اۋىل اكىمدەرىن تىكەلەي سايلاۋ ءاربىر قازاقستاندىققا قاي پارتياعا مۇشەلىگىنە نەمەسە مۇشە ەمەستىگىنە قاراماستان, ءوزىنىڭ كونستيتۋتسيالىق قۇقىعىن ىسكە اسىرۋعا مۇمكىندىك بەرەدى. جەرگىلىكتى تۇرعىندار اۋىل ماسەلەسىنىڭ ءتيىمدى شەشىلۋىنە ءاردايىم مۇددەلى. ەندى بىزگە وعان تىكەلەي اتسالىسىپ قانا قويماي, جۇمىستىڭ ناتيجەسىنە اسەر ەتۋگە جول اشىلدى. كەز كەلگەن ازاماتتىڭ ۇمىتكەر رەتىندە ءوزىن ۇسىنا الۋى بۇكىل سايلاۋ پروتسەسىنىڭ باسەكەلەستىگىنە جاڭا سەرپىن بەرمەك. ال بىرەگەي ەرەكشەلىك – تۇرعىنداردىڭ سايلاۋدى باسىنان اياعىنا دەيىن باقىلاي الاتىندىعى. اتاپ ايتقاندا, ناقتى ۇمىتكەر ءۇشىن داۋىس بەرۋدەن باستاپ, اكىمدى سايلاۋ, ونىڭ اكىم لاۋازىمىنداعى قىزمەتىنىڭ بارىسىن باعالاۋعا دەيىن. ەگەر تۇرعىندار اۋىل اكىمى ءوز مىندەتىن دۇرىس اتقارماي ءجۇر دەپ ساناسا, اكىمگە سەنىمسىزدىك ءبىلدىرىپ, ۆوتۋم جاريالاي الادى. ولار سايلاۋشى قۇقىعىن تولىعىمەن پايدالانا الادى.
جاڭادان سايلانعان اكىم ءوز سايلاۋشىلارىنىڭ الدىنداعى جاۋاپكەرشىلىكتى تولىق سەزىنۋگە ءتيىس.
سونىمەن بىرگە داۋىس بەرۋ قۇقىعى بار سايلاۋشىلاردىڭ جالپى سانىنىڭ كەمىندە 1 پايىزىنىڭ قولىن جيناعان ازامات ءوزىن ۇمىتكەر رەتىندە ۇسىنا الۋى قۋانتادى. بۇل – ءادىل باسەكەدە باق سىناپ, جەڭىسكە جەتكىسى كەلەتىندەر ءۇشىن ۇلكەن مۇمكىندىك.
جوعارىدا اتالعان وزگەرىستەر ازاماتتاردىڭ بەلسەندىلىگى مەن سانا-سەزىمىنىڭ ارتۋىنا ىقپال ەتەدى. ءاربىر قازاقستاندىق وسى سايلاۋعا قاتىسۋ ارقىلى ءوز اۋىلىنىڭ بولاشاعىنا اسەرىن تيگىزە الاتىنىن ءتۇسىنۋى كەرەك. ەلىمىزدىڭ ءار ازاماتىنا ءوزىنىڭ جەكە جاۋاپكەرشىلىگىنىڭ جۇگىن سەزىنەتىن كەز كەلدى, ويتكەنى قازاقستان – ءبىز جالعا العان باسپانا ەمەس, ول – ءبىزدىڭ ورتاق ءۇيىمىز.
الماگۇل قوزباەۆا,
«Kaisar-KZ» قوعامدىق بىرلەستىگىنىڭ توراعاسى
پاۆلودار وبلىسى
