ايماقتار • 25 شىلدە، 2021

اقتوبە وبلىسىندا 34 اۋىلدىق وكرۋگ اكىمدەرى سايلانادى

117 رەت كورسەتىلدى

بۇگىن اقتوبە وبلىسىنىڭ اققۇدىق اۋىلى مەن 34 اۋىلدىق وكرۋگىنىڭ اكىمدەرى سايلانباقشى. قازىر 74 سايلاۋ ۋچاسكەلەرىندە اۋىل اكىمدەرىنە داۋىس بەرۋ باستالدى، دەپ حابارلايدى Egemen.kz.

وبلىستىق اۋماقتىق سايلاۋ كوميسسياسىنىڭ مالىمەتىنە قاراعاندا،  جەرگىلىكتى ۋاقىتپەن 11.30-دە  سايلاۋ ۋچاسكەلەرىندە تىركەلگەن 11 مىڭ 433 سايلاۋشى  داۋىس بەرىپ ۇلگەردى. سايلاۋعا قاتىسۋ بەلسەندىلىگى جاعىنان شالقار، قارعالى، ايتەكە بي، مارتوك، حرومتاۋ اۋداندارىنىڭ تۇرعىندارى وزىپ تۇر.

اۋدان اكىمدەرىن سايلاۋ كەزىندە قوعامدىق قاۋىپسىزدىكتى ساقتاۋعا وبلىس بويىنشا 196 پوليتسيا قىزمەتكەرى جۇمىلدىرىلعان. سونداي-اق 74 پوليتسيا قىزمەتكەرى وبلىس ورتالىعىنان 12 اۋدانعا بيۋللەتەندەرىن سايلاۋ ۋچاسكەلەرىنە جەتكىزۋگە قاتىستى.   

بايعانين اۋدانىنىڭ كولتابان، سارتوعاي، قىزىلبۇلاق اۋىلدىق وكرۋگتەرى اكىمدەرى، ايتەكە بي اۋدانىنىڭ ت.جۇرگەنوۆ، ايكە، جامبىل، ۇشقاتتى، تۇمابۇلاق، ارالتوعاي، قايراقتى اۋىلدىق وكرۋگتەرىنىڭ اكىمدەرى سايلانباقشى.

مۇعالجار اۋدانى بويىنشا قايىڭدى اۋىلدىق وكرۋگىنىڭ اكىمى بولۋعا 3 ۇمىتكەر تىركەلگەن. ولار «اقجول» دەموكراتيالىق پارتياسىنىڭ اتىنان دجالي تلەپباي ۇلى ابديەۆ، «Nur Otan» پارتياسى اتىنان نۇربولات جولامان ۇلى جالعاس جانە ءوزىن-ءوزى ۇسىنعان رۋسلان ءادىل ۇلى تورەبەكوۆ. 1225 تۇرعىنى بار قايىڭدى اۋىلدىق وكرۋگىنىڭ التىندى جانە قايىڭدى ەلدى مەكەندەرىنىڭ 712 سايلاۋشىسى ءوز تاڭداۋلارىن جاسايتىن بولادى.

قوبدا اۋدانىنىڭ  ي.قۇرمانوۆ، ساربۇلاق، تالدىساي، جارساي، تەرىساققان اۋىلدىق وكرۋگتەرىندە دە جاڭا اكىم سايلانباقشى. وسى اۋداندا 8 سايلاۋ ۋچاسكەسى اشىلعان.

سوڭعى جاڭالىقتار

ەڭبەكپەن ەسەيگەن ەر

قازاقستان • كەشە

بەيتانىس ساعىنىش

الەم • كەشە

جالعىزدىق ارالى

كينو • كەشە

ەلوردادا قار جاۋادى

قازاقستان • كەشە

بۇگىن ماشينا جاساۋ كۇنى

قازاقستان • كەشە

سقو-دا جۇك كولىگى جىلۋ قۇبىرىنا سوعىلدى

ايماقتار • 25 قىركۇيەك، 2021

ۇقساس جاڭالىقتار