دەپۋتاتتار اۋىل شارۋاشىلىعىن ودان ءارى جاڭعىرتۋ جانە تسيفرلاندىرۋدىڭ ماڭىزىن اتاپ ءوتىپ, ءسۇت-تاۋار فەرماسىنىڭ جۇمىسىندا وسى ادىستەردىڭ قولدانىلۋىن تەكسەرىپ, ناتيجەلەرىمەن تانىستى. 1600 باس ءىرى قارا مالعا ەسەپتەلگەن بۇل كەشەن وسى سالاداعى ءىرى جوبالاردىڭ ءبىرى بولىپ سانالادى.
اۋىلدى دامىتۋ ءۇشىن زاماناۋي تەحنولوگيالاردى ەنگىزۋمەن قاتار, كادر تاپشىلىعى پروبلەماسىن شەشۋ دە ماڭىزدى. «ەڭبەك» مەملەكەتتىك باعدارلاماسى اۋىل تۇرعىندارىن ەڭبەك كۇشى تاپشى وڭىرلەرگە كوشىرۋگە باعىتتالىپ وتىر. ولگا پەرەپەچينا مەن ەرىك سۇلتانوۆ استراحانكا اۋىلىندا ەلىمىزدىڭ وڭتۇستىك وڭىرلەرىنەن وسى جاققا كوشىپ كەلگەن ازاماتتارعا قانداي جاعداي جاسالاتىنى تۋرالى حاباردار بولدى.
«بۇل باعدارلاما ەلىمىزدىڭ سولتۇستىك ايماقتارىنان حالىقتىڭ كەتۋىن ازايتۋعا مۇمكىندىك بەرىپ, ادام رەسۋرستارى مەن ايماقتىڭ كادرلىق الەۋەتىن جاقسارتاتىن بولادى. سولتۇستىك قازاقستان وبلىسىن دامىتۋدىڭ كەشەندى جوسپارىنا ەنگىزىلۋى وسى جۇمىستىڭ ەرەكشە ماڭىزىن كورسەتىپ وتىر», دەدى ەرىك سۇلتانوۆ.
سەناتورلار قىزىلجار اۋدانى چاپاەۆ اۋىلىنداعى 720 باس سيممەنتال اسىل تۇقىمدى مالعا ارنالعان تاۋارلىق ءسۇت كەشەنىندە بولدى. كەشەن ديرەكتورى اگروكاسىپورىن جۇمىسىنىڭ قۇرىلىمى جانە نەگىزگى وندىرىستىك شارۋاشىلىق كورسەتكىشتەرىنىڭ قوزعالىستارىمەن دەپۋتاتتاردى تانىستىردى.
«قازىرگى ۋاقىتتا مەملەكەت شارۋالارعا قولداۋ كورسەتۋدە. وڭىردە ءسۇتتى مال شارۋاشىلىعىن دامىتۋ جونىندە باعدارلامالار تابىستى جۇمىس ىستەۋدە. الداعى ۋاقىتتا مەملەكەتتىك قولداۋ مەن جەكە ينۆەستيتسيالار ەسەبىنەن سالانى قارجىلاندىرۋ ۇلعايادى دەپ ويلايمىن», دەپ اتاپ ءوتتى ەرىك سۇلتانوۆ.
