قىرعىزستان مۇسىلماندارى ۋلەمى كەڭەسى راحماتۋللا اجى ەگەمبەرديەۆكە مۋفتي ورىنتاعىنان ءوز ەركىمەن كەتۋدى ۇسىندى. بۇل تۋرالى Ras.kz حابارلادى.
قىرعىزستان تەلەگراف اگەنتتىگىنىڭ اقپارى بويىنشا, 7 قاڭتاردا قىرعىزستان مۇسىلمانلارى ۋلەمىنىڭ رەسمي ەمەس وتىرىسى بولىپ, وندا مۋفتيگە ورىنتاعىنان ءوز ەركىمەن كەتۋ ۇسىنىلدى. ول بۇعان كەلىسىپ, ەندى رەسمي تۇردە ءوز شەشىمىن جاريالايتىن كورىنەدى.
اگەنتتىكتىڭ مالىمدەۋىنشە, جاڭا ءمۋفتيدىڭ ورنىنا بىشكەك قالاسىنىڭ قازىسى قىزمەتىن اتقارعان, قازىر «تابليگي دجاماات» قاۋىمداستىعىنىڭ باسشىسى ماقسات تولومۋشوۆ تاعايىندالۋى مۇمكىن.
مۋفتيگە قاتىستى جانجال جاڭا جىلدىڭ الدىنداعى كۇندەردە ينتەرنەتتە ونىڭ قاتىسۋىمەن بولعان ينتيمدىك سيۋجەتتى ۇسىنعان ۆيدەو پايدا بولعاننان كەيىن كوتەرىلدى. وندا اجىنىڭ ءبىر جاس ايەلمەن امپەي-جامپەي بولىپ جاتقانى ءتۇسىرىپ الىنىپتى. شۋ كوتەرىلگەننەن كەيىن ەگەمبەرديەۆ كادرداعى كەلىنشەكتىڭ يسلام زاڭى بويىنشا العان ءوز ايەلى ەكەنىن مالىمدەدى.
ايتا كەتەتىن جايت, قىرعىزستان زاڭناماسىندا كوپ نەكەلىلىككە تىيىم سالىنعان. الايدا, كەيبىر ەركەكتەر زاڭدى اينالىپ ءوتىپ, مۇسىلمان جولىمەن دەگەن جەلەۋمەن باسقا قوسىمشا ايەلدەر الىپ جاتادى. ولاردىڭ نەكەلەرى مەشىتتەردە قيىلادى.
قىرعىزستان مۇسىلماندارى ۋلەمى كەڭەسى راحماتۋللا اجى ەگەمبەرديەۆتى 2012 جىلعى جەلتوقساندا قىرعىزستان مۇسىلماندارى ءدىني باسقارماسىنىڭ بۇرىنعى باسشىسى سالىق تولەۋدەن جالتارعانى ءۇشىن قىزمەتىنەن الىنعان كەزدە سايلاعان ەدى.
جالپى, سوڭعى ءتورت جىلدا قىرعىزستاندا جەمقورلىق جانجالىنا بايلانىستى 5 مۋفتي اۋىسىپ ۇلگەردى.
ايدار ورىسباەۆ.
دەرەككوز: Ras.kz
فوتو: Tengrinews.kz
