ءبىلىم جانە عىلىم مينيسترلىگىنىڭ مالىمەتىنشە, قابىلداۋ ەلەكتروندىق فورماتتا جۇزەگە اسىرىلادى.
تالاپكەرلەر مەن ولاردىڭ اتا-اناسىنىڭ دەنساۋلىعىن قورعاۋ ماقساتىندا جوعارى وقۋ ورىندارىندا ۆيرتۋالدى قابىلداۋ كوميسسيالارى جۇمىس ىستەپ, تالاپكەرلەرگە بەينەبايلانىس ارقىلى كەڭەس بەرەدى.
وقۋعا تۇسۋشىلەر 6 مامىر مەن 1 شىلدە ارالىعىندا وتكەن ۇبت-نىڭ ەكى ناتيجەسىنىڭ بىرەۋىن كونكۋرسقا ۇسىنا الادى.
ءوتىنىش بەرگەن كەزدە تالاپكەرلەر اتتەستات, اتتەستاتقا قوسىمشانىڭ ەلەكتروندىق كوشىرمەلەرىن جانە ەلەكتروندىق قۇجات نىسانىنداعى كولەمى 3×4 تسيفرلىق فوتوسۋرەتتى, سونداي-اق باسقا دا قۇجاتتاردىڭ كوشىرمەسىن قوسا تاپسىرۋى قاجەت.
ەگەر تالاپكەر «التىن بەلگى» يەگەرى نەمەسە وتانسۇيگىشتىك جانە بەلسەندى ازاماتتىق ۇستانىمى ءۇشىن ەرەكشەلىك بەلگىسىمەن ماراپاتتالعان بولسا, وندا ول باسقا ۇمىتكەرلەرمەن بالدارى تەڭ بولعان جاعدايدا باسىم قۇقىققا يە بولادى.
وليمپيادالار مەن سپورت جارىستارىنىڭ جەڭىمپازدارى ءۇشىن دە وسىنداي ارتىقشىلىقتار قاراستىرىلعان.
تالاپكەرلەردىڭ مۇنداي جەتىستىكتەرىنىڭ ەسكەرىلۋى ءۇشىن قۇجاتتاردى تاپسىرۋ كەزىندە راستايتىن قۇجاتتاردىڭ كوشىرمەلەرىن تىركەۋ قاجەت.
شەت ءتىلىن مەڭگەرگەنىن راستايتىن حالىقارالىق سەرتيفيكات بولعان كەزدە ءوتىنىش بەرۋشى سەرتيفيكاتتىڭ اتاۋىن, بالىن كورسەتەدى جانە ەلەكتروندىق سەرتيفيكاتتى تىركەيدى.
سونىمەن قاتار بيىل ءبىلىم بەرۋ گرانتتارىن ءبولۋ كەزىندە قر بعم العاش رەت حالىقتىڭ الەۋمەتتىك وسال توپتارىنا كۆوتالار ءبولدى.
ەندى كوپبالالى نەمەسە تولىق ەمەس وتباسىنان شىققان بالالار, سونداي-اق ەرەكشە قاجەتتىلىكتەرى بار بالالاردى تاربيەلەپ وتىرعان وتباسىلارداعى تالاپكەرلەردىڭ گرانت الۋ مۇمكىندىكتەرى جوعارىلاي ءتۇستى.
كامەلەتكە تولماعان ءتورت جانە ودان كوپ بالا تاربيەلەپ وتىرعان وتباسىلارداعى بالالار ءۇشىن گرانتتاردىڭ جالپى سانىنىڭ 5%-ى, كەمىندە ءۇش جىل تولىق ەمەس وتباسى مارتەبەسى بار وتباسىلاردان شىققان بالالارعا – 1%, ءى, ءىى توپتاعى مۇگەدەك بالالاردى تاربيەلەپ وتىرعان وتباسىلاردان شىققان تۇلەكتەرگە ءبىلىم بەرۋ گرانتتارىنىڭ 1%-ى كوزدەلگەن.
ۇبت قورىتىندىسى بويىنشا كەمىندە 65 بالل جيناعان تالاپكەرلەر ۇلتتىق جوعارى وقۋ ورىندارىنا تۇسە الادى.
«پەداگوگيكالىق عىلىمدار» – كەمىندە 75 بالل, «دەنساۋلىق ساقتاۋ» − كەمىندە 70 بالل, «اۋىل شارۋاشىلىعى جانە بيورەسۋرستار», «ۆەتەريناريا» – كەمىندە 60 بالل, باسقا جوعارى وقۋ ورىندارىنا - كەمىندە 50 بالل.
بۇل رەتتە ۇبت-نىڭ ءاربىر ءپانى جانە (نەمەسە) شىعارماشىلىق ەمتيحان بويىنشا كەمىندە 5 بالل جيناۋ قاجەت.
