قۇجات قابىلداۋ 16-26 شىلدە ارالىعىندا جۇزەگە اسىرىلدى. بايقاۋ ناتيجەسى 15 تامىزعا دەيىن جاريالانادى.
ۇمىتكەرلەر اراسىندا 7054 «التىن بەلگى» يەگەرى, 576 حالىقارالىق جانە رەسپۋبليكالىق وليمپيادالاردىڭ جەڭىمپازدارى, سونداي-اق پاتريوتتىق سەزىمى مەن بەلسەندى ازاماتتىق ۇستانىمى ءۇشىن ۇزدىك بەلگىسىمەن ماراپاتتالعان 705 بالا بار.
بالل تەڭ بولعان جاعدايدا ولار باسىم قۇقىققا يە بولادى.
«سونىمەن قاتار بيىل بعم العاش رەت حالىقتىڭ الەۋمەتتىك وسال توپتارىنان شىققان بالالارعا كۆوتا ءبولدى. ەندى جەتىم بالالار, اتا-اناسىنىڭ قامقورلىعىنسىز قالعان بالالار, ءتورت جانە ودان دا كوپ كامەلەتكە تولماعان بالالاردى تاربيەلەپ وتىرعان وتباسىلاردان شىققان بالالار, تولىق ەمەس وتباسىلاردان شىققان بالالار, ەرەكشە قاجەتتىلىكتەرى بار بالالاردى تاربيەلەپ وتىرعان وتباسىلاردان شىققان بالالار, جەڭىلدىكتەر مەن كەپىلدىكتەر بويىنشا ۇلى وتان سوعىسىنىڭ قاتىسۋشىلارى مەن مۇگەدەكتەرىنە تەڭەستىرىلگەن ادامدار ءۇشىن جوعارى وقۋ ورىندارىنا ءتۇسۋ مۇمكىندىگى ارتتى. ولارعا ارنايى گرانتتار بولىنگەن. كامەلەتكە تولماعان ءتورت جانە ودان كوپ بالا تاربيەلەپ وتىرعان وتباسىلارداعى بالالار ءۇشىن گرانتتاردىڭ جالپى سانىنىڭ 5%-ى, كەمىندە ءۇش جىل تولىق ەمەس وتباسى مارتەبەسى بار وتباسىلاردان شىققان بالالارعا – 1%, ءى, ءىى توپتاعى مۇگەدەك بالالاردى تاربيەلەپ وتىرعان وتباسىلاردان شىققان تۇلەكتەرگە ءبىلىم بەرۋ گرانتتارىنىڭ 1%-ى كوزدەلگەن», – دەپ اتاپ ءوتتى قر بعم جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويباەۆ.
سونداي-اق اۋىل جاستارى اراسىنان شىققان ازاماتتار ءۇشىن اۋىلداردىڭ الەۋمەتتىك-ەكونوميكالىق دامۋىن ايقىندايتىن ماماندىقتارعا جانە قر ازاماتى ەمەس, ۇلتى قازاق ادامدارعا كۆوتا قاراستىرىلعان.
بيىل 145 مىڭنان استام تالاپكەر ۇلتتىق بىرىڭعاي تەستىلەۋدەن ءوتتى. ۇبت قورىتىندىسى بويىنشا شەكتى بالدى 88 مىڭنان استام ادام جينادى. بۇل – قاتىسۋشىلاردىڭ جالپى سانىنىڭ شامامەن 60%-ى.
بيىل ورتاشا بالل - 69. بۇل وتكەن جىلمەن سالىستىرعاندا 5 بالعا جوعارى.
ۇبت قورىتىندىسى بويىنشا كەمىندە 65 بالل جيناعان تالاپكەرلەر ۇلتتىق جوعارى وقۋ ورىندارىندا گرانتقا ۇمىتكەر بولا الاتىنىن ايتا كەتەيىك.
«پەداگوگيكالىق عىلىمدار» باعىتى بويىنشا كەمىندە 75 بالل, «دەنساۋلىق ساقتاۋ» − كەمىندە 70 بالل, «اۋىل شارۋاشىلىعى جانە بيورەسۋرستار», «ۆەتەريناريا» – كەمىندە 60 بالل, باسقا جوعارى وقۋ ورىندارىنا وقۋعا ءتۇسۋ ءۇشىن كەمىندە 50 بالل قاجەت.
گرانتتار تاعايىنداۋ جونىندەگى شەشىمدى رەسپۋبليكالىق كونكۋرستىق كوميسسيا قابىلدايدى. كونكۋرستىق كوميسسيانىڭ وتىرىسى 10 تامىزعا دەيىن وتەدى.
كوميسسيا قۇرامىنا مەملەكەتتىك ورگانداردىڭ, قوعامدىق ۇيىمداردىڭ وكىلدەرى, جۋرناليستەر, «قازاقستان ستۋدەنتتەرى اليانسىنىڭ» جانە «وتانداستار» قورىنىڭ وكىلدەرى كىردى.
