ساياسات • 27 شىلدە، 2021

ناعىز حالىقتىق تاڭداۋ جاسالدى

26 رەت كورسەتىلدى

مەملەكەت باسشىسى قاسىم-جومارت توقاەۆ «جاڭا جاعداي­داعى قازاقستان: ءىس-قيمىل كەزەڭى» جولداۋىندا اۋىل اكىمدەرىن تىكەلەي سايلاۋ قاجەتتىگىن ايتقاندا كوكىرەگى وياۋ، كوزى اشىق ادامداردىڭ ءبارى ەلەڭ ەتىپ، پرەزيدەنتتىڭ ساياسي رەفورمالارىنا ۇلكەن ۇمىتپەن قاراعان بولاتىن. ەندى، مىنە، ەگەمەن ەلىمىزدىڭ وركەنيەتتى، دەموكراتيالىق دامۋىنا باعىتتالعان يگى باستاما ويداعىداي جۇزەگە اسىرىلىپ، قوعامدا زور ورلەۋ تۋعىزىپ وتىر.

التىن بەسىك – اۋىل تۇرعىن­دارى تاۋەلسىزدىك جىلدارىندا تۇڭعىش رەت ءوز باسشىلارىن وزدەرى تاڭداۋ مۇمكىندىگىنە يە بولىپ، ساياسي بەلسەندىلىگى كۇرت ارتتى. «اكىم بول، حالقىڭا جاقىن بول!» دەگەندەي، ەندى اۋىل اكىمى تۇرعىندارعا جاقىنداي تۇسەدى. جوعارىداعى باسشىلىقتىڭ ەمەس، اۋىلدىقتاردىڭ مۇددە­سىن قورعاپ، جەرگىلىكتى جەرلەردە شەشىلمەي جاتقان كۇرمەۋلى ماسەلەلەردىڭ شەشىم تابۋىنا كۇش سالادى. ەكىنشىدەن، وسى جولعى ساياسي ناۋقان بارىسىندا حالىق داۋسىنىڭ ماڭىزدىلىعىن انىق ۇعىندىق.

قوستاناي وبلىسىنداعى 65 سايلاۋ وكرۋگىندە بولعان داۋىس بەرۋگە  «پارتيالىق ەمەس بايقاۋ ورتا­لىعى» رەسپۋبليكالىق قوعام­­دىق بىرلەستىگى وبلىستىق في­ليالىنىڭ 400-گە جۋىق وكىلى قاتىستى. ولاردىڭ ءبارى الدىن الا ارنايى دايارلىقتان ءوتىپ، ما­ڭىز­دى ساياسي ناۋقاننىڭ ءادىل ءارى اشىق ءوتۋىن قاداعالاپ وتىردى.

ءوز باسىم تۇسكە دەيىن وڭىر­دەگى سايلاۋ ۋچاسكەلەرىنىڭ ءبىرازىن ارالاپ شىقتىم. شال­عاي اۋىلدارداعى سايلاۋ ۋچاسكە­لەرىندەگى وكىلدەرىمىزدەن تەلەفون ارقىلى حابار الىپ وتىردىق. ءبىزدىڭ بايقاۋشىلاردىڭ ايتۋىن­شا، ساياسي ناۋقان بارىسىندا قولدانىستاعى زاڭنامانى بۇزۋدىڭ ەشقانداي دەرەگى تىركەل­گەن جوق. بۇعان قوسا، سانيتارلىق-ەپيدەميالىق تالاپتاردىڭ ساق­تالۋىن ءجىتى باقىلاپ وتىردىق. ءار ۋچاسكەدەگى كابينالار ارنايى سانيتارلىق قۇرىلعىلارمەن ساعات سايىن تازارتىلىپ، الەۋ­مەتتىك اراقاشىقتىق ساقتالۋى قاتاڭ قاداعالاۋدا بولدى. وب­لىس­تاعى بارلىق سايلاۋ ۋچاس­كەسى­نىڭ كىرەبەرىسىندە مەديتسي­نا قىزمەتكەرلەرى مەن ۆولونتەرلەر كەزەكشىلىك اتقارىپ تۇر­دى. ولاردىڭ مىندەتى سايلاۋ­شى­لاردىڭ سانيتايزەر ارقىلى قول شايۋىن قاداعالاپ، دەنە قىزۋىن ولشەپ، ءار ادامعا مەديتسينالىق قولعاپ، ماسكا، قالام ۇلەستىرۋ بولدى. ماسكا، قولعاپتارمەن بار­لىق ۋچاسكەلەر جەتكىلىكتى تۇردە قامتىلدى.

بۇل سايلاۋدا اۋىل تۇرعىن­دارىنىڭ بەلسەندىلىگى ەرەكشە بولعاندىعىن اتاپ ايتقان ءجون. ماسەلەن، ليساكوۆ قالا­سى مەن اۋليەكول، جىتىقارا اۋدان­دارىنداعى سايلاۋ ۋچاسكەلەرىندە اۋىل تۇرعىندارىنىڭ جارتىسىنان استامى تۇسكە دەيىن-اق داۋىس بەرىپ ۇلگەردى. بۇل ءوز اكى­مىن ءوزى سايلاپ، ناعىز حالىق­تىق تاڭ­­داۋعا قول جەتكىزگەن اۋىل تۇر­­عىندارىنىڭ ساياسي بەلسەن­دىلىگىنىڭ ايعاعى بولسا كەرەك.     

 

بولات قاليەۆ،

«پارتيالىق ەمەس بايقاۋ ورتالىعى» رقب وبلىستىق فيليالىنىڭ توراعاسى

 

قوستاناي وبلىسى

 

سوڭعى جاڭالىقتار

ەڭبەكپەن ەسەيگەن ەر

قازاقستان • كەشە

بەيتانىس ساعىنىش

الەم • كەشە

جالعىزدىق ارالى

كينو • كەشە

ەلوردادا قار جاۋادى

قازاقستان • كەشە

بۇگىن ماشينا جاساۋ كۇنى

قازاقستان • كەشە

سقو-دا جۇك كولىگى جىلۋ قۇبىرىنا سوعىلدى

ايماقتار • 25 قىركۇيەك، 2021

ۇقساس جاڭالىقتار