كەشە تۇركيا ۇكىمەتى ەلدىڭ 16 پروۆينتسياسىندا پوليتسيا باستىقتارىن ورىندارىنان الدى. بۇل تۋرالى يتار-تاسس اگەنتتىگىنە سىلتەمە جاساعان Ras.kz حابارلادى.
تۇركيا ىشكى ىستەر مينيسترلىگىنىڭ بۇيرىعىمەن قىزمەتتەن شەتتەتىلگەندەر اراسىندا انكارا, انتاليا, يزمير جانە ديارباكىر پوليتسيا باسقارمالارىنىڭ باستىقتارى بار بولىپ شىقتى.
دۇيسەنبىدەن سەيسەنبىگە دەيىن پوليتسيا قاتارىندا كەڭ اۋقىمدى تازالاۋ جۇرگىزىلدى. وسى دۇرمەكتە 350-دەن استام پوليتسيا قىزمەتكەرى ورىندارىنان الىندى نەمەسە تومەنگى قىزمەتتەرگە جىبەرىلدى. بۇلاردىڭ اراسىندا جەمقورلىقپەن جانە اقشا اينالىمى ماسەلەلەرىمەن اينالىساتىن ۋاكىلدەر دە بولدى.
قۇقىق قورعاۋ ورگاندارىنداعى بۇل تازالاۋ ۇكىمەتتىڭ ولار وتكەن جىلعى 17 جەلتوقساندا جوعارى جاقپەن كەلىسپەي, ءوز بەتتەرىنشە قۇپيا جۇرگىزگەن «ۇلكەن پارا» وپەراتسياسىنا قايتارعان جاۋابى بولىپ تابىلادى. سول جولى پوليتسيا 50-دەن استام شەنەۋنىكتى, بانك قۇرىلىمدارى قىزمەتكەرلەرىن, سونداي-اق ءۇش ءمينيستردىڭ ۇلىن قاماۋعا العان بولاتىن.
ناتيجەسىندە پرەمەر-مينيستر تايپ ەردوعان مينيسترلەر كابينەتىندەگى 10 مۇشەنىڭ ورىندارىن اۋىستىرىپ, ءبىراز كادرلىق وزگەرىستەر جاساۋعا ءماجبۇر بولعان. تۇرىك ليدەرى سوندا بۇل جەمقورلىققا قارسى وپەراتسيانى «ۇكىمەتتى قۇلاتۋعا باعىتتالعان ارانداتۋ» دەپ باعالاعان ەدى. ول «مەملەكەتتىڭ ىشىندە مەملەكەت قۇرىلۋىنا جول بەرمەيتىنىن» مالىمدەپ, جاعدايدى ءوز باقىلاۋىندا ۇستاپ تۇراتىنىنا سەنىم ءبىلدىردى. ونىڭ 17 جەلتوقساننان بەرگى تازالاۋ ناۋقانى بارىسىندا قۇقىق قورعاۋ ورگاندارىنىڭ جۇزدەگەن قىزمەتكەرلەرى ورىندارىنان كەتكەن-ءدى.
بۇدان بولەك, جەمقورلىققا قاتىستى جانجالدان كەيىن بيلەۋشى پارتيانىڭ 5 دەپۋتاتى پارلامەنتتەن شىقتى.
ايدار ورىسباەۆ.
دەرەككوز: Ras.kz
فوتو: ewsfiber.com
