپتى. جان-جاقتان جاۋعان وقتار ىسقىرىپ سۋعا ءتۇسىپ جاتىر. كوماندير ارتقا قاراماي، تەز-تەز جاعاعا شىعىڭدار دەپ ايقايلادى. جاعاعا قاراي جۇگىردىك. وق سۋعا ىسقىرىپ تۇسەدى، ءدال جانىڭنان ءبىر زاتتىڭ سۋعا شولپ ەتىپ باتىپ كەتكەنىن سەزەسىڭ، بىراق ارتقا قاراۋعا رۇقسات جوق. جاعاعا شىققان بويى كوماندير تۇگەندەي باستاعاندا ءۇنسىز سۋعا باتقاننىڭ وق تيگەن قارۋلاسىڭ ەكەنىن بىلەسىڭ. ءبىز جەتكەنشە ۇرىس اياقتالىپ، قولعا تۇسكەندەردى تۇتقىنداپ الىپ بارادى ەكەن. قاراپ تۇرمىز. ىلعي ۇزىن بويلى، ەڭگەزەردەي، وڭدەرى اپپاق، سۇلۋ ءجۇزدى فريتستەر. اسكەري كيىمدەرى كۇشتى. تۇتقىنعا تۇستىك دەپ سەسكەنىپ تۇرعان ولار جوق. العاش نەمىس كورگەن بىزدەر اۋزىمىزدى اشىپ قالدىق. ولاردىڭ قاسىندا تىم قوراشپىز، ارىق-تۇرىق، بويىمىز دا كىشكەنتاي، كيىمىمىز دە جۇپىنى. ەڭ الدىنداعى تۇتقىن وفيتسەرلەر بىزگە تاكاپپارلانا، جەككورۋشىلىكپەن قاراپ ءوتىپ بارادى.

* * *

اۋەدە جاۋ شەبىنە كىرگەندە، كۇتپەگەن جەردەن قارسى الدىڭنان نەمىستىڭ ۇشاعى جارق ەتە قالعاندا كابيناداعى ۇشقىشىن كوزىڭنىڭ قيىعىڭمەن كورىپ قالاسىڭ. ويلانۋعا ۋاقىت جوق. ءبىرىنشى قيمىلداماساڭ – ءبىتتىڭ. ەڭ باستىسى –ۇشاقتى ءبىرىنشى قۇلاتۋ، اتىپ ۇلگەرمەسەڭ، ءوزىڭدى قۇرتادى. ۇشاعىن قۇلاتساڭ، ۇشقىشى دا بىرگە كەتەدى دەپ ويلايسىڭ. ءوزىمىز اتقان ۇشقىشتىڭ كەسكىنى، سارى شاشى، كوكپەڭبەك كوزى – كوز الدىمدا.

* * *

1943 جىلدىڭ سوڭىنا قاراي ەل ىشىنەن جاستاردى مايدانعا شاقىرتۋ ازايا باستادى. بۇل ۋاقىتتا جاۋىنگەرلەر تالاي شايقاستان ءوتىپ، سوعىسۋ تاجىريبەسىن مەڭگەرىپ العان.

* * *

بلينداجدا الاڭسىز دەمالىپ جاتقان ساتتە جاۋ شابۋىل باستاعاندا دۇنيە توڭكەرىلىپ تۇسكەندەي سەزىنەسىڭ. بلينداج جاي­راپ، اپساتتە جان-جاعىڭ ادامدار ولىگىنە تولادى. العاشقى شابۋىلدان ءتىرى قالعاندار قارۋىن ۇستاي سالا سىرتقا جۇگىرەدى. جاڭا عانا سويلەسىپ وتىرعان، سنارياد وعى تۋرا تۇسكەن قارۋلاسقا قاراۋعا شاماڭ جوق. شابۋىلدىڭ بەتىن قايتارىپ، جەرمەنجەكسەن بولعان بلينداج ورنىنا قايتىپ كەلگەندە كورەتىنىڭ – شاشىلعان ادام دەنەسى، سۋداي اققان قىپقىزىل قان. قايتىپ كەلەسىڭ، ويتكەنى ولگەندەردى تانۋ كەرەك. ەسكادريليانىڭ ءبىر قىزىن ساۋساعىنا قاراپ تانىدىق. ويتكەنى جاۋىنگەردىڭ ولگەنىن راستاپ، تۋىسقاندارىنا قارا قاعاز جىبەرۋ ءۇشىن ءبىر بولىمدە سوعىسىپ جاتقانداردىڭ كۋالىگى كەرەك».

سوعىستان كەيىن

سوعىستىڭ الدىندا ءسوز بايلاسقان ەكى جاس مايداننان ورالىپ، بەيبىت ومىرگە ازداپ ۇيرەنىسكەن سوڭ 1947 جىلى شاڭىراق كوتەردى. جاس وتباسى اۋەلى اقتوبە قالاسىندا پاتەر جالداپ تۇرادى. الايدا 1951 جىلى جالداپ تۇرعان ەسكى جەر ءۇيدىڭ پەشىنەن وت شىعىپ، ءۇي ورتەنگەن. بۇل كەزدە ۇيدە ەشكىم بولماي، قوجا اعاي مەن شولپان اپايدىڭ ەڭ ءبىرىنشى جيعان دۇنيەسى – مايدان فوتوسۋرەتتەرى سالىنعان شابادان جانىپ كەتكەن.

سوعىستان كەيىن اقتوبە پەداگوگيكالىق ينستيتۋتىندا عىلىمي جۇمىسپەن اينالىسقىسى كەلگەن پارتيا قىزمەتكەرى قوجا راحمەتوۆتى حرومتاۋ اۋدانىنىڭ قوپا اۋىلىنا جۇمىسشىلار كووپەراتسياسىن باسقارۋعا جىبەردى. ودان كەيىن تاسساي اۋىلىنداعى پارتيا ۇيىمىنىڭ حاتشىسى بولىپ تاعايىندالىپ، وتباسى سوندا كوشىپ كەلگەن. شولپان اپاي اۋىل دۇكەنىندە ساتۋشى بولىپ جۇمىسقا ورنالاسقان.

جاس وتباسىنىڭ بىرىنەن سوڭ ءبىرى دۇنيەگە كەلگەن ءۇش ءسابيى شەتىنەپ كەتكەن. بۇل دا سوعىستىڭ ءبىر زاردابى. مۇز جاستانىپ، قار كەشىپ سوعىسقان جاس قىزداردىڭ دەنساۋلىقتارىنداعى كىنارات سوعىستان كەيىن سىر بەرە باستاعان. قالادا تۇرعان مايدانگەر قىزدار ۋاقىتىلى ەمدەلگەنىمەن، كەيبىرى سۇيەككە وتكەن سۋىقتىڭ زاردابىن ءومىر بويى تارتتى. اسىرەسە، اۋىلعا ورالعان مايدانگەر قىزداردىڭ تاعدىرلارى قيىن بولدى. ەل ىشىندە مايداننان كەلگەن قىزداردى جاقتىرماعان ناداندىق سارقىنشاعى دا بار ەدى. قىرعىن سوعىستى كەشىپ، امان ورالعاندا سىپسىڭ سوزدەردى ەستۋگە تۋرا كەلگەن انالارىمىزدىڭ مىقتىلىعى-اي دەپ ويلايسىڭ. قان كەشۋدىڭ ورتاسىندا، ءولىم جەلكەسىنەن ءتونىپ تۇرعاندا، جاس قىزداردىڭ ارمانى تەزىرەك ۇيگە قايتۋ بولسا، بۇل وي 18 جاسىنان قان مايداننىڭ قاندى قاسابىنا كىرگەن شولپاننىڭ دا باسىنان كەتپەدى. ول العا اۋدانىنىڭ تابانتال اۋىلىندا قالعان اكەسى مەن جالعىز ءىنىسىن ويلادى.

«سول كەزدىڭ ادامدارى سياقتى، ولاردىڭ ارتىندا سۇيەۋ بولاتىن ەشكىم دە جوق. اكەمنىڭ اتا-اناسى اشتىقتا ءولىپ، جەتىمدەر ۇيىنە الىنعان. قاندى قىرعىننىڭ قاق ورتاسىنان امان شىعىپ وتاۋ تىككەن اكە-شەشەمىز بەيبىت كۇننىڭ قادىرىن جاقسى ءبىلدى. انام ورتا بويلى، قاراتورى، وتە شاپشاڭ قيمىلدايتىن، اشىق-جارقىن ادام ەدى. مىنەزى قانداي اشىق بولسا دا، كىممەن قالاي سويلەسۋدى بىلەتىن، رەتسىز سويلەمەيتىن. اكەم دە اشىق-جارقىن. ولارمەن كەز كەلگەن تاقىرىپقا اڭگىمەلەسەتىنبىز. ءبىزدىڭ دوستارىمىز «اتا-اناڭىزبەن سويلەسۋ وتە قىزىق، ءبىز ولارمەن جاس ايىرماشىلىعىن سەزىنبەيمىز»، دەيتىن. اكە-شەشەم­نىڭ ءبىر-بىرىنە داۋىس كوتەرگەنىن ەستىگەن جوقپىز. ايتقانى بولماي جاتقان كەزدە انام جايلاپ قانا: «تۋ، وسى شال»، دەپ اكەمە قاراپ كۇلەتىن دە قوياتىن. انام قىزدارىنا «ەر ادام – ءۇيدىڭ قوجايىنى. كۇيەۋىڭدى سىيلا، بالالاردىڭ الدىندا ونىڭ بەدەلىن تۇسىرمە، ەرىڭنىڭ جاقسىسىن اسىرىپ، جامانىن جاسىر»، دەپ ۇيرەتتى. اكەمىز ۇلدارىنا «ەشقاشان دا ايەل ادامعا قول كوتەرمەڭدەر. ايەلىنە قول كوتەرەتىن ەركەك – ناعىز نادان»، دەيتىن. ءالى ەسىمدە، ءبىز كىشكەنتايمىز، ۇلكەنىمىز ءاليا 12 جاستا. مامام تاڭ اتپاي پەش جاعىپ، وتقا تاماق ءپىسىرىپ، جۇمىسىنا كەتەردە «پەشتەن شوق ۇشىپ تۇسپەسىن» دەپ ءاليا اپايىما تاپسىرادى. بالالىق شاعىمىز تاسساي اۋىلىندا ءوتتى. انام 4-5 سيىر ساۋادى. ءۇيىمىزدىڭ باقشاسى وتە ۇلكەن ەدى. اكەم كوكتەمدە ۇلدارمەن بىرگە ۇزىن اتىزدارعا كارتوپ وتىرعىزادى. ءار بالاعا ەكى قاتاردان ءبولىپ بەرىپ، جاز بويى ءشوبىن ج ۇلىپ، سۋارۋدى تاپسىرادى. ءوزى تۇسكى تاماققا كەلگەندە، جۇمىسىمىزدى تەكسەرەدى. اتىزداردىڭ ءشوبى ج ۇلىنىپ، كارتوپ جاقسى سۋارىلسا، اكەمنەن ماقتاۋ ەستيمىز. قىزداردىڭ دا ءوز مىندەتى بار. بىرەۋىمىز ءۇي جيناساق، ەكىنشىمىز اياق-تاباق، ءۇشىنشىمىز كىر جۋامىز. مەن 6-سىنىپتان باستاپ سيىر ساۋدىم. ۇيدەن اكەمنىڭ جۇمىسىنا كەلگەن قوناقتار ۇزىلمەيدى. وعان انامىز ەش قاباق شىتپايدى. ءوز باسىم شەشەمنىڭ اكەمە «اناۋ جەتپەيدى، مىناۋ جەتپەيدى» دەپ ايتقانىن دا ەستىمەدىم. جەتپەي جات­قاندى ءوزى-اق ءۇنسىز جەتىستىرەتىن ەدى. انام دۇكەننەن شىت اكەلىپ، ءتۇنى بويى 4 قى­زىنا جازدىق كويلەكتەر تىگەدى. جەر­تولەدەگى ۇلكەن اعاش بوشكەلەردى كوكتەمدە بالالار سىرتقا شىعارىپ، جۋىپ-تازالاپ، كەپتىرەمىز. مامام قارا كۇزگە دەيىن وسى بوشكەلەرگە شارباقتاعى كوكونىستەردى تۇزدايتىن»، دەيدى ءساريا.

ساۋدا سالاسىندا ۇزدىكسىز 30 جىل قىزمەت ەتىپ، 1976 جىلى ەڭبەك قىزىل تۋ وردەنىمەن ماراپاتتالعان شولپان اپاي مايدانگەرمىن دەپ ەشبىر مەكەمەنىڭ ەسىگىن قاعىپ كورمەپتى. سول كەزدەگى سوعىس اردا­گەرلەرى سەكىلدى، ەشبىر جەڭىلدىك سۇراماعان.

شولپان اپاي ۋكرايناداعى مايدانداس قۇربىلارىمەن، ەكيپاج كومانديرى بوريس پوليششۋكپەن حات جازىسىپ، ءوزارا سالەمدەمەلەر جىبەرىپ تۇرعان. لازارەۆتىڭ اۋە ەسكادريلياسى ارداگەرلەرى بىربىرىمەن حات-حابار الماسىپ، كەزدەسۋلەر ۇيىمداستىرۋدى جاقسى جولعا قويعان. شولپان اپاي مونينا، سەۆاستوپول قالالارىندا وتكەن 728-ءشى اۋە پولكى مايدانگەرلەرى كەزدەسۋىنە بىرنەشە رەت قاتىسقان.

51 جىل وتاسقان شولپان مەن قوجا راحمەتوۆتەر ءاليا، ءماريا، ارىستان، ناتاشا، ءساريا، اسقار، التاي ەسىمدى بالالارىن تاربيەلەپ ءوسىردى. ءبارىنىڭ جوعارى ءبىلىم الۋىنا جاعداي جاسادى. ولار ءار سالادا قىزمەت اتقارىپ، ۇلكەندەرى زەينەتكەرلىك جاسقا دا جەتتى. اناسىنىڭ جولىن قۋعان التاي تاجىريبەلى ۇشقىش بولىپ، قازىر زەينەتكەرلىككە شىقتى.

بۇل – بالالىق شاعى كەڭەس وكىمەتىنىڭ اشتىعىنا تاپ كەلىپ، ودان جاستىق داۋرەنى ەكىنشى دۇنيەجۇزىلىك سوعىستىڭ قاسىرەتتى جىلدارىندا ءوتىپ، ءتورت جىل قان­كەشۋدەن سوڭ امان-ەسەن ەلگە ورالىپ، بەيبىت ومىردە قاراپايىم تىرلىك كەشكەن اۋلەتتىڭ تاعدىرى. بەيبىت كۇننىڭ قادىرىن ءتۇسىنىپ، سانالى دا ساۋلەلى ۇرپاقتارىن ءوسىرىپ، ادامي تىرلىك كەشكەن قوس مايدانگەر 9 مامىر – جەڭىس كۇنىن دۋىلداتىپ، ۇرانداتىپ تويلاۋعا دا قارسى بولعان. انشەيىندە اشىق-جارقىن، كوپشىل، الىستى جاقىنداستىرىپ جۇرەتىن شولپان اپاي قارۋلاستارىمەن كەزدەسكەننەن باسقا جەردە سوعىس اڭگىمەسىن اسا ۇناتپاعان. اسىرەسە، ناۋقاندىق شارا­لاردى جاقتىرا قويماپتى. سونىڭ ىشىندە بالالارعا سوعىس اڭگىمەسىن ايتىپ، جەڭىس كۇنى ولارمەن كەزدەسكەننەن گورى باقشاسىن باپتاپ جۇرگەندى ۇناتقان. ويتكەنى سوعىستىڭ قىرعىنى، كوز الدىندا ولگەن قارۋلاستارىنىڭ جۇزدەرى، ءتىپتى اۋەدە قارسى الدىڭنان شىعا كەلگەن بويى اتىپ تۇسىرگەن جاۋ ۇشقىشىنىڭ بەينەسى دە ومىرباقي ۇمىتىلمايدى ەكەن.

مايدانگەر قوجا اقساقال 1998 جىلى 78 جاسىندا، شولپان اپاي 2004 جىلى 81 جاسىندا قايتىس بولدى. سوعىس مايدانگەرى رەتىندە پاتەر كەزەگىنە تۇرعان قوجا راحمەتوۆكە 2003 جىلى اقتوبە قالاسىنان ءبىر بولمەلى پاتەر بەرىلگەندە اقساقال بۇل دۇنيەدە جوق ەدى. شولپان اپاي وسى پاتەردە ءبىر جىل عانا تۇرىپ، ومىردەن ءوتتى.

عۇمىر بويى سوعىس ارداگەرىمىن دەپ كەۋدە قاقپاي، بالالارىن جاقسى تاربيەلەپ، ادال ەڭبەك ەتكەن قوس مايدانگەر قول ۇستاسىپ، بەيبىت ءومىردىڭ ىرگەسىن قالاعان پاراساتتى اتا-انالار ەدى. وسىنداي ابزال جانداردى وتكەن شاقتا ەسكە الىپ، ەندى تاپپايتىنىمىز وكىنىشتى...

سوڭعى جاڭالىقتار

ددسۇ QazVac-تى قاشان مويىندايدى؟

كوروناۆيرۋس • بۇگىن، 12:35

ۇقساس جاڭالىقتار