اقش وڭتۇستىك كورەيا اۋماعىنا قوسىمشا اسكەر كىرگىزەتىنى جونىندە مالىمدەدى. بۇل تۋرالى Lenta.ru حابارلادى.
پەنتاگوننىڭ اقپارى بويىنشا, ولار وڭتۇستىك كورەياعا 800 اسكەري قىزمەتكەردى, سونداي-اق اسكەري تەحنيكالار كىرگىزەدى. پەنتاگون بۇل شارالاردى اقپان ايىندا جۇزەگە اسىرۋدى جوسپارلاپ وتىر ەكەن. اقش اسكەرى كحدر-مەن شەكارالاس اۋداندارعا ورنالاستىرىلادى. ولاردىڭ وڭتۇستىك كورەياداعى قىزمەتى توعىز ايعا سوزىلماق.
1 قاڭتاردا كحدر باسشىسى كيم چەن ىن دۇنيەجۇزىلىك سوعىس پەن يادرولىق قاۋىپ تۋ مۇمكىندىگى جونىندە مالىمدەپ, بۇل قاۋىپتىڭ اقش-قا تونەتىنىن ايتىپ وتكەن. سونداي-اق ول 25 جەلتوقساندا كحدر ارمياسىن بارىنشا جوعارى دايىندىق ساپىنا كەلۋگە شاقىردى.
اقش سولتۇستىك كورەيا تاراپىنان كەز-كەلگەن ارانداتۋشىلىق ارەكەتتەرگە دايىن بولۋ كەرەك دەپ ەسەپتەيدى. ولار سونداي-اق پحەنياننىڭ يادرولىق جانە زىمىراندىق باعدارلامالارىن دامىتۋىنا الاڭداۋشىلىق بىلدىرۋدە.
قازىرگى ۋاقىتتا وڭتۇستىك كورەيا اۋماعىندا اقش-تىڭ 28500 اسكەري قىزمەتكەرى بار. ولار ۇنەمى وڭتۇستىك كورەيامەن بىرىگىپ, وقۋ جاتتىعۋلارىن جۇرگىزىپ تۇرادى.
ايدار ورىسباەۆ.
دەرەككوز: Lenta.ru
فوتو: Reuters.com
